#قانون_الكرامة
ورودالخالدي
البارت٨
امال::::
وبقه يسولفلي الى ان وصلنا لبيتنا ماما تلكتني شبكتني وهو كعد بالصاله ويه الولد يسولف مهدي وسامر وياسر يردون ياكلوني من العصبيه لان طلعت بدون علمهم بس هو من كعد وياهم وشافوني من جيت من النجف ملامحي تغيرت للافضل سكتو خصوصا من كال:
مو كلتلكم مابيها شي شوفوها مثل الورده بس تحتاج شويه هدوء وراحة الي مرت بيه مو قليل اترجاكم عاملوها على هذا الاساس وهي بطله من اليوم تاكل وتتصرف طبيعي هي وعدتني
ماما كعدت يمي واحسها فرحت من شافتني زينه مهران بقه شويه يمنه وطلع ومن يومها يوميه يجينا بالليل بس ميكعد بالاستقبال لا يجي يكعد يمنا بالصاله ومرات يتعشه عدنا ويبقى ويه الولد يلعب دومنه لو طاولي بس طول ماهو كاعد عينه عليه اشوف بعيونه نفس النظره الحلوة الدافيه الي جنت اشوفها قبل من جنا متزوجين..والي جانت تنسيني مشاكل اهله مؤقتا ... وحسيت مشاعري زادت تجاها اذا جنت احبه قاط واحد هسه احبه مليون اي احسه مهتم بيه اكثر حتى من اهتمامه قبل من جنا عايشين بغرفة وحده وجنت حلاله عينه على كل حركة مني ويوميه يسأل ماما شلونه اكلها شلونها زينه ماما مكيفة بيه وتكولي شوفي شلون ميت عليج ان شاالله تنصلح احوالكم حتى اخواني متوقعين باي لحظه احنا نرجع لبعضنا هالكد متعودو علي جيته يعني مر شهرين ع وفاة ابني وهو مكطع رجله من عدنا حتى جهال ..مهدي وابن سامر يكيفون من يجي لان من جان يكعد بالاستقبال مجانت ماما تخليهم يرحون يمه بس هسه يكعد بالصاله ويلاعبهم ومرات يجيب ويا علاكة حلويات يوزع عليهم..فيحبون جيته نسوان اخوتي هم اتعودن على كعدته بنصنا ويكولن يمكن عن قريب يرجعني رغم اني اهله كارهة عيشتهم بس بعد كل الي مريت بي مستعده ارجعله واتحمل لان احسه..يحبني ..حتى لو ميحجي خليه ليحجي كل تصرفاته تكول هو يحبني لدرجة مفرغ نفسه من المغرب الى ان تصير ساعة ١١لو١٢ ونظرات الحب الي بعيونه تسوه عندي الدنيا اصلا كافي عليه موقفه وياي من جنت بحاله صدمة محد من اهلي كدر يطلعني من هالحاله غيره..رغم هو وضعه مثلي هم اب وكلبه مكسور على ابنه بس جان يتصرف بحكمه اصلا حتى اخواني وماما ميخليهم يحاجوني لو يخوفوني وبقه هالشكل الى ان تحسن وضعي وصرت احسن من قبل شويه بس هم من يطلع ..من بيتنا اني اكعد وحدي وما احب اختلط ويه نسوان اخوتي اخلصها صفنات وسكته بس شغله وحده شاغله وقتي بيها وهي ابن مهدي الجديد كمت من اسمع صوته مدري شيصير بيه احس نفسي ..اني الي هستوني جايبه طفل وصوته من يبجي يبقه باذني لدرجه كلبي يضل يتلهف عليه كمت..اصعد لغرفتهم اخذه من فراشه واشمشم بيه ريحة ركبته تذكرني بحسوني من جان ابن نفاس نفس ريحة جسمه وهالكد متعودت اصعد بالنهار كمت اطلب من امه تخلي عندي بس هي مدري شبيها كلما اخذه وانزل بيه جوه تضل كاعدة يمي الى ان ينام وتاخذه مني يعني متعوفه عندي وتروح كلت يمكن لان زغير متكدر تفاركه.. ومشت الايام طبيعيه هالشكل الى ان جابت مرت يوسف ابن عمي طبعا محد من بيتنا راح الهم لان احنا مو على تواصل عدا مرت سامر راحت الهم ووجبتهم لان مرت يوسف الي هيه اخت ريم بنات خاله مهران اصلا جيران بيت اهل مرت سامر ومعرفة قديمة لهذا راحتلهم من جابت مرته لحد لهنا كولشي عادي وطبيعي الى ان بيوم من الايام جنت مخليه حمودي ابن مهدي بحضني ونام اخذته امه ونست مميته يمي وصعدت كلت خلي اخذها اله بعدها دافيه..بس من صعدت قبل ما ادخل غرفة مهدي سمعتها تسولف هي ومرت سامر:
