تحدى حياه

الفصل السادس

الفصل السادس #تحدى_حياه
_______

بعد ليله طويله مرت على منزل ياسين، وقلق هاجم الجميع اخوته وامه، لتقنعهم حياه اخيرا بالراحه قليلا، لتظل هى بجواره، ومع ساعات الصباح الاولى، يستيقظ ياسين، يفتح عيناه ليجد حياه نائمه على ذلك الكرسى امامه، على مايبدو انها امضت ليلتها السابقه هنا، حتى داعب  النوم عيناها فاسبلت جفناها واستسلمت له.
ليهتف ياسين باسمها بخفوت، فتهب من مكانها تتجه نحز فراشه قائله بلهفه: ياسين انت كويس طمنى عليك؟

ابتسم بهدوء قائلا: الحمدلله، بس قوليلى بتعملى ايه هنا ولا هى الساعه كام دلوقتى؟

تنظر الى ساعه يديها قائله: الساعه داخله على سته الصبح

يقطب حاجبيه قائلا: ايه سته!!  وانتى لسه هنا مروحتيش

تهز راسها بهدوء تردف: مكنش ينفع اسيبك فى الحاله دى، وبعدين والداتك واخواتك كانو قلقانين وفين وفين على اقنعتهم كل واحد يرتاح شويه، واتصلت على ماما قولتلها انى هبات هنا.

قال ياسين بهدوء وعلى غير عادته: اول ما النهار يطلع تروحى بيتكم وترتاحى للابد

قطبت حياه حاجبيها قائله: ايه للابد دى هموت ولا ايه؟

ليضحك بشده قائلا: لا ياستى بعد الشر، انا اقصد اقول ترتاحى منى، انا هدخل المستشفى وافضل هناك زى ماما كانت عاوزه، واولا واخيرا ايام كلها وتعدى

شعرت بالحزن من كلامه فقالت: هو ايه كل الحزن دا؟ وليه اليأس دا؟  فهمنى وليه قولت ان سالى هى السبب فى اللى حصلك؟

تنهد بحزن  قائلا: عارف انك عايزه تعرفى وانا هقولك
بعد الحادثه ورجوعى البيت، كانت سالى معايا هنا تقريبا مش بتسبينى لحظه كبرت اوى فى عينى وكنت شايفها فى منتهى الاخلاص والوفاء، لحد اليوم اللى اكتشفت فيه انها على علاقه برامى الحلوانى.

قاطعته حياه وهى تمد اليه كوب من الماء قائله: وعرفت ازاى انها على علاقه بيه؟

شرب قليلا من الماء ليستطرد قائلا:
كنا قاعدين فى البلكونه هنا، سابت تليفونها دقيقه، جاتلها رساله فتحتها من غير قصد لقيته رقم رامى وبيسالها ايه اخر الاخبار، مكنش عندى اى شك فيها عشان كدا سالتها بعفويه عن الرساله دى، ارتبكت وقالتلى انه بيسال عليا دايما وان رسالته دى اطمئنان عليا،  طبعا مصدقتش محدش يعرف رامى قدى، ولا يعرف سواد قلبه زى ماانا اعرفه، وارتباكها كمان خلانى ابتدى اشك فى كلامها، وكان لازم اتاكد من شكوكى او انفيها خالص.
كلمت واحد صاحبى  اسمه (احمد عامر ) بثق فيه جدا، هو كمان ظابط، حكتله على كل شكوكى، وطلبت منه بصفه غير رسميه طبعا يراقبلى سالى والحلوانى ويعرفلى اذ كانو يتقابلو مثلا او بينهم اى شىء،وفعلا حصل وابتداء احمد يعمل تحرياته وطلب منى اتعامل مع سالى بكل هدوء ومن غير مايبان عليا اى حاجه.