رواية يامنة شكوون كان يقول فؤاد من بدايته يوصل لهاد المواصل الي وصل ليها ..من بعد ما كنتي تتشوف فيه النضرة الغااامضة الي متعرف ليها ساس من راس ...متعرف واش فرحان مقلق معصب ...حتى كيوصل ويعطيك ردة الفعل بلا متحسب ليها حساب ...الان وهو سايق ومركز فطريق بنضرة دااافية لامعة كتبين انه حس بالدفئ الاسري انه مسؤل على اسرة صغيرة داكشي الي تمناه باه فيه انه يتحمل مسؤلية ويحسب حساب لحياته كان ف انه يزوجه ببنت عمه ماشي عاهد مع خوه وانما حتى انه يربح تحدي بينه وبين نفسو فانه يخليه لما اصبح عليه الان وبذات فهاد اللحضة ....
في طريق افران وصل لواحد البلاكة وضار على ليسر خذا طريق البيست الي كتدي لواحد الغابة لداخل ...بالضبط كان قدام المطعم الي كان كيجي ليه فينما جا من روسيا لابد ميقوم ليه بزيارة ...من اخر زيارة ليه هو ويامنة عندو مبقاش رجع لعندو بحيث تراكمات عليه المشاكل من وراها واحدة تلو الاخرى ...فكان اللقاء اليوم بعد مدة طوييييلة ليه .... بلاصا السيارة قدام المطعم ...كيف خرج عند الباب لقاه خارج كيمسح فايديه بواحد من الكواغط الي كيحطو تما لا بغاو يلفو بيه شي حاجة اكلة ولا يمسحو بيه لايدين من الما ...جاه الخبر من الولد الي عندو ... الحاج : انا تنقول مال القهوة نورات ليا ليوم ... فؤاد "تمشا لعندو كيسوس فايديه جاي غير بسورفيت كحلة صيفية ...قرب لعندو باس ليه راسو وايدو " : بنورك الحاج بنورك ... الحاج : زيارة ولا اخذ ورد ولا شي غذا معتبر ... فؤاد "استقرو عند واحد طابلة ...جمع ايديه وقفهم تحت ذقنو " : جاي نعرض عليك ...ونوفي نذرك الي نذرتي شحال هادي ... الحاج "عيط على الولد وصاه على قهوة نص نص لفؤاد بلا سكار وليه تاهو " : انا ناذر تزوج ودير تريكة ونحسن ليك لولدك فالعقيقة ديالو ... فؤاد : كمل .... الحاج : زواج تزوجتيه وباركت ليك فاش جبتي المراة ديالك هنا ... فؤاد : ايه ... الحاج : ايوى بقا غير ولدك البكر الي نذرت نحسن ليه فعقيقتو "حبس تااا حبس وهز فيه عينيه وهو يطلق ضحكة من القلب كتعبر على فرحته " ....امبااارك ومسعود هي تزادو دراري ... فؤاد : البكر شرّف ولبارح ... مشعرش الحاج بديك الفرحة ناض باس ليه راسو لفؤاد الي حشم منو وباس ليه ايدو ... الحاج : الله اكبر الله اكبر ...الله يكبر فعزك ويكبر على طاعة الله ... فؤاد : امين ... الحاج : ايه واش سماه الله عند دبيحة ... فؤاد : دبيحة سمينا الله عند دبيح ونادينا باسم ياسين ... الحاج "تكااا عالكرسي ضاحك وفرحان جاب ليه الولد طلب حطو ومشا " : الفرحة هي هادي مبارك ومسعود ...الحسانة على حسابي ... فؤاد : داكشي علاش جيت نتا الي غاتحسن ليه وغاتحضر لطهارته توقف عليه وتكمل تالسبوع ديالو الي فيه صدقة وان شاء الله عارضين عليك لعرس خويا يوسف ... الحاج : الله ...هلت الافراح والمسرات والله يجعلها دايمة ان شاء الله ...على راسي وعينيا انا موجود لولد ياسين بكر ال رمسيس ومبارك مدار يوسف الله يجعل كلشي مبارك ومسعود ... فؤاد : اللهم امين ...هاني وفيت نذرك ومرحبا بيك ...قبل منمشي لهيه من هنا لشي جوج سيمانات ... الحاج"جمع الضحكة " : تاني راجع لديك البلاد ... فؤاد "رشف من فهوته وقال " : ماشي كيف كنت شهر تما وشهرين هنا ولا شهرين تما وستة شهور هنا ...