~البارت الرابع
ست مها : هاي بنتك بسبب تصرفاتكم المادري شلونها أثرت عليها بالمدرسة وصديقاتها صاروا يدرون بقهرها من البچي والحزن يلي دايظهر عليها، دير بالك عليها ترى خطيه طفلة صغيرة وهيچي حالها!
چنت حيل متوترة، شراح يصير سمعتها تگول هالكلام لأبويه، وأبويه أهنا صارت عيونه نار ويعيط وأجا لزمني بكل قوته من أيدي
وأني أبچي، وأريد أبعده عني ماأگدر وبهالأثناء هي تباوعلنا ومتدري شتسوي ودخلوا المعلمات والمدير ويباوعون من كثر صراخ أبويه
جرني من أيديه وسحلني لي سيارته حاولوا يساعدوني بس ماكو فايدة شافوه عصبي تركوني وياه
أحياناً أگول ياريت لو حاولوا وياه أو هدوه من عصبيته وأحياناً أگول محد يجيب الهم لنفسه ليش يدخلون نفسهم بشي راح يتعبون من وراه وبالأخص چانوا يشوفوه شلون يعيط وگب نار على معلمتي أوووف
ركبني بسيارته وأني ميتة من الخوف الطريق كله يرزل بيه ويصرخ وأني ساكتة ماادري شحچي
گاعدة بكل هدوء وأفرك أيد بأيد وأباوع عالشارع وشلون يمشي سريع ويرزل بيه وخايفة لا يسوي حادث دنجت وضليت أبچي
شوية ووصلنا
وياريت ماوصلنا وسوينا حادث چان أهون عليه
لزمني من شعري وشمرني بالگاع ودك كتل بيه وأني أصرخ بين أيديه
يابه الله يخليك عوفني وأبچي ومرت أبويه تباوع وتتشمت وتگول أي حيل بيها أضرب أضرب تستاهل
يضرب بيه ويسب أمي
حقيرة أنتِ مثل أمج هيچي چانت صلفة ووقحة شنو يعني أخر عمري تريدين تفضحينا گدام الناس وأني أحاول أبعده عني ماأگدر
سحر:صدگ بنات أخر زمن وممرباية
هي تحچي وهو يضرب وأني بس أبچي أووف أووف
تندمت لأني حچيت وبنفس الوگت تعبت والله تعبت
لشوگت أني أبقى أخبي
گلبي مليان همووم أخخ ياربي طلع وعافني وأني أحچي هالكلام
ياربي شراح يصير بحياتي بعد؟!
تعبت والله تعبت مو كافي أخذت أمي،،يارب لاأعتراض على حكمك بس ساعدني يارب أخخ وأبچي وأنوح من الألم
وطبعاً خيتي رحومة تعبت كلش، شتسويلي مثلاً؟؟
بقيت أسبوع على هالحال
جسمي متكسر وماأگدر أتحرك خطوتين، نفسيتي چانت تحت الصفر مزفته، شهيتي أنسدت وماچنت أكل وياهم بس أگول للرحمة روحي ماعليج مني
أكلي وياهم وأني أكل وحدي ورا ميخلصون وضليت على هالحالة وطبعاً أبويه أصر هو يوصلني، ركبت بسيارته وچنت تعبانة وخايفة منه
خفت يرجع يضربني، الأب يلي يگولون عليه هو الأمان وهو الراحة أني ماشفت منه هالشي بس العذاب والتغليس ويسد الموضوع
بوگتها أتذكر نزل من السيارة وعيط ديري بالج تنزلين رايح أجيب أوراقچ، مالج طبه بعد لهاي المدرسة
غسق:لا يابه فدوه شلون أترك مدرستي
أبو رحمه:أنجبي لتخليني أكطع النعال على راسج بلا هالوكاحة
وبهالأثناء ست مها تباوع عليه شلون أتوسل وتبچي لأن چنا واكفين يم باب المدرسة
أنت تقرأ
هموم قلبي (قصة حقيقية)
Romanceهموم القلب كثيرة بالنسبة لِفتاةٍ مُراهقة، تنجبر على تحمل المسؤولية بوقتٍ مُبكر! تُرى ماذا سيحصل مع هذه الفتاة؟ وما هي نصائحكم لها؟ (قصة حقيقية باللهجة العراقية) ❗ لا تنسون التصويت للبارتات لطفاً. أحبكم كلش هواية رُبـى جمال 🖤
