#كحل_عرب
((( بقلم زينب ماجد )))
حلقة_تكميلية
(مروان يسدد دينه )
يزين الضيعت زينك
تذل ومن الثريا تطيح
واحنه رموشنا تشيلك
حلم واگره الجفن والعين
من عزك تلوليك
ولو مو عادتي أشكيلك....
انا الناي البچى على بچاك
والغنى بمواويلك
لـ عريان السيد خلف || 🖤
يوم عيد الأضحى المبارك
في بيت الشيخ سرحان
الساعة ٧ صباحا
دخل سرحان للبيت وهو بيده الكاهي والكيمر ، جاي يحط العلاكة بالمطبخ طلعت هدوة من الحمام ، اندارلها يعايدها : ها عيدج مبارك يهدوة كل عام وانت بخير إن شاءالله الصحة والسلامة وراحة البال
هدوة : وانت بألف خير ان شاءالله من عسنى ربي لا يحرمنا منك ولا من طولك
- الله يحفظج ، ياله كعدي البنيات يحضرونا الريوك خاطر اطلع اعايد الوادم .
- هسه انده ريحانة تكضيلنا الريوك ، الولد يجون ؟
سرحان : خابراني مامون كال اني باجر من الصبح اجيب العايلة واجيكم خاطر نطلع اني وياك للمضيف نعايد .
- ومروان
- ما ادري عنه ، صاله جم يوم لا مخابر ولا شايفين طوله
- ملتهي بشغله الولد الله رازقه وشغله خير من الله .
- غير كون يعقل ويهد سالفة النسوان .. يهدوة كبر وشورابه بان الشيب بيهن وعكل مامش .
- ددعيله وهاذ يوم عيد الله الجبير .. شنريد غير يعيشون بسلامة .
- الله يهدي، يالة كعدي البت خل تحضرنا الريوك .
كامت هدوة وكضت المحجر وهي تصيح على البنات يكعدن وينزلن .. طلع علي من غرفته حب راسها وعايدها وراح يعايد ابوه ، ونزلت ريحانة تعايد بهدوة ، ردفتها : جا نجوى وينها ؟
- تستحي تنزل تعايد ما تحب هيجي
- هديها على راحتها وخلصي الريوك عمة ، يلا يحبيبة
- ان شاءالله عمة
راحت للمطبخ وهدوة مشت يمها تعاونها ، سألتها : عمة ما نروح للنجف ، اليوم عيد اريد اعايد حبوبتي .
- هسه نخلص الريوك .. ونكلل لعليوي هلبت الله يرضى ياخذنا بسويويرته ونزور امي .
- اي والله علوا
جاي يحجن ارتفع صوت مأمون وهو يصيح : هاااااااا شلوووونهم .
صاحت هدوة : هلا ومية هلا .. هلا بالجاي
سبقها علي وتلكاه يسلم عليه ، ونانة ونرجس اجن يسلمن ويعليدنها تقرب مأمون : ها يمة عيدج مبارك وايامج سعيدة أن شاءالله الصحة والسلامة حجية .
هدوة : الله يحفظكم ان شاءالله
مامون : جا ابوي وينه ؟
- بالغرفة
جاي يحجي طلع سرحان صاح مأمون : هلا بالشيخ هلا بهيبتنا ، حجي عيدك مبارك وايامك سعيدة ان شاءالله من العايدين
