بارت 6
و كتله بعد وين ما اشوفك اذا شلت عينك هاي القذرة و حطيتها بعيني
اله اضربك بالنعال ع وجههك
حتى لو ابنص ديوان كله زلم
اني مشيت رافعه راسي
بس امشي صفح و اطوطح
من النزف و الارهاق
رجعت للبيت نمت چفي ع وجههي
يومين بقيت نايمه بالفراش
ذوله الي بالمعمل لا دزوا وراي و لا بحالي
فكرت ارجع للمعهد اقدم ع تعيين
بذيك الفترة جان الراتب تفاليس و محد يقبل بالتعيين
يعني فكريات
بس اني مضطرة
كلت اروح و اقدم تنازلات و امشي روحي منا لمن الله يسهلها
فرحت لرئيس القسم
ظل يركز عليه بالنظر و يسولف سوالف مالها علاقه بالعمل
مثلا وين بيتكم والدج حي شكم واحد بالبيت من يا عشيرة
اني سايرته و ما صديته
كالي قدمي الي طلب خطي
و ارفقي نسخه من الوثيقه بالدرجات بيها تسلسلك الاول
و روحي للشعبه الحزبيه جيبي انتماء للحزب
حتي لو مؤيدة
و اني ارفع توصيه من قبلي ويه الطلب
و تعالي ويه بداية الدوام بالشهر العاشر
و اذا حبيتي تجيين قبل هذا الوقت تعالي كبل الي و ادفعي الباب و تعالي اهلا و سهلا بيك
اني اتشكرت منه
و طلعت من يمه
و ظليت اراقب الموظفات اشلون لابسات و اشلون يتصرفن
كلت اتعلم
المهم
رجعت للبيت غفل مو وقت رجعتي
هذا الحجي محد يدري بيه اني امبطله من المعمل
اي رجعت اتفگدت البنات سارة ماهيه
هاي العمرها 15 سنه
دورت عليها ماكو
صعدت اتخنس للسطح
يا بوويه ياااا بووويه
لكيته حاطة تنكه كالبتها و صاعده عليها
و تسولف من سطح لسطح ويه ابن الجوارين
اني بعده جسمي مو بقوته
رحت الها و جريتها من ضفيرتها و وكعتها بالسطح
ردت اصعد ع التنكه اشوف يا حقير هذا الي يحجي وياها ما كدرت
كمشتها اريد اضربها دفعتني
و زمخت بيه كالت اذا اتمدين ايدك علي اكسرها
و شنو تحجي بوكاحه و امبين من اعيونها ناويه ع شر
انزلتها جوه
كلت ابسطها كدام الباقيات حتى كلهن يتادبن
لان وصلت للعظم
و اذا اتساهل يتيه البيت
نزلتها و طحت بيها دك راشديات
هيه تعض بيه و اني ادك ع ظهرها و راسها
انوب ما احس اله كلهن ملتمات عليه
و طاحن بيه ضرب
من كل الجهات امي
تسحل بهاي تهد ذيك
مرعدننه اني و امي
انوب صياحهن ينسمع لسابع جار
صتن البيت صت
ام الخمس سنوات تبجي و تفرفح
و البقيه ينهشن بيه
صدك و جان تندك الباب
بس شنو دك حيل حيل
امي حسبالها الجوارين فزعوا راحت فتحت الباب
طلع عمي الجبير
دخل علينه و نزع احزامه
و وذرهن اتوذر زوركهن
يدك بيهن و هنه ساكتات بس يبجن بدون صوت
انوب بالكوه خلصناهن منه
خنسن للاسف ناس ما تجي الا بالعين الحمره
اني ما انطيت بيهن و ما حجيت شي قوي عليهن
بس هو من اجه و سمع صوتهن عالي
اتصرف وياهن بهذا التصرف
من راح من عدنه البيت صار هدوء
كل وحده كاعده بفراشها و تتنحب و تبجي
اني هم استغليت خوفهن
كلت الهن بعد طلعه بلايا حجاب ماكو
الطلعه من المدرسة للبيت
ماكو لا منا و لا منا
الي يطلع صوتها لو ترفع حاجبها بعيني او عين امي ادز على عمي اخليه يكسر راسها
