_ ما تقعد بقا .. ما تتهد بقا يا ابن الخاينة
بصتلها من تحت لفوق وابتسمت وانا بسند على درابزين السلم
_ طنط منيرة أمو شهد دي هتجنني
_ جتك نيلة فيك وفي اختياراتك وفي شهد
_ لا بس حلوة
_ اختياراتك ؟
_ لأ .. شهد
_ اه زيك .. مقرفة
جريت وراها وقفت وشيلت الشنطة
_ عنك يا ست الحسن
_ مش هتبطل بصبصة للستات الي قد أمك يا عمر ؟
_ مش قادر .. بيجري في دمي والله .. قليل الادب اعمل ايه
غمزتلها وانا بسند مرة تانية وبنحني ليها
_ خوديني ربيني وانا موافق اخونك اتنين وخميس
_ لا يواد مضحي
_ اوي .. و اهو اخدهم بريك
شالت الشنطة وهي بتزقني
_ اصطبح وروح افتح ورشتك يا عمر
_ طب اسبقيني انتي
_ ودا ليه ان شاء الله ؟!
_ هصبح على الست رانيا الي في التالت
_ هتصبح عليها ازاي
_ هغير الأنبوبة
سيبتها تمشي وهي بتنفخ وعفاريت الدنيا بتنطط في وشها، ابتسمت وانا براقبها من بعيد داخلة محل الملابس الي قدام ورشة النجارة بتاعتي، اطمنت انها دخلت المحل وطلعت
_ ليلى الحقيني
_ ايه الانوبة انفجرت في الست رانيا ؟
_ يريت دا جوزها
_ ولعت في جوزها يا عمر ؟!!!
_ ولعت في جوزها ايه دا هو الي هيجي يولع في الي خلفوني .. خبيني يا ليلى ابوس ايدك
_ اخبيك فين يا ابن الهبلة
_ ورا اي مانيكان من دول .. كلهم حريم وجامدين
_ حتى المانيكانات مش عاتقهم اعمل فيك ايه .. اسيبه يجي يولع فيك ونخلص
_ لا يا ليلى .. لا يا ليلى وحياة أبوكي يا شيخة انا غلبان وعبيط وامي عارفة
_ طب انزل تحت المكتب ... انزل
_ حاضر حاضر
نزل ووقفت انا ورا المكتب في نفس الدقيقة الي دخل فيها الأستاذ زكريا
_ صباح القمر يا أستاذ زكريا خير منور المحل يعني مش عوايدك
_ هو فين ؟
بلعت ريقي وانا بكتم نفسي
_ هو مين ؟
_ .......
_ في حاجة ؟ .. بتدور على حاجة معينة
_ هو فين ؟!!!!!
تكراره بالنبرة دي خلاني احس اني خلاص هيصلوا صلاة الميت عليا انهردا بلعت ريقي تاني اما هي نزلت الستار بتاعت المكتب بخفة
_ هو مين بس ؟ مش تقولي يا استاذ زكريا يمكن اساعدك
_ الواد ابو الحليوة الي بيرسم على مراتي
_ هو بيرسم على مراتك ؟!!!!
_ البيه طالعلها و قافل عليه باب الشقة و قال ايه بيغيرلها الانبوبة
_ وهو مكنش بيغيرها ؟
_ انتي بتسألينييييي !!!
ضغطت بجزمتها على ايدي، كتمت الوجع وانا بحاول ابعدها من تحت رجليها وسمعتها وهي بتقول بضحكة خفيفة
_ لا هو معداش من هنا .. لكن اما يجي هديك خبر
_ اه يا ريت
_ كله الا الشر .. الي يقرب منه يتقتل على طول
