روايات تستحق القراءة

اجتماعي رومانسي

- الترشيح الثاني -

ازيكم عاملين ايه .. يارب تكونوا بخير وكويسيين 😘💙..

رواية النهاردة سهرتني امبارح جامد لغاية ما خلصت كل الفصول المنشورة ليها، وأنا يستحيل ارشلكم حاجة أنا مقريتهاش قبل كده! الموضوع ده مفيهوش فِصال!

رجعتلي شغفي تاني في حتة الإجتماعي الرومانسي..

والمفاجأة إنها رواية حد من القراء اللي كانوا بيقرولي.. بس أنا شخصيًا متفاجئة مفاجأة مُعتبرة ..

إن بنوتة أول مرة تكتب ومستواها بالسرد ده والقصة بالحبكة والأشخاص دي .. حالة من الإنبهار حقيقي حصلتلي..

تعالوا كده نتكلم بسرعة الرواية دي فيها ايه وايه فكرتها الأساسية..

قصة العمل:

بنت عندها 27 سنة، اصلها من بلد في الأرياف ولكنها نزلت واشتغلت وكملت تعليمها وبقت بنوتة شاطرة جدًا.. بس ازاي وازاي متتجوزش لغاية سن 27، اللي هو دي عنست!! قولًا واحدًا! وكمية افكار من العادات والتقاليد المهببة بستين هِباب ونظرات ليها بقى مقولكوش!! اللي هو واقعية جدًا!

بتناقش فكرة النظر للبنت العملية ونظرة المجتمع الريفي ليها.. ازاي تعيش لواحدها، وازاي بتتعامل مع رجالة، وهي ليه مش عايزة تتجوز!

بس شوفوا بقى باقي اللي الرواية بتناقشه:

- تربية الأطفال والأبناء وتوابع اهمالهم

- العرسان بتوع اليومين دول ولمحة سريعة عنهم خلال موقفين في الرواية

- التعصب الطبقي

- فكرة الصحوبية والزمالة بين الست والراجل

- عدو المرأة هي مرأة زيها بالظبط.. من اكتر من جهة بقى !!

- الفريندزون .. اللي هو بحبك يا بطلتنا، لأ انت صاحبي بس!

- الفرق بين الطبقات ووجهات نظرهم في الحياة

- غدر الإصحاب..

- الإدمان والدوافع المؤدية ليه

- المجتمع الذكوري البحت اللي عايشين فيه!

نيجي بقى على البطل بيقابل البطلة ونوعًا ما بيعدي أيام كده منطقية على ما بيحصل ما بينهم اعجاب .. هو أرمل وعنده ولدين..

لغاية دلوقتي الرواية عاجباني جدًا ومش مصدقة إن دي تجربة واحدة أول مرة تكتب وشايفة ليها مستقبل باهر إن شاء الله والحبكة عجبتني ومفيش بقى استايل الواتباد بتاع الإغتصاب والإجبار والعنف والجو ده نوهااائي.. والسرد بتاعها لطيف أوي ومتأكدة إن على ما الرواية تخلص هنشوف عظمة حقيقية..

لهجة السرد والحوار:

سرد فصحى وحوار عامي..

إن شاء الله تعجبكم..

اسم الرواية : أشواك وحرير

بقلم : نسمة محمد
nesma204

الغلاف من تصميم : غادة عبد الرحمن

عدد الفصول المنشورة : 12 فصل والرواية قيد النشر

ده حساب الكاتبة والرواية بتاعتها

وده الغلاف

ياريت تقروها وتقولولي رأيكم ..

دمتم بخير..💙💙💙