#قانون_الكرامة
#ورودالخالدي
البارت١
امال::::
مهران طلكني
هالكلمتين كلتهن او مفات للغرفة ومن سمعني شمر السويج والموبايل والباكيت والجداحة ع الكومدي وتمدد ع الجربايه وكأنما مسمعني شنو كلت يعني اتجاهلني بكل هدوء فكلتلة :
مهران سمعتني شنو كلت!!؟
اي آمال سمعتج..طفي الضوه خلي انام تره هلكان من التعب
فور دمي اكثر مما هو فاير فكتله:
تنام شنو مهران كتلك طلكني !!
ماشي الصبح اطلكج بس خلي انام!!
ماكو شي اسمه الصبح هسه اطلكني
اهووووكتلج اريد انام هلكان تعبان شفتيني حتى متعشيت اريد بس انام وراسي يرتاح اي موضوع او طلابه او معاتب اوشكوى عندج على اهلي اجليهن للصبح
ماكو تأجيل طلكني هسه
ههه لج شنو طلكني شببج اليوم تخبلتي ضاربات عندج فد مرة!!
طبعا هو لحد الان ممستوعب انه اني دا اطلب منه يطلكني بجديه عباله مجرد اريد افرغ عصبيتي فكتلة:
لا متخبلت بالعكس اخيرا عقلت وفكرت اخلص نفسي من الحجيم العايشه بيه.. و
بعدني ممكمله جرني من ايدي كعدني كباله وشال ايده لزم وجهي من حنجي وضحك:
هههه عيشتي حجيم اموله اني عيشتي جحيم!!
رغم لازم وجهي حيل فكتله:
الجحيم ابرد منها مهران
ولج مابيه حيل تعبان وروح ابويه...واليوم السياره عطلت ..وسمطت اهلي ..باجر نسولف..تعالي خلي انام
وخرت ايده عن وجهي بنتر وكتله:
ما اريد انام اريدك اطلكني فورا..وتخلصني من جحيمكم!!
حضني راد يبوسني كوه وكلي:
هههه..ولو تعبان بس اليوم تحجين بالجحيم تعالي خلى اراويج شويه منه😉😉😉
اعرفه شنو يقصد ..يريد يصالحني بتقارب يعني مثل كل مره يبوسني ويحضني وعلاقه زوجيه وبعدها اضطر اسكت وما اناقش بس هالمره ما اسمحله يستغل كوني ضعيفه وينضحك عليه بتقارب فكتله
فدفعته وكتله:
ماحزرت مهران هالمره متكدر تهديني بتقارب واحضان هالمرة متهمني بعد كل حسابات زوجية بيني وبينك هاي هيه خلص صبري خلصت طاقتي ع التحمل خلص كولشي حلو اكدر اخلي عذر كدامي حتى يستمر زواجنا الفاشل
من كتله فاشل يمكن هالمره حس اني احجي بجديه شفت ملامحة تغيرت وكلي:
زواجنا فاشل امال ليش شبي زواجنا عايشين والحمد لله وهذا ابنه مثل الورد وكدامنه العمر على اي اساس حكمتي عليه بالفشل
