ضحايـا_شـرف (بين الواقع والخيال)✨
الــــحـــــــلقــــــــه الـثانــيـه عشــر ✨
الگـاتبــه هٖنــــــوَ ۦَٰ ٱڵبــــــرغثــــــي ۦَٰ ✨
……………………………………………………………
لايك+ تعليق ❤️
فالعشية
نزلت ملاك ويوسف وسلسبيل اللي بتجدي بيش طلعت
خشت ملاك وفي يدها باقة ورد ..وتحكي مع سلسبيل ويوسف وراهن.يحكي بالفون وتبعد عليهن
كانت جمان طالعه من عند دكتور وايهم يهدي فيها
ويمشوا فالممر لين ...شفت خواتها وتقرب منهن بخطوات مهزوزه
ملاك نزلن دموعها ويديها يرعشن قربت من جمان وتلكلك
وتجمعوا دغري دموع في عيونها وينزلن بغزاره..
جمان قربت منها وعلى اساس كانت بتحضن ملاك بس وقفتها
ملاك ودموع في عيونها:ردي بالك تقربي مني ولا من سلسبيل
جمان ببكاء:حرام عليك الله يربحك اسمعيني
وراس ماما
ملاك:نسمعك انتِ..وبعدين لو كانت ماما تهمك مادرتيش هكي
جمان:مسكت يد ملاك وبتمني..ملاك انا اختك اسمعيني
ملاك فكت يدها منها بقوه..انا مش اختك ولا عاد تعنيلي حاجه ..
جمان تهزز في راسها بنفي ودموعها ينزلوا..لا لا ماتقوليش هكي حرام عليك
ملاك:الحرام قعدتي معاك الله لا تسامحك لا دنيا لاخره...خربتي حياتنا ..وشهوتينا من ورا عمايلك...وبحتت في ايهم بكره ...انتِ والاخ اللي معاك..عمرنا ماحنسموكم
وخذت ملاك سلسبيل اللي كانت منهاره وتبكي
أيهم: مسح دموع جمان وخذها من يدها وقاعد يمشي بيها..وركبها لسياره وركب في جنبها
خلاص اهدي...وكل شيئ حينحل
جمان حطت يدها ع وجها وتهز من كثر البكاء كيف بينحل كيف
انا خلاص خسرت هلي خسرت خواتي خسرت ماما
اااااه ياربي اااه
ايهم:نزل يديها من ع وجها ...صدقيني هنا مازالن يحبنك غير يكبرن..ويبن يورنك غلطك
هزت جمان راسها بنفي:مستحيل مستحيل..نضره اللي شفتها في عيون ملاك مستحيل ننساها نضرة حقد وكره ...ياريتني متت قبل ماندير هكي ..ياريت ربي خذاني قبل مانغلط كيف هالغلطه
ايهم:انتِ صح غلطتي وغلطتك كبيره..بس صدقيني يجي يوم وينحل كل شيئ
جمان:ياريت ياريت ..ندفع نص عمري ويسامحوني..الهل عزوه ياايهم وانا عزوتي خسرتها
ايهم تنهد ماردش عليها حط المرشه D وطلع
وقعد ساكت وحب يغير الموضوع
تلقياها نور قالبه الحوش عياط
جمان مسحت دموعها:هذا عليش مانبيش نسيبها ..مع عمتي
ايهم:مش مشكله..امي تحبها واجد
جمان:صح عميمه مكبده فيها واجدد
ايهم:امي تحب صغار واجد..وهذي حفيدتها طبيعي تحبها
~~~~~~~~~~~~~~~~~~~~~~~
ملاك:امسحي دموعك..وردي بالك تحكي لحد
سلسبيل:قصدك حتى مروه مانقوللهش؟
ملاك:اها ..اصلا مش داعي ينفتح موضوع جمان ورقه في حياتنا وانتهت خلاص
سلسبيل:ماتقعديش قاسيه هذي اختنا
ملاك:والله ..لو نحنا نهموها را مادرتش هكي.لو هيا حاسه بينا نحنا خواتها..مادرتش عملتها ..وتوا اسكتي يوسف جاي مش داعي يحس
قرب منهن يوسف..شنو كنكن ماخشيتن
سلسبيل:ملاك قالت مش حنخش الا بيوسف
ملاك وجها نحمر وتبحت في سلسبيل بتفنيصه ..
