بارت 12
بعد ما طلع الدكتور وانطانه النتيجة انوا صاير عنده سرطان بالدم من اثر الهبطة.....
انطانه الكلام كله دفعة وحدة اني من سمعت هيج انهاريت ورحت ركض على الدكتوررلزمته من ياخة صدريته وكتله انته جذاب هو مابي شي.....
هو تصوب وهسة يكوم بالسلامة كلشي مابي هو ما يعوفني افتهمت افتهمت اني واحجي وياه وحسيت روحي ما عندي اتزان واشنجت اعصابي وكعت قبل لا اوصل للكاع لكفتني ادين ما اعرف منو......
كعدت المغذي بأيدي وراسي يوجعني لكيت فاطمة يمي كامت كالت ها يا كلبي كعدتي كتله اني شبيه فاطمة.....
كالت انهاريتي وفقدتي الوعي يامعودة صيري قوية لوما حسام ابن خالج موجود وشايلج جان شسويت اني واخوج مخبوص ويه سرمد لان ما كلناله وسأل عليج كله جهاد رايحة تغسل الملابس وسوي اكل النه.....
بجيت بجيت بقهر كتله فاطمة لو هو موجود يخلي احد يشيلني...
كتلها مو اكلج اني نحسة ما تلام الناس بيه من تكول فكر وبومة صح والله صح....
هاي هسة حتى حبيبي ورجلي راح يأخذه الموت مني اجت فاطمة حضنتني وكالت لاحبيبة لا تكولين هيج هذا أمر الله موجود أن شاء الله....
كالت يله عمري كومي هو ما يدري بيج هنا صيري قوية
بقيت كل يوم اروح للمستشفى واودي اكل وملابس واني مرافقتني الدموع لا ليلي ليل ولانهاري نهار صعبة كلش من تشوف الي كدامك وتحسه روحك من الدنيا يموت وانت ما تكدر تسويله اي شي...
كطعت الاكل اكل بس على كد يخليني اكدر اقضي مستلزماته من روحه للمستشفى وملابسه اغسلهم....
اشوفه ذاك الجسم والضخامة صار جلد وعضم عيونه غارن كأنه بحفرة صارن وملابسة كلهن بعد مايصيرن عليه....
رحت الصبح كل العادة رحت غسلت وجه لان هسة صار اسبوع على المغذي والاوكسجين.....
شفته تعبان كلش بجيت جر ايدي كال حبيبة لا تبجين اني ادري بروحي ماباقي خليت ايدي على حلكه كتله لاتكمل اروح الك فدوة.....
اشر بايده يعني اسمعي كال يا بعد الروح اذا صار عليه شي ومتت ما اريد تأذين نفسج وتبقين تبجين شوفي حياتج واريدج توعديني ما تبقين هيج تزوجي وكليتج لاتركيها عبالج اني ما ادري ما جاي داومين بس ساكت عنج مستقبلج هذا حبيبتي اني من اشوفج شلون مقهورة عليه أحس هذا يعجل بأجلي ...
حسيت نفسي اختنكت من كثر البجي وحتى امه واخته هم كاموا يبجون ابو واخو وجهاد وحسام الي هم اصدقاء كلش وما فا ركه طول فترة رقوده بالمستشفى طلعوا برة....
كتله حبيبي صدك ما أشوف غيرك رجال انته رجلي وابوي واخوية وحبيبي شلون بيه كلي لا تعذبني بهل الكلام
مرن الشهرين مثل لمح البصر وقبل لا يكملن كعدت الصبح مثل كل يوم البارحة كلي مشتهي شي من أيدج الطيبة لان اني بهل الفترة فاطمة ما خلت شي ما علمتني عليه.....
حمضت سمجة ويه صلاة الفجر وكلت من اكعد اشويها ونروح سمعت جهاد....
مخبوص يخابر ويكول هسة لحضات وجاي كتله شكو شبيك كال امشي وياي سرمد تخربط كلش واتصل احمداخو بيه.....
يمه ما اعر ف شلون لبست حجابي وعباتي و طلعت اركض وره جهاد لمن وصلت لن سرمد....
بالحضات الاخيرة اني هنا فقدت دكيت لطمت ملخت نفسي خالاتي اثنين مو جودات ومرة خالي كوة لزمني....
اجه حسام ابن خالي زمخ بأمه كلها اخذيها يمة فضحتنا .....
اني بوضع ما اكدر ارد عليه اخذونه للبيت اني وبقية النسوان الموجودة بالمستشفى.....
رحنه ابيت عمي...
