I am being engaged to my enemy

Part 6

Part 6

Pink ရဲ့မွေးနေ့ပွဲအပြီးမှာ သူနဲ့ Dew တို့စကားများကြသေးသည်။ စကားများသည်ဆိုပေမယ့် သူကချည်း Dew ကို ရန်ရှာတယ်ဆိုရင်ပိုမှန်မည်။ Dew က နဂိုကတည်းက သူ့ကိုသည်းခံပေးတတ်သည့် သူငယ်ချင်းမို့ သူနဲအပြိုင်ရန်တွေ့တာမျိုးသိပ်မရှိ။

အခုကိစ္စမှာ သူမဘက်ကထိန်ချန်ထားသလိုဖြစ်ခဲ့လို့ဆိုပြီး Dew ဘက်က သူစိတ်ကျေနပ်အောင် ချော့ခဲ့တာမို့ သူလည်း စိတ်ကြာကြာမဆိုးဖြစ်တော့။

သူမပြောပြတာက သူမအဘိုးက Pink နဲ့သူမအကိုကို နေရာချပေးဖို့ဆန္ဒရှိနေကြောင်းနဲ့ သူမအကိုကတော့ Pink ကိုသိပ်စိတ်ဝင်စားပုံမပြကြောင်းပြောသည်။

ဟွန်း စိတ်မဝင်စားလို့ပဲ ဟိုကောင်မလေးက သူ့ကိုဖက်မနမ်းရုံတမယ်လုပ်နေတာကို ခံနေတာ၊ စိတ်များဝင်စားရင် တစ်ခါတည်းများ ညားမလားမသိချေ။ ဘယ်လောက်ပဲ ထိုလူကြီးကစိတ်မဝင်စားဘူးထားအုံးတော့၊ လူကြီးတွေကဖြစ်စေချင်လို့ စီမံပေးတယ်ဆိုပါရင် အဲဒီလူကြီးက ငြင်းနိုင်ပါမလား။

ပြီးတော့ Pink ကရော၊ အဲဒီလူနဲ့ယှဉ်ရင် သူ့ကိုရွေးချယ်ပါ့မလား။ Dew တို့မိသားစုက ဘယ်လောက်ကြွယ်ဝချမ်းသာပြီး အင်အားကြီးမားတဲ့မိသားစုလဲဆိုတာ သူမသိတာမဟုတ်။

ဒီလူဟာ သူမအကိုသာဆိုရင် အဲဒီလုပ်ငန်းစုကြီးရဲ့ အမွေဆက်ဆံသူတစ်ယောက်ဆိုတာ သူအလိုလို သဘောပေါက်နားလည်ရပြီဖြစ်သည်။ ဒါဆိုရင် Pink က ဘာလို့ ဒီလူ့ကိုမျက်နှာချိုနေရသလဲဆိုတာ မေးခွန်းထုတ်စရာမလိုတော့။

ဒီပြိုင်ပွဲမှာ သူကမပြိုင်ပဲ အလိုလိုအရှုံးသမားနေရာကိုရောက်သွားပြီဆိုတဲ့အဓိပ္ပါယ်ပဲမဟုတ်လား။

လူကုံထံအသိုင်းအဝိုင်းတွေကို သူတကယ်ပဲမနှစ်မြို့လိုက်တာ။ မနှစ်မြို့ဆုံးက သူ့ပြိုင်ဘက်အဖြစ်ပေါ်လာတဲ့ Dew ရဲ့အကိုဖြစ်သူဆိုသူကိုပင်။

ချမ်းသာကြွယ်ဝမှုချင်းမယှဉ်နိုင်သလို ရုပ်ရည်ချင်းကရော၊ ဟိုက မင်းသားတစ်ယောက်လို ခန့်ညားကြည့်ကောင်းနေသူ၊ သူကတော့ အဆောင်အယောင်တွေမရှိသလို ရုပ်ရည်ကလဲ သာမာန်လိုပင်၊ အသားကလည်းညိုနေသေးသည်။