بــاچـر آحلى :-)

القصـة الأَولى : أُم قاسم ♥️

#بـاچـر _آحلى
#أُم _ قاسم
#بِـقلم _ توفـا _العاني

  ...     ...     ...     ...     ...     ...     ...     ...        

بِـ سنـة 2022 ..
اول يوم بـ عيـد الفطر ..
كاعدة على جربايتي بعد ما انحرمت من الگعدة بالكاع بسبب رُكَبي ..

كاعدة ودايـر مدايري البقى من ولدي وبناتي
والـ 50 حفيد وبيهـم المتزوجين وعدهم اولاد ..
أحمد رَبّــيٌ اللي صبرني ع كل مُر ولوعة ضكتها
وخلاني اربيهم احسن تربية واوفرلهم اليحتاجوه
المـا كبروا وشفتهم بأحسن حال !

اخذتني موجة الذكريات لـ ذاك اليـوم البتدأت بي
معـاناتي وتحملي مسؤولية يمكن بيوم كلت
انو هيه فوك طاقتي لكني ايقنت انه
( لٱ يُكَلفُ •اللّـُہ̣̥ نَفـسـاً إِلا وِسعَـها )

( قبل 45 سنة تقريباً .. )

بـ أخر يوم الفاتحة ودعت اخر شخص بقى
واللي هـو أَخويـة ..

سديت الباب وقفلته زيـن ومرتين ارجع اتـأكد من
إنـو هو مقفول بـإحكـام ..

رغـم ولدي كبار ويمي بس راح الآمـان ويه صاحبه
بس وجود نَفَسه يمي بالبيت جان يحسسني
بأمـان وطمأنينة ..

مسحت دموعي ودخلت باوعت على أولادي
نايميـن بالگاع ناس يم نـاس حتى يدفون  ..
13 طفل شلون راح أَگدر اعيشهم وألبي متطلباتهم بعد ما راح ابوهم ..

أعمارهم من 20 الى اصغر واحد عمره شهرين ..
ااخ يا دنيه خليتي حملي ثگيـل من أخذتي زلمتي ..
جان معيشني ملكة ما يوم خلاني اعتاز احد ..

كولشي مابي صلى العصر وكال سويلي جاي وراح اتمدد ..

صحت على بنتي الجبيرة  " سناء "
: ولج خدري جاي لأبوج بين ما اخبزلي جم گرصة خبز هو يحبها محمصة ويه الجاي ..

خبَزت گرصتين ع السريع وحطيتها بصينية
وكلت لسناء اتكمل خبز بين ما اوديها لأبوها ..

صبيت الجاي واخذته اله ويه الخبز ..
شفته غفيـان صحتله
: يله أبو قاسم الجاي صار ..
أبو قاسم ؟؟! ماكو جواب .. أبو قاسم ؟!
هزيته ماا يرد !! صرخت لااااااااا

على صوتي اجو قاسم وجاسم ولدي
كعدوا كل واحد من جهة ..

قاسم : يمه شبي ابوية ؟ 

جاسم : ليش تبجين يوووم ؟

حاولت اكوم اوكف مكدرت حيلي بااد رجليه ميعنني حطيت ايدي على مَتون ولدي واستندت
عليهم وگمت وكفت .. بهالحركة عرفت ابو قاسم
ما راح الا وهو متأكد اكو من راح يسندني بمكانه
قويت نفسي ورحت جبت شرشف وغطيته ..

صاح جاسم : لييييش يمة ..

انفجر قاسم بالبجي وهي يصيح يابه كووم ..

سحبته ووگفته كبالي لزمته من وجهه
مسحت دموعه بأصابعي

وكتله : اسمعني يووم ابوك هذا يومه مابيدنه شي  تدري ليش راح
راح لأن يدري وراه زلمة حيسد مكانه وميخلينه نعتـاز احد .. ابوك خلفك لهذا اليوم روح خبر
عمامك وتعال گوم بواجبه والزم فاتحته
خلي الناس تكول الخلف ما مـات ..