ولكينه كل الاهل والاقارب موجودين وصار البجي والنوح شوية وهجمت عليه خالتي كالت من يوم الي رادج وعرفت حيصير بأبني شي وهدت عليه ضربتني راجدي وجرت شعري اني جنت مستسلمة لكلامها حسيته صح ....
اجت فاطمة تركض وخالاتي ما خلنها صاحت فاطمة ترى عيب وحرام الي دا تسوي انتي ما تشوفيها شلون صايرة ليلها كله ما تنامه وحتى كليتها تركتها السنة ها على مودشنو كولي غير زوجته وتحبه صح ما داخل عليه بس مو شوية صارهم اربع سنوات الهن حوبة...
صاحت خلي تطلع ما اريدهم ما اريدهم بيتي طلعوا البومة اني بهاي اللحضات تخليت عن كرامتي نهائيا صاحت فاطمة يله سناد....
كتلها اروح الج فدوة بس أشوفه أخير مرة راح اطلع بالطارمة من يجون بس احاجي صدك شبكتني وطلعتني برة وكل ساعة وحدة من نسوان خوالي لو خالاتي جاية....
لحد ما جابوا الجنازة ودخلوها دخلت ورهم شفت امه حاضنة التابوت ومنهارة رحت كعدت من الجهة الثانية....
كعدت كتله اكعد حبيبي اكعد مو كتلي سلميلي كلبج وما أكسره الج مو كتلي كلشي نسوي أني وياج مو كلت اني ما اخلي دموعج تنزل يله كوم امسح دموعي يله كمل بيتنه وفرشت الفرشة بالغرفةموكتلي الفرشة اريدها بيضة وبيها ورد وردي حتى حياتنه تصير وردية موكلت اريد ولد وبنات منج يشبهوج واني اكلك لا يشبهوك مو كتلي احسب يوم يوم تجين يمي هاي اني يمك وانته نايم.....
جذاب جذاب انته جذاب وين وعدك الي ليش تعوفني و بعد ما حسيت غير اني بيتنه وفاطمة وجهاد عيونهم حمر ويمي... +
كعدت توفي يمرغ برجلي ويكلي عمة لاتبجين....
بجيت اكثر وجهاد كال حبيبة عيب عفت الناس وجبتج كتله وياك حباب...
كال خالتي تأذيج كتله قابله شلون ما الطم عليه شلون حركتي وين تروح....
كال ميهم باجر مو اليوم اخذج وكت اللطم وارجعج بسرعة....
بقت فاطمة يمي واني بس صافنة ودموعي تصب دموع مرت كل لحضة حلوة وياه وشلون صديته وشلون حبيته وشلون صار النبض الي يمشي بكلبي ويمشي وياي مثل مجرى الدم .....
خابرت سعاد.....
ردت عليها فاطمة كالت الها باجر يمكم ما حصنا حجز اليوم سولفت الها خالتي شسوت اشرتلي تحاجيج ما التفت الها كالت الها سعاد حبية ما تحجي بس صافنة وتبجي كالت الها خل التلفون على اذنها.....
اسمع حجي سعد....
تكلي سناد.... بنيتي خيتي حبيبتي خلي ايمانج برب العالمين قوي هذا امر الله لا جزعين ما أكدر ارد عليها كالت ان باجر يمج ان شاء الله ولاتهتمين لخالتي....
اني اجي وأخذج للفاتحة لاترحين وحدج واشوف شحدها تحجي.....
اخذت فاطمة الجهاز ونهت الاتصال وياها....
ما اعرف شلون نمت وتمنيت هذا كله كابوس مزعج مريت بي بس للأسف هذا حقيقة ودا اعيشها .....
كعدت الصبح ويه الصلاة اريد اروح احضر ملابس وجراجف مثل كل يوم.....
لكيت فاطمة تتوضأ كتلها كعدي جهاد....
حتى نروح لسرمد ما حجت شي فاطمة كالت عيوني تعالي توضي وصلي وهسة دنيا الفجر ارجعي نامي كتلها ما ما أنام...
اريد اروح اليوم تأخرت عليه جرتني مثل الطفل قنعتني وبوستني وكالت خيتي ترحميله ورحمي نفسج...
صدك لو كالو ا الموت عذاب للاحياء.... بجيت عقلي ما جاي يستوعب موته...
اجت سعاد...
ورحنه للفاتحة وكت اللطم وخالتي تريد تكوم تكطعني بس على كد اللطم وطلعنه واني طلعت الحركة كلها بروحي وباللطم
انتهت الفاتحة....
وصار للحبيبي اسبوع احنه عادتنه تسوي سبعة للميت ملة ولطم وثواب .....
ثاني يوم تقريبا بالثمانية لصبح اندكت الباب وجن اسمع صوت خالتي.....
يتبع...
