أهات تحرير العراق.

الحلقة 29 (ختامها مسك)

اهات تحرير العراق الحلقه ٢٩ ( ختامها مسك)

‏يا هني
و يا شوگ روحي
و يا عزيز
و يا مزار يطفح بچفي حنيني
و من حنيني إعليك اغار

عريان السيد خلف⁩

______________________________________

صافنه واني اغسل المواعين مال الحنه وهوسة الكيك 

واجاني صوته وهو يكول : اشبيها مريتي صافنه 

ابتسمت وجاوبته: صدمتني زينب ماجان مبين عليها تحب محمد هلكد

هز راسه وجاوب: من أول ماحطوا بالمنطقه واخوي مات عليها جان يكوم ويكعد يسوالف بيها عشكها حيل بس الحمدلله والشكرر الله يرحمه ان شاء الله

هزيت راسي وكتله : يعني لو هيه الميته هم يسوي هيج هو

_ نرجس مرة من المرات طلع من البيت وشاف اخوها اخذها للطبيب رجع اتخربط عليها وكع من طوله وهو يكول بيه ولا بيها جان يحبها حيل ولو هيه الميته جان دفن روحه يمهاا 

_ الهدرجه واصلين بالحب 

_ ايي يعني ع سبيل المثال اكو ناس صاير عدهم انهيار عصبي عليه ومتخربطين

_ ياااا ياهل كالك

_ مو مهم ياهل كالي المهم عرفت

لزمني من ايدي وكعدني ع الكرسي المقابيلي 

وكال : نرجستي انتي مو بس مرتي وهاي هيه لا والله انا احبج واموت عليج وعندي انتي بالدنيا كلها 

ابتسمت وكتله: وانا هم اموت عليك والله  ..

_____________________________________

اغاديرر:

اليوم العرس مالتي التوتر يقره الف وكلبي يدك حيل خايف كلش رغم معتزز يحبني ومشتريني بس هم بعدني خايفه  .

خايفه يرجعون يزوجونه بت عمه وانا يعوفني صدك ماشفت بت عمه بالعقد يله هسه هيه ياهيه فد مندله
وكفت كدام المرايه واني اعدل بشعري وكلتت بكل ثقه

_مستحيل يعوفني علمود وحده اكو واحد اثول يعوف هالجمال كله علمود يشوف غيري ؟

ردت ورود : يا ستار يالله اجتج الحاله شنو اشبيج 

_ اي اجتني

عدلت شعري ام الصالون وخليت مكياج وردي وتسريحه بسيطه ماحب الهوسه اما ورود فه جان مكياجها شوية ثكيل بس طلعتت جمال 

_ وكفت بفستاني الابيض الي الصدر مالته كيبور ويصير نص ردن وضيك من الصدر وكلش كلوش من جوه وانا اباوع ع ملامحي وشكلي بنضره رضى وابتسم فرحانه بشكلي

اغادير : راح يعجبه شكلي متاكده اصلا هو يحبني ياترى شلون حتكون حياتي وياه ؟

حجت نرجس وهو مبتسمه :الشاغل بالج يتهنى 

_اي يتهنى وحيد امه ههههههه

كملنه كلشي وطلعنه للبيت جان احله يوم بحياتي اهله واهلي وابوه ماخله شي ماسوه واسعد سندنه جان دورة او وجوده كلشش حلو بحياتنه

دنكت واني خجلنه 

اسعد : جنت اكول ماعندي خوات بس اثنين وحده مات وحده يم رجلها بس هسه لا غيرت رايي من زمان عندي ٧ اثنين من امي وخمسه اجن هديه من ربي اليوم احس اديت الي عليه واني ادري كلي تقصير من ساسي الراسي ولو بيدي ازرعلجن الكاع ورد هم ماقصر 

ام نرجس : الله شاهد ما قصرت يبعد عمتك دللتهن وحطيتهن ع راسك

_ ابتسم وكال

يدللون العلويات.  نرجس جيبلي الهدايا

ركضت نرجس ورجعت وجان بيدها علاكتين 

طلع العلبه الاولى وفتحها عبارة عن تخم ذهب فخم ونازك...

_ هاي هديتي وهدية نرجس الج خوية ان شاء الله الف مبرروك

جاوبت : الله يبارك بيك خويه 

ورجع طلع علبه ثانيه 
وانطاها الورود وهم كللها مبروك 

____________________________________

معتز

واكف ابابهم وهوسة الزفه براسي مرتضى متخبل من الفرح يحتار شيسوي لو شلون يعبر عن فرحةة

دخلت للبيت  وتلكاني اسعد بالباب لزمني من ايدي وكال

_ ماوصيك بعد ع العلوية يتيمه وجدها رسول الله هالله هالله بيها

اشرت ع عيوني وكلت: اذا ماتكفيها عيوني يوسعها كلبي

ابتسم وصاح من باب الاستقبال وصل معتزز سون درب ....

ونفس الطريق دخل مرتضى بهوسته وضحكته الشاكه حلكه وصل يم اسعد باوعله وكال

_قبل لا توصينيي وعلي ادير بالي عليهاا

_ ههههههه شجاك يخوي ....

هالاحداث دارت ب٢٠١٥

حاليا ب٢٠٢٢ ...

اسعد صار عنده طفل وعنده سجاد وافراح ونوب زين العابدين 

ومعتز صار عنده نور الزهراء .. ابنيه 

ومرتضى توم صاروا عنده ولد اثنين
علي وعمر ....

رغم هواي صارت مشاكل بس ولا واحد منهم مد ايده ع مرته . وهالشي سمعته من البنات ومن الشباب علاقتهم كلشش حلوة الله يحفظهم

_________________________________

*الروايه وطريقه السرد ابتدائيه كلشش يعني هاي بدايتي لا أكثر ولا أقل شي طبيعي تكون ضعيفه 

* طريقه الكتابه جانت ع ذوق اغادير ونرجس  + ماحبوا اطول بيها وتكون بسيطه وحته لو ماجابت مشاهدات همه من يقروها ويتذكرون احداث حياتهم كلشش كافي

* بالبداية جنت مامقتنعه وجان ع بالي احذفها بس كلت خليها كل انسان واله بداية وهاي بدايتي 

__________________________________

لم تعد للقصه بقايا ...
اشوفكم بروايه جديدة ..
لا تنسون اضيفون حسابي..

صفا محمد