#كحل_عرب
(بيت بيوت )
((( بقلم زينب ماجد )))
الحلقة_29
( ياسر في بغداد )
يروحي انوب من تهوين وچدي
لعريان السيد خلف||🖤
بعد ما عرف سرحان ان فخرية متعنية لال منعم وهيج حاجية .. وجان الحجي ما يتجذب كون فعلا نوسة اتطلكت متهومة بس تهمة باطلة و هالشي مو هواي يعرفونه ومو مال يوصل لال منعم ولو وصل فلازم واحد من اهل البيت موصله .
عد ما اجا سرحان و دخل للبيت ، كعد .. اجته فخرية و هي تكله : تصدك بوحدة زعطوطة و تجذبني انا ام بناتك .. تالي تعبي وي بت اخيك هيج اتجازى .
شال راسه و كال الها : هدي وسن اعلى صفحة ال منعم شخذاج الهم يفخرية .
صرخت ولطمت اعلى خدها : ءءءءءء و العباس ما رايحة ليهم انا شعدي اروحن غاد .. و القران ما رايحة ، يتبلون علي .
هز راسه و كال الها : صبرت كل هالسنين تغلطين واعدي و اكول اصبر يسرحان المرة عدك منها بنات ، اتحملها .. وسع صدرك ، بس ليجاي وانا حدي وياج ... ما اطلكنج واطيح بخطية بناتي لجن من اليوم يا فخرية .. تحرمين علي مثل حرمة امي .
حجه هالحجاية و كال الها : ام علي حضري غراضج اخذنج لبغداد .
كام و فخرية كامت تصرخ و تبجي وتتوسل بيه .. ما سمع الها وطلع من البيت كله ، وصى ولده يحضرون نفسهم .
مامون كاله : بويه اطلع كدامنا انا اجيبن نوسة واجي
- اطلع وياي
- لا مو عدي شغل
- شغليش بوية مو من امس وليجاي صكعتوا راسي بالردة لبغداد ، امش .
- فليح اهله ذابينه بالشارع ونوسة تريد تاخذه لبغداد .
وكف وعكد حواجبه : لا يكون حاط ابالك تجيب فليح ابيتي ؟
- لا حشى بوية مو اجيبنه ، بس خوما اهدها تروح وياه عبرية وهي بت زغيرة .
- ووين راح يجي ، اسمع فليح انا ما اريد اشوفنه .
- ما تشوفه .. هي تكول عدي جم فلس اأجر بيهن وادبر وضعي ويا أبوي .
-جا خوش انا اخذ امك و اخيك وامش ، مريوان خليه بكترك لا تفاركه .
- لا ادير بال بويه .
على ما هدوة لمت غريضاتها الحجي وصل لاهلها، واجا ابو فاضل مهرف جيف حرم بته اعليه .. سرحان ما حب يحجي ولا يجاري بالموضوع .. توه حجه رداه : اودعناك عمي لزوم اطلع هسه خاطر اصل كبل الغروب .
صعد علي بالسيارة وكام يصيح على هدوة ..
لبست عبايتها ولحكته و طلع من السماوة كلها .
مامون دخل للبيت و كدام فخرية حاجه وسن : اسمعي البيت بيت عمج وبيت اجدادج مو بيت احد غيرهم .. تنامين وتكعدين وكت اليحلالج ولو احد طخاج رنة تليفون على بيتنا غاد .. ابوي يمج لو واحد من عدنا و المندك بحايطج .. يلاوينه ... فهمتي ؟