الحمد لله برد كلبي
اثاري الابو خيمة
و هاي الوادم تخاف ما تستحي
انوب رحت لوحدة جوارينا تشتغل وياي بالمعمل
ع اساس ازورها و اشم الاخبار
كالت المعمل نزل انتاجه من رحتي و حتى الامور كلش صارت صعبه لان عدهم طلبيات و ميلحكون عليها
اذا تحبين اني اتوسطلج ترجعين
كلت الها لا اني انطردت و الا ينرد اعتباري بالاول
كالت اشلون
كلت الها بالمعمل يعتذر مني كدام كل الي جانوا حاضرين بيوم الصيح عليه
كالت الي اكله و تدللين
صدك يومين اجتني هاي البنيه و كالت اموافق بس بشرط اذا يجي اخبار اله طالعين تفتيش كون تلبسين هاي البدلة
كلت الها اني لو جفن انلف بيه هيج ملابس ما البس
كالت مو كليتنه لا بسينها انعلي الشيطان
كلت الها اني مالي علاقه بيجن بس اني هالشي ع كص ركبتي ميصير
حاولت رادت اايست مني
راحت ثاني يوم اجتني
كالت موافق بس اذا يجي تفتيش تطلعين من المعمل
كالت الها اموافقة
صدك رجعت للمعمل و اعتذر مني
و رجعت للشغل رافعه راسي
و الكل كامت تهابني اكثر و تحسبلي الف حساب
الحمد لله الي يمشي بالدرب الزين الله ما يضيعه
و يخلي راسه مرفوع و عالي
و هاي الحثالات الرخيصه
ايذلون بيهن و مستغلين اجسادهن
و لا احترام و لا كرامه
حتى يغلطون عليهن بالشقه و الميانه التعبانه
ابن عمي شاب و عنده شهادة اهناك الها قيمتها
و هوه خوش ادمي و متربي
كامت البنات الي اهناك هيه تجي تخطبه الها
و ذنيج النسوان لاعابات يعني حوريات بالجمال من اعيون ملونه و من شعر اصفر و من لون بشرة ابيض
ابن عمي منتظرني و صابر و رايدني
ع سنت الله و رسوله
و الايام تمشي و البيت يزود مصرفه و مسؤولياته
امي هم تعبت و اعتمدت عليه
اكثر شي اني شايله المصروف
ظليت بين نارين
نار كلبي و حياتي و مستقبلي ويه ابن عمي
و نار عقلي و امي و اخواتي ذني امانه بركبتي و ما اكدر اعوفهن بهذا الزمن التعبان
حتى ام ابن عمي كامت تلح عليه و ع ابنها
تكول اخاف عليه يغرنه الاجنبيات و يعوف حتى دينه اريده يتزوج
و انتظرج هواي
و امه تدزله رسايل تكله
نور لو تنتظرها بعد 20 سنة حالها ما يتغيير
روح شوف مستقبلك و استخلف الله
بعد سنتين سارة انخطبت هاي الي جانت تسولف من السطوح
و مشت قسمتها و لبنى ما تقبل تكول الا اتزوج عن حب و دا تدرس بالجامعه قسم تاريخ سنة ثانيه
امي صحتها بدت تدهور
و فد يوم وكعت وكعه كلش قوية
مرضت الموت و هم وصتني باخواتي
و امنتهن عندي
و كامت تدعيلي و اتعذرت مني
لكونهن صارن بطريقي و حياتي
و اتبارت الذمه وياي
و ماتت خطيه
لا حجت و لا راحت عمره و لا طلعت و لا اتونست
من الصبر للكبر
و من الضيم للحد
الحمد لله ع كل حال
بعد وفاة امي
بس سارة انزاح مني همها
... يتبع
أنت تقرأ
أم بلا زواج
Short Storyالقصة قصيرة و باللهجة العراقية، تتكلم عن معانات شابة بين ليلة و ضحاها باتت مسؤولة عن رعاية و اعالت امها و خمس اخوات بعد ان توفي والدها بحادث دهس، القصة اجتماعية واقعية