غير نخدم خدمتي ديال ضومين الي قاري عليه وغانجي هنا ...ولكن تما تايكبر دري شوي عاد نبدا نجيبو معايا ...تايدير ديك تلت سنين ونرجعو بمرة يكبر هنا ...وانا نبقا نمشي ونجي عندهم ...وهادي هي الحياة ... الحاج : كنعرفك راجل كيبغي يخدم ويدمر وعزيز عليه الكرفي ويحسبو ليه ناس حساب ...الى رجعتي هنا شنو غادير اولدي من غير خدمتك هنا .... فؤاد : الخدمة هي الخدمة الحاج غادب نرجع لفين حبست فاللول ...نرجع لرزقي الي حطيت هنا والي كبروه خوتي والي رزقهم تاهما ويمكن كتر مني فيه هما الي كبروه ووصلوه لفين وصل دابا ...انا معليا غير نرجع لمنصب ديالي لول... الحاج : الشركة ؟ فؤاد "هز عينيه وشاف قدامو وقال " : رئيس مجلس ادارة شركة ال رمسيس ... الحاج : اللهم يسر ... الي مفهموش غايبقا يمشي لروسيا يدير بداكشي الي تافق معاهم فيه فالمافيا والي مغانعاودوش حيث تقال شحال من مرة وغايرجع يقابل شركته فينما كانت شي صفقة يعاونهم بالمعلومات ويرجع ...لان المافيا مستحيل يخرج منها وبهاكا مامن حياته وحياة عائلته ... تجمعو العيالات فالصالون الي عارضين عليهم ...الي جات لابسة ومانتكة والي جات مصايبة ومعاها بنتها تاهي مصايبة كانو غير قلالات ماشي بزاف حيث غير تحناك هذا وتحناك الي معرفوش فهو الي غادي نشرحو ليكم دابا والي غادي تقراوه ( طبعا غانمشي على حسب المنطقة الي عايشة فيها والي منها يامنة نيت ههههه ) .... زينة : واجد بركوكش ابنتي ... نجود : واجد الحاجة هاهي كريمة والبنات شوي ويجيبوه ... يامنة "طلات على ولدها لقاتو هاد ساعة راه مكرشخ بنعاس " ... راوية "شافتو تاهي " : وااع على تخنزيرة هادي ماشي فحال ديال فؤاد ... يسرى : كيبان حاقد من دابا نهههه .. سارة : توحمتي على باه ايامنة ... يامنة : هههه هو الي كان كيبان ليا وكان داير ليا الخاطر مسكين ... راوية : وييييينو يانا على ناس الي تشكرو رجالهم نعماااس ... يامنة : ههههه واشنو ...غير ناملو ونبداو موصيني نعيط ليه بغا يشوف كيفاش غايدوز داكشي محاضرش ليه من صغرو ف تحناك الياس وراوية ... راوية : انا حنكتني ماما نجود ... على سيرة نجود جات هي وكريمة والبنات من بعد ممشات شافتهم حتى تمو جايين حطو فجوج طبالي مجموعين عليهم تا من الي طيبو عيطو ليهم ياكلو معاهم ...ضربو ديك القصرية ديال بركوكش حتى خوات من غير طابلة الي فيها يامنة وصاوهم يخليو شوية او بالاحرى يامنة الي تخلي شوية قدامها من بركوكش ... زينة : جيبي ابنيتي داك القتيب الي جبت ليك فحوايج دهازك فين هو ( القتيب داير فحال حزام تيدور عالراس فيه الهذب تيقولو ليه قتيب بالنسبة الي معرفوهش )....مداتو ليها يامنة من حداها وجابت ليها نجود الكسكاس ...فهاد اللحضة عيطات يامنة لفؤاد ابيل فيديو قالب الكاميرة ميشوفوهش وهي مركزة ليه غير مع مي زينة ... وجابت ليها المجمر فيه الفاخر زاند ...وطبسيل ديال تمر ...خذات زينة تمرة مداتها ليامنة ... زينة : سمي الله ابنتي ديريها في فمك ندغيها شوي ( تتاكل غير الام ديال الزيادة لا غير ) وعطيها ليا ...دارت داكشي الي قالت ليها ...وعطاتها من تمر حكاتو فشوية بركوكش ...هزو ياسين من كونة ديالو ناعس مغوبش غا هو حركوه وبدا فمو يتململ يخزيييت على برهوش .... هزات شوي بصبعها من ديك شوية بركوكش ودارتو ليه فلهااتو تا خسر سيفتو وبجگ فمو دلا شنافتو تحتية ...