يوسف ضحك باهي هيا نخشوا..وفتح الباب على مروه وزياد وفريده وطلقوا سلام عليهم
ملاك طبست ع مروه وحبت راسها مبروك ياقلبي..وعطتها الباقه
مروه ..يبارك فيك العقبالك انتِ ويوسف
ملاك بحتت في يوسف ولقاته يبتسم..احم ..وينه الكتكوت
مروه:فالحضانه ماجبوش ليا بكل
ملاك:ممكن لانا جا في ثامن هذا عليش ماطلعوش
مروه:ممكن
سلسبيل مسكت يد مروه ومبتسمه:شن تبو تسموا البيبي
مروه:من مبدري نفكر ...وجا في بالي منصف اقل شيئ يقعد هو ومنذر ع نفس الوزن
فريده:تعيشوا وتسموا ان شاء الله
ملاك:وين حمادي مرايفه عليه بكل؟
فريده:كان هنا ورن عليه صاحبه طلع
ملاك:اها ..وطبست ع مروه وتحكي بشويش..وين عمتك وسلفتك
مروه:ماجتني في اول مرا بتجي توا؟ وبعدين سلفتي حتى هي جيبه ماتقدرش تجي 😑
ملاك:كلا عمتك هذي خاطري نطلع بروحها
مروه:نفس شعور 😂
ملاك:اسمعي
مروه:ڼـعم
ملاك:عليش جبتي عمليه مش ع اساس طبيعي
مروه:مش عارفه انا بروحي استغربت كل اللي فهمتا انه ع ظهري
سلسبيل:شن فيه ظهرك
مروه:طحت
فريده حطت يدها ع صدرها وشهقت:منيش طحتي؟
مروه:خشيت للحمام..ونحس بالالم..في بطني والحزام ومعاش فطنت لروحي زلقت وطحت
ملاك:يالهبله افطني لروحك من جد وجديد
سلسبيل:شوفي من تحكي انتِ اكثر انسانه طيحي ياملاك
ملاك:بس لما تزوجت معاش طحت 😌
وبحتت في يوسف ع اساس تقوله هيا..لقتا يهدرز مع زياد ومنسجم..
مروه:عليش تبحتي ماشبعتيش منا يعني
ملاك:غير غمي فمك..نبي نقوله هيا بنروح
مروه:وعليش بتروحي توا
ملاك:زياره هيا مش عرس راهو
مروه:باهي يابارده.. انا بكرا بنطلع لشقتي تعالي
ملاك:تمام تو نجي .
يوسف صبى وبحت في ملاك:هيا
ملاك:هيا سلسبيل
زياد:روحوا انتم سلسبيل تو نروح بيها مع عمتي
فريده:خلاص اربحوا معناها ونحنا نروحوا مع زياد مافينا ماتعبناكم
ملاك حطت شنطه ع كتفها:باهي ..ماتبن شيئ
مروه:سلامتك
ملاك ويوسف:مع سلامه ..وطلعوا
~~~~~~~~~~~~~~~~~~~~~~
جمان خشت لدار وتحكي مع ايهم ..خليني بروحي بس
ايهم تنهد:جمان ماتشغلينش عليك...كيف تبيني نخليك بروحك وانتِ حالتك هكي
جمان:ماتشغلش بالك..انا كويسه..كل اللي نبيه نقعد بروحي بس
ايهم خذا نور اللي كانت ع سرير..حنطلع بس مش من الحوش حنسيبلك دار بس..وطلع وفي يده نور
صبت جمان لحمام دارها وتوضت ولبست ملايتها وقعدت تصلي
ومع كل سجده دموعها ينزلن كملت وسلمت
رفعت يديها لربها ..
لما مرضت ودم ينزل مني ..خفت نكون مريضه ونخسر حياتي..خفت كيف حنواجهك باأغلاطي
بس اليوم عطيتني فرصه ..وطلعت القرحه ملتهبه 💔
عبدك طماع يارب كيف ماعطيتني فرصه في صحتي رطب قلب هلي عليا
لٱ ليلي ليل ولا نهاري نهار بدونهم..نضرة الكره اللي في عيون ملاك مستحيل ننساها
يارب اغفرلي يارب اغفرلي ونهارات من جديد
~~~~~~~~~~~~~~~~~~~~~~~
عند رغد بعد طلعت من جامعه وهيا مستوها وتفكر كلام فارس ومصدوم ركبت سيارتها وروحت للحوش حتى باقي محضاراتها سيبتهن
وخشت لدارها سلحت دبشها وطلعت لصاله
مبروكه:رغد كنك
رغد:راسي صُداع بس
مبروكه:خوذي بنادول وخشي ارقدي
رغد: تو ناخذ...وسكتت وهيا في دوامه مايعلم بيها الاربي
توتر ع خوف ع استغرب..
