#كحل_عرب
(بيت بيوت )((( بقلم زينب ماجد )))
الحلقة_15
( غيرة متأخرة)والمك لمة الخاطر
بالعتاب وانشدك من
عطشتك ليش ما جيت ..؟
لـــِ عريان السيد خلف||🖤مأمون : ظليت صافن بيها وانا عيوني منعسة .. وعيوني تعاين اعلى كتر بيها .
زاد الضوا و الذبان بدا يهجم علينا ..
كعدت اختها الزغيرة صباوي تبجي ومتضايكة .. فزت عمتي ايمان من نومها شالتها وكامت ، انا غمضت عيوني خفيف خاطر لا تهيس علي كاعد .عاينت لبطة طالعة رجليها ، دنجت ردت ثوبها وغطتها بجرجف ومشت ، رديت افتح عيوني وانا ظال اعلى هالحطة .. صار الذبان يهجم ويغوغي على الوجوه .
كمت من مكاني خذيت طرف الجرجف وكعدت يم راس بطة انغمشها وهي تبعد بيدها حسبالها ذبان وانه متبسم اعلى وضعها .
رديت انغمشها ، اتضايكت ودارت ليغاد ..
ظليت الحن واضايكها ليما فزت ، لكتني كاعد فوك راسها : هاي انت واني عبالي ذبانة- اي انا ، كعدي يله
- شنو والله بعدني نعسانة
- جوعان والله نزلي سويلي ريوك
- ذيج هدوة غاد وروح كوللها
- دكومي كومي يلا
- ما اعرف اطبخ شبيك عوفني انام
- حتى لو طماطة مكلاية وجاي يله
- اهييييي مو ذاك بيتكم انتم يومية طايحين على راسي
- ظلي لا تكومين ما اريد
هديتها وكمت ، كامت هي و تكلي : انجب لا تسوي سوالف الزعلان .
وكامت على حيلها .. نزلت كدامي واني وراها ، شعرها اسود مكوش .. وشايلة الثوب باديها منا ومنا وتزل ع الدرج مثل الغزال .عاينت للدوانية عمتي ايمان عالكة المبردة ونايمة ، وصباوي يمها تلعب على المخدات .
فتحت الثلاجة عشتار باب واحد .. الفريز بيها ردة بلاستك .. فكتها وهي ادور : شدورين
- شمدريني اني نعسانة
- مو كتلج بس طماطة
- طماطة ماكو بس بيتنجان و بتيته وجبن عرب هاذ بالجدرية متروس مي .
- تكدرين تكلين بيتنجان وعلي احبه
- اخاف اكلي دروح
- انا اسوي
طلعته و هي تتململ .. اجت صبا جلبت برجلي ، شلتها وانا ابوس بيها والعب وياها : حنجلي بجنجلي صعديت فوق الجبلي .....
خلصت تكشير واجت عمة ايمان : شدا تسوين ماما ؟
بطة : ماما غير هذا يريد بيتنجان من الصبح