انننن اننننن ...امممم ... زينة : ونا وليدي ونا كبيدتي ونا الفريحة ديالي لا تبكيشاااي راجل مااايبكي. مااايبكي ...نهار يبكي تهد جبال ونتا هو جبال الله يرضي على فريختي ... جابت ليها الصينية فيها الكحل والحنة مخلطة بعشوب معطرة ...(ورد ريحان خزامى ) ...هزات المرود ديال الكحل وهادشي فؤاد كلو كيشوف فيه مخنزر وحاضي معاها دايد صبعو صغير على فمو مصغر عينيه ...حتى دارت ليه الكحل فحجبانو وجات دير ليه فعينيه كان مغمضهم عاصرهم حلف لا حلهم ...تا دارت ليه الباروك غا من فوق ... نجود : قاري حسابو هاد الكمشة تاهو هههه ... زينة : ماعليش راه كحل العيون من عند الله غا العادة وكان تبارك الله "خشات وجهها فعنيقو تا باستو وطبطبت عليه ...حطات القتيب فالكسكاس وحطاتو فوقو كسكاس كبير ولاحت شوية البخور ريحة طيبة بخراتو فوقو شافتو بدا يتگبع ويطلق غوباشتو وهي تجمع طرح ...والحنة الي فصينية فرقاتها عليهم كل دارت شويش فايدها باروك وصافي وبهاكا كمل تحناك بخير وسلام ...عطاتو ليامنة خشاتو فيها شم ريحة مو وصقل ....كانت فكاه من الگماط ملبساه قويميجة بيضة وسرويل فصالة فحال باه غير هو واحد ستة سنتيم ديال توب شاطت عالخياط هههههع داك النهار كلو وهما يتقاشحو معاه ويهضرو فيه وحلف لا هو بغا يقوليهم اش دار ولمن عيط والو واش بغا يقول حدو نيقوليهم فعلتها بدون اية اضرار .... يوسف : تا نطق يدوي بوك من جناب البغل ... صهيب : فعلتها بدون اية اضرار في المستقبل .. الياس : فرقعتي نازا ؟ صهيب : فرقعت ليماك قلا*** يوسف "دار ايدو على حنكو بقلة حيلة " : فك غا وحايلك مع قل*** فؤاد الي حصلتي فيهم ... صهيب "ولا يلولب فعينيه " ... ايلاف : ذكرتوه طب لييييييش ههههه قلي شو عملت ... صهيب : ماعملت ايشي ابن عمي فيش ايشي ... ايلاف : اييييهاااا حكيت فلسطيني طيب ...بلاش اخويا لا تقول والو ... صهيب : ايهاااع دويتي بالمغريبي اولد العبد ...تخافوش مفاجئة اتعجبكوووم ... الياس : عرفتش علاش حاس بالي غاتكون مفاجعة غالله يستر .... بقاو هضرو عليها وضحكو عليها ...داز النهار رجع فؤاد من بعد ما رصى مع الراجل الي مشا على قبلو ...رجعات يسرى ودارهم فحالهم باش توجد راسها ملي خذات الكونجي مع ولادة يامنة مضارتش بحالتها ف مشات تغبر على يوسف واحد سيمانة تالنهار العرس بينما نقات حالتها ودارت طقوس توجاد العروس الي نفسهم ذكرتهم فيامنة وسارة والي كنعرفو كديرهم اي عروس ... من بعد ما رضعاتو وتاكدات انه نعس مشات لبسات جلابتها لبستها وتسنات فؤاد تا خرج من دوش لابس بينوارو عاد مدوش مشا حداها تحنا باسها في فمها ووقف كينشف راسو ... فؤاد : شكون غايديكم لحمام ... يامنة "غادية لحمام من بعد مدازت تلات ايام على ولادتها ..." : قالت ليا ماما الياس الي بغا يدينا ... فؤاد : مزيان الاه يرضي عليه ... يامنة : غاتبقى مع ياسين ؟ فؤاد : وشكون من غير باه ...انا حداه غير سيري عومي بخاطرك اغزالي ... يامنة "بابتسامة خجولة " : صافي هههه ...بصحتك حتى نتا ... فؤاد : بصحتي هاكا وحدها ؟ يامنة : هههه واشنو ندير معاها ... فؤاد "عض شنافتو وضار شاف فيها غمزها تا غمضت عينيها كضحك فهماتو شنو بغا وناضت مسكينة وخا حشمانة كتحارب فالحشمة حيث صافي ولاو الولاد وبدات العشرك بيناتهم كطوال وتوطد ...