#منقبه_عظيمه
بقلم ايثار كمال 🦋
(٧)
الجزء الاخير ...
_________ نرجع ورا شويه قبل اتصال رودي لي يونس
نون: عشاني ؟
رودي: ياخ الولد دا بحبك ومجنني ومجنن اهلنا كلهم وانت ما حاسا وانا من خلال الصوره فهمت انو ببطل في التدخين عشانك
بكيت شديد وبقيت بفكر اذا حصل ليه حاجه
ماعارفه بس شكلي كنت بحبه و مبينه العكس بس اسي اتأكدت
________
نرجع
اول ما سمعت كلمه مات طوالي اغمى علي
صحيت لقيت يونس في راسي ويحيى قاعد مدنقر ويديه في راسه ورودي حاضناني وتبكي
نون: يحيى مات ي يونس ماات بسببي ؟؟
يونس: بسم الله هدا قدامك هو
وبقى يضربني في خدي
وانا لسه معلقه في انو هو مات لحدي ما رودي ادتني كف حتى وعيت اعتزرت لي
نون: يحيى
يحيى: عيوني
نون: انت كويس عليك الله
يحيى: الحمدلله
كنت متأكده انو ما كويس لانو شكله تعبان شديد رودي مشت عملت اكل وانا قمت اساعدها
لقيت اتبسامتها للضرس
نون: خير مالك
رودي: اخيرا البقره حست مالي ما بتبسسسم
نون: ههههههه طيب سرعه بالله جعانين نحن
رودي: عليك الله اسكتي مني بس
نون: رودي يحيى حيعدي الفتره دي ؟ خيفاه يرجع تاني
رودي: لالا بعد تم اسبوعين تاني ماف مشكله
نون: الحمدلله
امي وخالتو فتون يتصلو ردينا وريناهم اننا قابلنا يحيى خالتو فتون قالت الا تجي واتحركت هي وامي
بعد ساعه كدا وصلو
اول ما شافتو رمت صينيه المكرونه بالبشمل وجاتو جاريه
فتون: كررعلي يا ولدي مالك الوصلك للحاله دي شنو يا ولد
يونس: يا خالتي خليه مدروخ هو
فتون: ماله يا يونس
يونس: بخلي السجاير
فتون اول ما سمعو كدا طوالي في نفس الوقت زغرتوا
عاينا بي استغراب
فتون: دا معناه انو نون عرفت بما انو البت العايزه عندها حساسيه من التدخين وهو بدخن فحتكون عرفت انو هي المقصوده
تاني زغرتوا والاجواء كانت حلوه
بس كنت بعاين ليه وما قادره اخبي دموعي مشيت على الصاله التانيه غتيت وشي وقعدت ابكي
حسيته واقف قدامي
يحيى: خلاص هانت ما تبكي ..
المهم بعد الايام دي تمت كنت خلصت من فستان البت وكان زي ما عايزه بالضبط
...
وعلاقتي مع يحيى كانت يعني عاديه بس احسن من زمان ..
طلعت مشيت على المركز سلمت على الاطفال كلهم واديتهم العاب واتونست شويه وطلعت على البيت
_________
_يحيى
الفتره عدت بسرعه كنت متوقع اني اطول ولا كدا بس عشان صوره نون كانت طوالي قدامي عملت المستحيل عشان ما تضرر
علاقتنا بقت حلوه شديد وكل الناس بقت عارفه بيها
بس مستنيها تخلص امتحانات ونعمل عرس طوالي
__________
_رودي
والله يا خوانا انا كنت مشغوله بالموضوع اكتر من يحيى لمن عرفت حسيت انو جبل وانزاح عني يا داب بقيت شايفه الدنيا حلوه ...
مرت الايام وعديت الامتحانات واتحدد العرس بعد اسبوع
كان فستان الزفاف هديه من اصلاح ولحدي اسي ما عارفه تصميمه كيف رغم انها بتميل اكتر للعبايات بس واثقه منها
توب الجرتق كان هديه من ندي الماسكه التياب كان توب جميل جدا وماما غاده جابت لي الجدله والاكسسريس هديه ..
