تقابلنا سابقا ولكن..؟ (مكتملة❤️)

P.1♥️

The past~

بيوم من الايام لمن كان عمر نوره ١٤ و جوري ١٠ :

اميره(امهم): *دخلت غرفه بناتها وبدت تصيحهم* يالله صباح خير قوموا تنشطن نونو جوجو يلههه
جوري: ماما شوي تكفين ماشبعت نوم
اميره : ماشبعتي اجل هاه تحسبين مادري عنس انتي والداهيه اختس تطبخون اندومي تالي الليول وتغنون وتترقصون تقل عندكن عرس
نوره:*تفرك عينها وتضحك وتدافع عن اختها * ماما الجوع كافر اخر مره مشيها كنت ميته جوع وصحيت جوري تاكل معي
اميره : ماشاء الله يابناتي على كثر ما تلهطون من النعمه ماتزيدون حبه يله يله قوموا بس مره ثانيه رخوا أصواتكم وانتم تغنون ولا اعزموني بلا قله ادب
جوري : ابشري ماما ههههه
اميره : يله غيروا ملابسكم وانزلن للفطور اليوم بخليكم تطلعون وتتمشون براحتكم بعد ما تحلون واجباتكم *نزلت المطبخ تجهز فطورهم *

*جوري تحمست وقامت تناقز على سريرها وسرير اختها عشان تصحصح *

جوري : حماااس يله قومي بحل كل واجباتي مع الدروس الي ما اخذناها
نوره:*وهي تضحك *خلاص هزيتي الارض وبتكسرين السراير ويجي ابوي يهاوشنا
جوري : *تنقز على سرير اختها * اقول قومي بس

*جت بتقوم نوره بس نقزت جوري على سريرها مره ثانيه وبقوه وتشقلبت نوره وطاحت *

نوره: *بعصبيه * ياااا مانب قايله تعالي والله لاوريس

*جوري تصارخ وتنحاش الحمام *

نوره: افتحي مابضربك
جوري : تخسين وانا اختس
نوره : هين يا جوجو والله ما اتحرك من عند الباب لين تطلعين
جوري : خلاص خلاص اخر مره بالغلط
نوره: يله سامحتك افتحي

*فتحت الباب وقامت تمزح مع جوري وتدغدغها انتقام، مستحيل نوره تضرب اختها او اي احد الا الي يغلط على احد تحبه المهم غسلوا وجيههم و فرشوا اسنانهم ومشطوا شعرهم سوا كالعاده ونزلت نوره وجوري قضت حاجتها اول بعدين لحقت اختها لقيو امهم و ابوهم مجهزين الفطور ويستنونهم*

محمد (ابوهم) :صباح الخيير هلا والله جوجو ونونو

*سلموا على ابوهم و امهم زي اي صباح وافطروا سوا *

جوري : ماما بابا الجو حلو برا ممكن نحل واجباتنا برا بالحديقه
محمد : *التفت على امهم* ها وش رايك نخليهم ؟
نوره : ماما بالله وافقي بنجلس بالحديقه الي قدام البيت بنذاكر ونرجع الاغراض ونلعب مارح نسحب على المذاكره
اميره:وعد ؟ لا تلفن لا يمين ولا يسار تذاكرون وترجعون كتبكم وتطلعن تلعبون
نوره وجوري : *بحماس * ايه ايه وعد والله
محمد: يله كل وحده تغسل صحنها و تتجهز بجيب فرشه تجلسون عليها بوديكم للحديقه وبروح الدوام

*راحوا البنات بعد ما نظفوا المطبخ مع امهم وجابو الاغراض الي يحتاجونها وامهم عطتهم شنطه صغيره فيها عصيرات وحلويات وراحوا وساعدهم ابوهم رتب الفرشه واغراض الدراسه وسلم عليهم ومشا دوامه *

جوري : *تتقلب فوق الفرشه وتتامل الغيوم* الجووو حلوو مقدر اذاكر
نوره : الناس تذاكر اذا الجو الحلو وانتي عكسهم ذاكري ذاكري ترا ماما تشوفنا من الشباك بتزعل مننا
جوري: يويلي صح

———————————————————————-

-زي ما لاحظتوا ببدايه البارت كتبت الماضي طبعا البارت ذا والجايه كلها بتكون عن ماضيهم لانه مهم ويلعب دور مره كبير بالحاضر و المستقبل
-وطبعا لمن اخلص من الماضي بتعرفون

(((عدد الكلمات مناسب ولا لا اذا لا كم تبون لاني كاتبه القصه من الحروب الصليبيه يعني فيه تريليون بارت جاي )))

اتمنى عجبكم البارت❤️