خشت لدارها بعد خذت بنادول وخش نوم لعيونها وهي تفكر في عرض فارس
~~~~~~~~~~~~~~~~~~~~~~~
في ليل
لفت ملاك ع راسها الوشاح وتحكي ليوسف:شن خطر عليكم شوايات في ليل بس
يوسف:تحشيشت شباب يبوها وداروها
ملاك .:باهي ..بعدك انا لي زمان عليهن
يوسف:وكنك ماقلتي را درتهن لك من قبل
ملاك:مش ضروري نقولك
يوسف عقد حواجبه:انتِ كنك هكي
ملاك:كني
يوسف:غريبه ومزاجك متقلب
ملاك ضمت يديها و حطتهن ع صدرها :هذا طبعي
يوسف:..انا نعرفك اكثر من روحي مش هذا طبعك
ملاك:عادي تغيرت
يوسف:وشن اللي غيرك؟
ملاك:انت
يوسف:نعم انا
ملاك:اها انت لما سيبني بلا سبب وفوتتني ..طبيعي بنتغير ونفسيتي تغير وحياتي تغير كلي ع بعضي تغيرت
يوسف:ماهو لو تعطيني فرصه نحكيلك حتفهمي
ملاك:لٱ نحكيلك لٱ تحكيلي نحنا اللي بينتنا شهر بس وكل واحد في طريق
يوسف:نعم شن قلتي
ملاك فتحت الباب ..اللي سمعتا
يوسف..بصوت عالي ملاك انزلي
ونزلوا هما الاثنين وعصبيه واضحه في وجهم
دارو شباب شوايات وقعدو يهدرزو
علي بصوت عالي يوسف
يوسف:نعم
علي: في شغل في طرابلس ونبيك تمشيلا
عائشه:وعليش وهو مالا شيئ مروح من غادي
علي:شغل ياعائشه شغل
عائشه:كلف حد اخر ..ولدي ماشحور الا واجد
علي:عائشه امور شغل ماتدخليش فيهن
عائشه:بس هذا ولدي
علي:وشن ماهو حتى انا ولدي ..بس شغل هذا مايكملش الا يوسف
يوسف مسح ع وجه وتنهد:امتى نمشي
علي:اليومين جايه
يوسف وعرف باته عليش يبيه يمشي..تمام تو نرتب اموري ونمشي انا وملاك
طلع فارس من جنبهم وحط ع رقم رغد ورن عليها ولقاها محوله الحظر
رغد: الو
فارس:شن الاخبار
رغد: تمام
فارس:كنك تقولي فيها هكي
رغد:نقولها لك ونقدملك معاها طبق بكلوه
فارس:بلا حناطه زايده،،،وقوليلي فكرتي؟
رغد:مازالت مافكرت
فارس:شنو انا تقدمت لي ازبيلا ومش عارف
رغد:لٱ وحياتك متقدم لرغد ال .. اللي كلهم يتمنوها
فارس:عليك فشخره
رغد:تزيد حرف ..نقولك مافيش نصيب
فارس:هيا هكي
رغد:اها هكي 😂😂
فارس:باهي غيري موضوع وخليني نعرفك ع روحي
رغد:بدون ماتعرفني فارس صايع اللي مافيش رقم بنت وماعنده
فارس :ومذوبهن كلهن
رغد:شن تبي توا؟
فارس:نهدرز معاك ...وكملوا باقي تدريزهم..وتعرفوا ع بعضهم
~~~~~~~~~~~~~~~~~~~~~
ايهم شاف نور راقده ع كنبه..وقعد متوتر..حاس روحه مش قادر يدس اكثر من هكي
ويوصل لدار اللي فيها جمان يحط يديه بيدق ويتراجع في اخر لحظه
لين قوه روحه وخش لدار لقا جمان مقمعزه ع سرير وتقرا في قران
جمان استغربت نضرة ايهم لهآ:ايهم كنك
ايهم:جمان انا مش قادر مش قادر
جمان بخوف:شن اللي مش قادره كنك مريض تحس في حاجه
ايهم:قرب منها ومسك وجها ويحكي بهمس
جمان
انا نحبك ...........
يتبع
عارفتها قصيره..والله نفسية مايعلم بيها غير ربي
كل يوم يقولوا بكرا ولحد الان مافيش اي اخبار عليها
انتن ادعلي ننجح 🥺❤️
أنت تقرأ
ضحايا شرف 🔥❤️
General Fictionرواية ما بين الواقع والخيال ❤️ للكاتبة المبدعة / هنـــو البــرغثــــي ❤️ القروب الاصلي للكاتبة :- https://www.facebook.com/groups/359109965062618/?ref=share
