ابن الاجاويد

البارت الثالث

ركضت عليه اعيط بابااااا؟؟؟

فتحت باب مخروعه ، صوت امي جفلني بالزايد خلاني ماندل دربي ، فتحت باب على حيلها وطلعت ركض على بابا ..

وكفت مصدومه من منظره ودمه سايح وهو مدد بالارض ، وراسه وشعره احمر ، امي لازمته وتعيط وتصيح بعمي يساعدها ديشيلوو ينقلو للمستشفه ..

طلعت مينا وراي تصرخ ، وتشيل بابا وياهم ، اني من خوفه جمدت بمكاني ، ركضت للبيت اجيب عبا لامي، طلعت اركض وراهم ماخذي للشارع مطلعي عمي مثل خبل يفتر ويصيح ويبجي ..

جوارين طلعو على حسنه ، وصوتنه يتراكضون ، ابن جوارين طلع سياره وكال جيبو يابه جيبو ..

خلا عمي بحظنه وصعد وياه ليوره ، وامي صعدت بصفه تملخ بخدودها عليه ، خلونه اني واخواني بره باب بيتنه ، نتباجه وعالم تفتر علينه وتسال شكو شصار شبي ابوكم شلون دمه ساح ،

شنو تعور لو وكع لو خير شبي استاذ ناظم شجاه ..

ذاك ايكول شبي بعده بشبابه شوكعه ، وهذاك ايكول خطيه زلك بالحديق وانضرب براسه ، وهذا يحجي ويزن براسنه ميستاهل خوش رجال خطيه والنعم منه ومن خلفته ..

احنه بيا حال همه يسالون ، مينا وكعت باب بيت غشيانه وجهه غده كركم ، نوب ملابسها كلها دم ، اني اشهك من رهبه المنظر ودم ، واريد اشيلها مابيه لشتي ترجف كرار بصفي حسه طالع ويانه يسحل بيها وياي ..

طببناها كوه تون من خوف ، دخلتها للطرمه كلها دم ، نوب شفت دم كعدت بالارض ابجي ياايمه دم بابا هذا كله هناا واكع دخيلك ربي ..

جبت صونده اغسل لمينا ، الي حتى حس مالها ، جوارين بصفنه يكعدون بيها ، اندفعت باب الحوش حيل ونركعت ،

لان عمتي جايه بطرك دشداشه ، حتى ملابسه نعال برجلها ، و تعيط نوب شافت دم كالت هيج وكعت فوكانه متخربطه ..

كابلتها ابجي من خوف ، شسوي يااربي ، نسوان شالنها شيل دخلنها للصاله ورجعن علينه اني وميناا ،

فيضنه مي يردنه نصحه ماكوو منظر دم يخوف ، الخديقه والطرمه درب كله دم ، نوب ملابسنه بيها دمه من شلنا فيضنه ..

عمتي كعدت مثل خبله تحجي وتبجي وتسأل وينه ولجن ابوجن وينه ..

اخذه عمي وامي للمستشفه ..

افتر اسها ، يااهو يااعم ولجن ..

عمي جعفر ...

فتحت زيكهاا يايمه ياااياابه هم جعفر شجااب جعفر بهل ليل ولجن ..

شهكه بصدري ماكدر احجي وعالم تسال نوب شكو شصار احجي ، سؤال تكرر هواي ومن كل ناس ..

والاهم نفسي اني كاعده وساكته واحجي شنو صار ، بابا شبي ، مابي شي هسه يرجع استاذ ناظم ..