_ سليم بيه !
ابتسمت بثبات وانا بقلع نضارتي وبعلقها في القميص الي كنت فاتح زرايره الاولى
_ خير يا حج متولى في حاجة
_ ابداً يا سليم بيه خيرك سابق بس هو يعني ....
كنت ماسك الفون وبتابع من عليه اخبار ومش مركز في كلامه الي بيثني بيه عليا وانه مبسوط برجوعي، لكن انتباهي اتشد في اخر جملة
_ البت بنتي متخرجة بقالها بتاع سنتين، بتقدير الحمدلله
_ أممم
_ فسمعت يعني ان .. ان سيادتك ...
رجعت أرفع عيني ناحيته، رفعت حاجبي وأنا مستنيه يكمل
_ انجز يا حج متولي .. عايزها تشتغل مش كدا ؟
_ يعني اكون شاكر لسيادتك
_ تمام .. ابعتها وهم هيحطوها في البوفية
_ بوفية ايه يا بيه ... بقول لمعاليك طالعة بتقدير وشاطرة يعني و....
_ والله شئ جميل .. خلاص احنا نقعدها مكاني تشتغل هي بقا
_ العفو يا بيه
_ بنتك لو عايزة تشتغل في شركة الريحاني يبقى في الوظيفة الي احددها أنا مش حد تاني
_ اكيد
بصتله من تحت لفوق وهو مطاطي راسه
_ ابقى ابعتها والمساعد بتاعي هيتكفل بالباقي
حرك راسه بالموافقة وابتسمت بسخرية وانا بركب العربية وبشغلها
_ قال تقدير قال
*****************************
_ عمر!
رفعت عيني ناحيتها، بلعت ريقي وحاولت أتدارك الموقف
_ صباح الخير يا ليلى
_ صباح النور
قربت وهي بتحط سندوتشات
_ ماما بعتتلك الأكل دا
_ كتر خيرها .. انا فطرت
_ امتا ؟ دا انت نزلت قبل ما انزل
_ مكنش جايلي نوم قومت اشتغل في الورشة
قربت خطوة تانية وهي بتبعد الخشب من قدامي
_ غيرت مكان الورشة ليه يا عمر ؟
_ ابداً .. مرتاح هنا اكتر
اتنهدت وهي بتضغط على عنيها وبترطع تبصلي
_ عمر .. أرجوك متتعاملش معايا بالطريقة دي
_ طريقة ايه ؟
_ انت اكتر حد بيفهمني و بيقدر
_ بيفهمك و بيقدرك !!!!!
وقفت في مكاني وانا ببصلها بعدم تصديق
_ انتي بتقولي ايه ؟ ... انتي عارفة انتي عملتي ايه ؟ .. عارفة يا ليلى سببتيلي ايه ؟!!!
_ عمر .. الي عملته دا كان ليه اسبابه
_ اسباب ايه ؟؟!! ... اسباب ايه الي تخليكي تترمي مع الريحاني .. انتي ناسية دا مين ؟ ناسية جده عمل ايه فينا زمان ؟!!!!
عينيها بدأت تدمع فقربت منها وانا بحاول اتجاوز قلبي وادوس عليه
_ افكرك انا ... جده طلعنا من بيتنا عشان مدفعناش الايتاوة.. بيعنا الي ورانا والي قدامنا عشان نعرف نرجع نعيش تاني، عيشنا مزلولين وعنينا مكسورة سنين لحد ما مات وجه ابنه الي هو ابو خطيبك و زرع الشر في الحارة وبقا تاجر مخدرات وخلى سمعتنا زي الطين واتقبض عليه ومات في السجن وانتي رايحة بمنتهى السلاسة تتخطبي ليه ؟!!!
_ انت مش فاهم حاجة
_ عجبك مش كدا ؟
