قانون الكرامة
#ورودالخالدي
البارت٢
امال::::
دخلت خليت جنطتي وغراض حسوني بالكاع بس اتحرك ع كيفي حتى ماما متكعد لان غافيه خطيه نزلت فراش من البوفيه وفرشته وبس خليت حسوني فز واول مفتح عينه كال..بابا اي خطيه هو متعود يعوف جربايته الزغيرة ينزل منها ويجي يغفة بحضن ابو من يلكاه غافي بقه يتلفت حضنته وكتله:
نام ..ماما بعده بابا مجاي
ولان النعاس بعيونه منتبه وين احنا شبكني باديناته الزغيرونات ورجع نام اني شبكته وبقيت افكر يعني الي سويته اني صح لولا...وبقيت اقنع بنفسي اي صح الطلاك افضلي من عيشتي عدهم خلص صبري طلعت روحي احس نفسي يوميه اموت عدهم بسبب اهاناتهم ومعاملتهم الزفت عايشه عدهم خدامة للزغير وللجبير ولازهار وجهالها وحتى مرت يوسف مدلله براسي لاشغل ولا عمل ع ابو عدها دوام وتتعمد حتى تعوف ملابسها وملابس رجلها بالحمام ومن تلكاني غاسلة الهدوم وعازلتهن تضل تبسمر شنو هالنحاسه وخالتها ابد متحجي وياها بالعكس مدللتها براسي وكل شويه تمدح بيها وتكولها يوم الاجمعجن انتي واختج ابيتي تقصد تزوج ريم لمهران لان متزوجت وع حد كلامهن منتظره يتقدم الها حتى لو متزوج عادي يهجمن بيته الى متى ابقى مستضعفة الى متى ابقى خدامه حتي شكلي تعب واحس معندي حيل من التعب جسمي كوله يوجعني اني اسمع الي تتزوج تتغير حياتها للافضل اني عكس العالم حياتي تحولت الى نار كبره...اطلك واعيش حياتي الطلاك مو نهايه العالم..بس شلون بيه مهران..احبه حيل احبه وهو الي فتحت عيوني عليه معرفت غيره احبه وتحملت كولشي حتى احافظ على وجوده بحياتي وحتى ما افاركة رغم مفد يوم غازلني بكلمة حب ..بس اني احبه متعودة اشبكه وانام..متعودة على ريحة جسمه الي انفاسي حافظتها..متعودة اركز بعيونه من يجي واحس بيهن يهونن عليه تعب النهار وطلايبه..متعوده ع لمسته وع هدوءة ورزانته ..يعني اذا طلكني يمكن بعد ما اكدر اشوفه اي المطلكين هاي هيه بعد ميتشافون ..افكر بيه واكول اني ما اكرهه جذب ليش كتله اكرهك..ليش يمكن لان تعبت وردته يطلكني وطبعا ميطلكني اذا جان حاس اني متعلقة بيه واحبه يمكن كلمة اكرهك حسسته بعد ماكو مجال نستمر بس هو كلي يجرالج..وكلي باجر اطلكج يعني صدوك راح يجي ويطلكني لو بس يريد ينهي الموقف..لا..لا يمكن ميطلك صدوك يمكن اني كلامي ويا جان بعصبيه زايدة وكال ادزها لاهلها كم يوم وبعدين اشوف حل ..اووف ما ادري..ما ادري شنو الي راح يصير باجر وشلون حيتصرف..
غمضت عيوني ونمت واخر شي جان بافكاري ملامحة من كتله اكرهك..ونمت وملامحة بقت جوه جفوني ولان بقيت هوايه افكر اكيد تاخرت يله نمت كعدت الصبح على صوت جهال مهدي يلعبون ولكيت ماما مخليه حسوني بحضنها وتوكله بسكت وجاي..وبس كعدت كتلها:
صباح الخير ماما
صباح النور بنيتي شصاير شو مهدي عصبي حيل ودردم لما مل قبل ميطلع..صدوك البارحة رجلج جايبج بيده النا خو ماكو شي