امي وخالتو جابو لي طقم و خاتم وابوي هو الاتكفل بي عزومه العقد
مشيت اشتريت الشيله ما اشتريت تياب اشتريت فساتين بس وكملت كل حاجاتي
الليله وبكره العقد جات الحنانه حننتني وكنا عاملين حفله للعيله. مافيها ولد غير يونس وانا نادينه عشان نوثق اللحظات وكل ما اعاين ليه ابكي
المهم يوم العقد من الصباح مشيت الكوفير انا وابرار و إسلام وفاطمه اتمكيجت واصلاح جابت لي الفستان كان حاجه كدا خراافيه شكرتها لمن خشمي وجعني المهم
________
_نون
مهما حكيت ليكم احساسي وشعوري ما حقدر لمن تكون بنيت احلامك مع زول حتى لو في فتره بيسطه بس انت راضي تمام الرضا حتكون الفرحه ما سايعاك
صح انو الاقدار بيد الله بس انا حلسا انو قُربي الكان شديد من ربنا هو الوفقني في حياتي واداني الزوج الصالح والراحه والطمأنينه ..
__________
احلى مفاجاه كانت لمن جو داخلين اطفال المركز سلمت عليهم وانا الدموع في عيوني بعد سلمو علي في الكوفير طوالي ودوهم الصاله ...
الرجال عقدو وهو مشي للصالون
_ يحيى
لمن اتزكر انو خلاص البت العايزها خلاص بقت لي بحس نفسي في حلم ..
نون من زمان اتمنيت انو نكون لي بعض وربنا قسم لينا كدا ..
و حاسي اني ما قدمت ليها اي شي بس ان شاء الله ربنا يقدرني واسعدها
_______
_ يونس
كنت قاعد سرحان البيت كيف حيكون من غيرها دموعي نزلت تلقائيا بالجد نون زوله عظيمه لي درجه كدا ما تتخيل وربنا اداها قدر نيتها
(عظيم الله)
بحب نون لانها من صغيره قريبه من ربنا لمن وصلت سنه تامن كانت ختمت القرآن ،، من اولى ثانوي كانت بتلبس عبايات بس لحظي ما وقلت في تالته لي النقاب الزادها حلا وجمال
نون عمرها ما اتجاوز ال23 .. بس في 500 طفل هي مسؤله منه من 3 سنين هي زوله كبيره من تلاته سنين كانت ام لي اطفال ايتام ومشردين علمتهم على الدين وعلى مبدئ (عش لدنياك كانك تعيش ابدا و اعمل لاخرتك كانك تموت غدا )
قلت الكلام دا كله لاني فخووور بيها شديد
ربنا يحفظك يا اختي حبيبتي
_________
_رودي
حا اتخارج من اخوي واختي في نفس اليوم مبسوطه شديد ليهم ولي انو خلاص حتبقى حقتو وحيبقى حقها ربنا يديم المحبه بينكم
_________
_فاتن
بتي الوحيده الليه عروس الحمدلله مطمنه لانها مع يحيى ويحيى راجل وما حيقصر منها
_________
_محمد
بتي الخدمتنا وبرتنا وقدمت لينا كل حاجه الليله يوم فرحها من صغيره رفعت راسي ان شاء الله دايما فخور بيها
_________
....
بعد لبست الفستان خلاص جا يحيى سلم على وكانو البنات بزغرتو
يحيى: ماشاء الله تبارك الرحمن احسن الخالقين
وغطيت وشي بي نقاب كدا وصحباتي سايقني عشان اصحابو برا وكدا
المهم
وصلنا الصاله كانو اطفالي منتظرننا وكانت الصاله بنات بس فطوالي رفعو لي النقاب ومشينا قعدنا كانت بي موسيقى هاديه يعني بعدها جو الاطفال يرقصو معاي رقصت معاهم شويه ...
بعدها غيرت للجرتق وجينا قعدنا بعد الجرتق خلص سلمت على امي وابوي وبكيت معاهم
اما يونس ماكنت قادره اسلم عليك عديل
حضنته شديد وقلت ليه عارفني بحبك قدر شنو كنت لي احسن اخو في الدنيا ودايما كنت معاي ربنا ما يحرمني منك يا حبيبي
يونس: ولا منك يا حبيبتنا
وبعدها طلعنا
يحيى_
'' عشقتك يا ذات النقاب لانك مختلفه عن غيرك ،، مختلفه في كل شي فأنت واحده ليس منك ثاني ،،
يحيى...
#الخلاصه
-ما اي بت منقبه كعبه شوفو اقرب مثال نون وانا متاكده انو في كتير زيها
-الاخوان مهما كانو خيضلو هم سندك ومصدر قوتك
-الزول البحبك ممكن يضحي بحياتو عشانك او حتى عشان يشوف بسمه منك
- الوالدين هم حلاوه دنيانا
-ولمن تكون عندك عزيمه بتعمل الحاجه مهما كانت صعبه
* الروايه إهداء لذات النقاب (نون_علي)
تحيه لكل المنقبات
بحبكم شديد انا
#منقبه_عظيمه
#ايثار_كمال
#النهايه
