بــاچـر آحلى :-)

القصة الثالثة : ضَحـآيـا ..

#بـاچـر _آحلى
#ضَـحآيـا
#بِـقلم _ توفـا _العاني

… … … … … … … … … … … … … … … …

مرام :

العائلة معنـاهـا الحُب والحنـان، الأَمـان والإطمئنـان ..

بس آني هاي الأَشيـاء ڪلهـا ما أمتلڪها ،
لأن ما أمتلك عائلة متڪافئة مثل باقي النـاس ..

عُمري 6 سنوات من إنفصلوا أبوية وأمي وهاي
الست سنوات عشتها بِـ رعب من گد ما جانوا يتعاركون ويتصايحون ..

ڪنا سبع أَطفـال وبنفس الوقت ڪنا سبع ضحايا !!
ضحايا زواج فاشل وأُسرة ما بيهـا أي أُلفة ومحبة ..

رغم ماما وبابا واحد يـڪره الثاني بس ما أَعرف ليش جابونـا للدنيـا ومآ طلعوا من حگنـا ..

لمن إنفصلوا الخمسة الڪبار بقينـا ويه بابا ..
واخواني الأثنين الصغـار اخذتهم ماما لأن ڪانوا رُضع بعدهم ..

ومن هنـا بدأت معانآتي صح ماما مڪانت تهتـم بينـا ذاك الإهتمام بس أَحسن من الماڪو !!!

جنت آني ترتيبي الثانية بعد أَخوية وبعدي أخ الخ وبنات اثنين .. ( ولد ، بنت ، ولد ، بنت ، بنت)

وبنت وولد تؤام اللي اخذتهم ماما وياها ..

شگد ما بابا حاول يعوضنـا بس ما گدر
ڪان شغله بس حطلنه غدا حطلنه عشا اللي اغلبة جاهز من المطعم لاا يشوفنا شمحتاجين ولا يسألنا شنريد ..

ولا عمة ولا خالة ڪلهم ما إلهم خلگنـا مثل ما جنت اسمعهم يگولون لبابا من يطلب منهم شيء
يخصنـا .. 

بابا حاول يتزوج بس منو ترضى بمطلق وعنده 5 جهال ..

بعدهـا ما لگيت حل غير إنـو آني بنفسي أسد النقص الأحتاجه آني واخواني ..

صرتلهم وصرت لنفسي أُم وأَب بنفس الوقت ..

إتخيلوا ، إتخيلوا طفلة عمرها 6 سنوات تسبح بنفسها وتسبح إخوانها وتمشطلهم وتغسل هدوم
وڪلشي ..

صح جان شغلي مو بالڪفاءة المطلوبة بس شسوي قابل يقتلنـا الوسخ !!!

جان شعري على طول ظهري يوصل بس للأسف مجنت أكدر امشطه وكام يعثگ ويضوجني
فَـ بابا عساس لكه حل زين وهو إنو يگصه الي
وگصه بڪل برود وشمره بالتنور واني بقيت لثاني يوم بفراشي ابجي ..

ابچي بس محد يهتملي محد يگول شبيج ؟!
شنو اليوجعج ، المضوجج ..

هاي ڪلها لازم امك لو ابوك يسألوها الك بس
لا عندي ام اتحملت ابوية وبقت لخاطرنـا ..

ولا اب اللي قلل مشاكل واحتوى امي علمودنـا ..

دخلت المدرسة و زاد همي من تنمر الطلاب عليه والكل يدري ابوية وامي منفصلين فيعيبون عليه وعلى ملابسي الوسخة رغم جنت اغسلها بس غسل طفلة وتعرفون ..