ازقة الموت
البارت 46
-راح اروح ااا اسبح اجي اريد الكاج نايمه
الوووو تره اذا لگيتج كاعده
سكت باوعت عليه ورفعت حاجبي اي بلله شتسوي
ابتسم وگال وهو يباوع بعيني
اعاقبج
ضحكت بأستهزاء تعاقبني
اي اعاقبج لعد شعبالج
شلون بلله تعاقبني
تقرب بخطواته وگال
الووووو بطلي وكاحه وغمزلي
ودار وجهه وراح للجربايه اخذ ملابسه وخلاهن على جتفه وطلع من الغرفه
بقيت اباوع عليه وابتسم فجأه راحت الابتسامه وملامحي تغيرت بيهه حزن صارت
شبيج يا ميسم
ليش هلگد تذوبين گدامه وگلبج تنسمع دگاته
وهو واضح فاضحج ويلعب باعصابج
ليش والشنو تريد توصل وطبان
ساعه تبعدني وساعه تحسسني باهتمامك شتريد مني
اتمنى اواجهه بانفصامه
خبلني نظراته تختلف عن اللسانه
شخصيه عجيبه غريبه غامض بشكل مو طبيعي
يمكن غموضه هو الي يخليني انجذب اله
رحت طبكت الباب مال غرفه ورجعت كعدت على الجربايه الي بيهه امنيه
بقيت ابتسم واباوع عليهه جانت نايمه مثل الملاك دنكت شمشمتهه وبستهه
ميهلي اعوفهه بس اخاف صغيرونه اخاف اخنكهه
اتذكر مره من گرليب بيبي گالوا منومه طفلهه يمهه بعد ممرضعته وكعدوت الصبح لكوه ميت
اخاف عليهه من كلشي لو بيدي اخليهه بگلبي
رحت نمت على الجربايه مال خزعل وبقيت عيني عليهه
مكدرت اغفه الخوف مسيطر عليه
اخر شي رحت جبتهه يمي نمت على طارف الجربايه كلش ومتغطيت بس غطيتهه گلت خاف تختنك من الغطه
بقيت اباوع عليهه الحد ما غفيت
جنت نايمه ونومتي عميقه كمت اسمع صوتهه تبجي ابتسمت واني نايمه
امنيه حبيبتي فتحت عيني
باوعت الجربايه بيهه حضينتهه ومتروسه دم
انصدمت خليت ايدي على الدم وشلت الحضينه
امنيه امنيه وكمت اصرخ حسيت حنجرتي كامت توجعني
رأساً كعدت على حيلي باوعت على ايدي ماكو الحضينه
وماكو الدم وعلى نفس صوتي اصرخ وابجي
درت وجهي لكيتهه موجوده وعرفت اني جنت احلم بس ابد محسيته حلم الدرجة بلعومي حسيته مشحوط
كبل شلتهه وكمت من الجربايه وحضنتهه وابجي
واخذ نفس عالي
يارب يارب دخيلك يارب ساعدني حسيت جسمي
كله يرجف
جنت خايفه من الحلم احس بعدني بصدمته
كمت بسرعه من الجربايه واني مرتبكه واحس ريجي يابس
فتحت الباب
