LORD OF ALL {Ongoing}

CHAPTER - 1 [Unicode]

ဖြောင်း!!

အားပြင်းလှသည့်ရိုက်ချက်တစ်ခုကြောင့်
အရိုက်ခံလိုက်ရသည့် Ianမှာ လည်ထွက်သွား၏။

ချက်ချင်းပူထူသွားသည့် ပါးတစ်ဖက်ကြောင့်
မူးဝေလာသည့်ခေါင်းကို သတိနဲ့ပြန်ထိန်းလိုက်ရင်း အရှေ့မှ စူးရဲစွာစိုက်ကြည့်နေသည့် lordကြောင့် ခေါင်းကိုပြန်မတ်လိုက်ရသည်။
ထိုသို့ကြည့်လိုက်ပါသော်လည်း အရှေ့မှlord၏ ပုံရိပ်သည်ကား သူ့အတွက်ဝေဝါးစွာသာ။

ဖြောင်း!!

ဒုတိယအကြိမ်ထပ်မံကျရောက်လာပြန်သည့်ရိုက်ချက်။

ပထမရိုက်လိုက်သည့် အားထက်ပိုပြင်းသည်မို့သူ့မှာ မခံနိုင်စွာ နောက်သို့ပင် ယိုင်လဲသွားရတော့သည်။

ပုံမှန်ဆိုလျှင် ထိုရိုက်ချက်များကိုငြိမ်သက်စွာခံယူနိုင်သော်လည်း ဒီတစ်ခါကတော့ ထိုသို့မဟုတ်။

တစ်ပတ်လောက်ကြာခဲ့သည့် စစ်ဆင်ရေးကြောင့် သူခြေကုန်လက်ပန်းကျနေသလို အစာရေစာပြတ်လတ်နေသည်မှာလည်း လေးရက်နီးပါးရှိနေခဲ့သောကြောင့်။

ယိုင်နဲ့သွားသည့်ခန္ဓာကိုယ်ကြောင့် အနောက်မှ အဖွဲ့ဝင်များကလှမ်းထိန်းပေးလိုက်ရသည်။

သို့ပါသော်လည်း သူအားတင်းလိုက်ကာ ချက်ချင်းရုန်းထွက်လိုက်ပြီး နာနေသည့်ပါးနှစ်ဖက်ကိုအံကြိတ်လျက် ရပ်မြဲအတိုင်းရပ်လိုက်၏။

သူ့နည်းတူစွာရှေ့မှ lordကလည်း အံကြိတ်ထား၍ မေးရိုးကြီးများတင်းနေသည်မှာ ပေါက်ကွဲမတတ်။

အကြောပြိုင်းပြိုင်းထနေသည့် လက်များကို တင်းနေအောင်ဆုပ်ထားသည်မှာ အချိန်မရွေးပေါက်ကွဲထွက်တော့မည့် မိုင်းဗုံးတစ်လုံးကဲ့သို့။

အသက်ပြင်းပြင်းရှူရင်းမျက်နှာဖြူဖြူထက်
နီရဲနေသည့် အရိပ်အယောင်များလွှမ်းခြုံနေသည်မို့ lord၏ ဒေါသကိုအတိုင်းအဆမဲ့မြင်နေရသည်။

"Lord တကယ်တော့.."

တိတ်ဆိတ်နေသည့်အချိန်
နောက်ပါးမှထွက်လာသည့် အဖွဲ့ဝင်တစ်ယောက်၏စကားသံကြောင့် lordအပါအဝင်အားလုံး၏ အကြည့်များ၊အာရုံများက ထိုအဖွဲ့ဝင်ဆီသို့ ရောက်ရှိသွား၏။