ناضت وقفات قدامو وقربات لعندو كتحنحن حتى تقابلت معاه وقفات على روس صباعها باش توصل شوي لحنكو حطات ايديها على صدرو وتهزات لعندو ...مدات شنايفها لحنكو وباستو فيه ونزلات كتشوف فيه وضحك ... يامنة : هههه دابا بصحتك ... فؤاد : ماشي هاكا يامناااا !!! يامنة "جمعات ابتسامتها بتساؤل " : وكيفاش ؟ فؤاد "لاح الفوطة وضور ايدو ورا ضهرها ولاخرا ورا عنقها حتى تكاها فوق ناموسية وجا فوق منها غرس وجهو فعنقها باسو ليها وطلع كيبوس حتى وصل لوذنها جر ليها شحمتها وايديها فوق صدرو كضحك عرفاتو مكيقنعش ببوسة الحنك ولو مكان نفاس كانت بلا حوايج تحت منو ... يامنة : اييي ههههه كتهرني ... فؤاد : ماشي وقته داكشي ... يامنة : و واخا هههه غير بشوية ... طلع بفمو كيعض عضيضات خفاف تا ضار جيهة فمها شلقمو تشلقيمات خفاف ووقف عند فمها فامهم ملاصقين ونطق ... فؤاد : هاحنا صابرييين اغزالي ... يامنة "دوزات ايدها على حنكو وبحركة جريئة باستو في فمو وطولات شوي ...مبغاش يبين انه مصدوم باش تزيد تزعم اكثر ..." : ههههه فؤاد "تنهد وحط راسو على صدرها كيشوف ف ياسين الي ملي تحط فكرشها وهو محرم عليه النعاس معاها يلاه يشد لخط يدير شي عجب ويرجع يحرمها عليه ..." : ان الله مع الصابرين ... ناض من فوقها وناضت قادات حوايجها صونات ليه نجود بلغتها باش توجد راسها لان البنات لتحت كيتسناوها باس يمشيو لحمام تكمد عضامها وتسخن ليها شوي وتغسل وتنقي حالتها من وسخ نفاس ....ممشات تا وصات فؤاد وعاودت وطل على ولدها وتعاود توصي كون ما خنزر فيها ورفع صوته ما تمشي دغيا طارت من حداه ...الخوف وميدير ...هبطات لقاتهم واجدين ... ركبو كاملين مع الياس وانطالق بيهم مباشرة لحمام فين غايعومو .... بقا فؤاد من بعد ما لبس حوايجو غير شورط وحدو وبقا عريان من الفوق حط حداه ياسين فاكين ليه الگماط باش يرتاح ليه مع راسو كي رضعاتو نعس وحطو حداه ...حاط الماك قدامو حتى بدا يسمع تحنحينتو بغا يبدا يتحرك ضار شافو لقاه بدا يبجگ فمو ويخصر سيفتو بغا يعلن بداية البكية ... فؤاد "كيشوووف فيه تا كيسكت ويضور يشوف تيليفونو ويرجع يشوف فالماك ويعاود يسمع وتاني يسكت مبغاش يقيصو باش ميفيقش ...يلاه رجع ركز ومشا مع الخدمة حتى بدا يبكي وحدة تابعة لاخرا تا طلقها بببكية حط الماك وجرو قربو ليه " : شششش صافي صااافي ... ياسين "طلقها بغوتة مبقا بغا يسكت ..." فؤاد "ضار بانت ليه بيبغون ديالو فيها الما وهزها عطاها ليه هكاك ناعس مهزوش بدا يشرب وشوي سكت حيدها ليه تا رجع سكت كيگبع ففمو ويحل فعينيه مغوبش ويخرج لسانو وايديه ينغشو ...حمقو المنضر ديالو ...هز الفون ديالو وتصور هو وياه وصورو بقا يصور فيه تا شبع ...فلاخر مقنعش ولا هزو بشويييي وحطو فوق كرشو ....شد ليه ايديتو وخشا صبعو فيها حتى كمششش عليه ...باس ليه راسو وبقا مطول فالبوسة ... فؤاد : كيفاش تا مبغيتكش فلول ...شكون الي يحرم راسو من نعمة الذرية ...النعمة الي بغاوها بزاف وملقاوها ...النعمة الي كيرزقها الله لعبادو والي حرمها منو فيها خير فجيهة ثانية وشكون الي كره تكون عندو نعمة الولاد ...يشوف عويناتو ويعطيه كلمة تكبرو وتزيدو مسؤولية وتكبرو كثر وتخليه يشرب من الحياة ويكون مثال ليه ( الله يرزق كل محرومة يارب بالذرية الي تمنات ) ...تكبر فين يجيو خوتك لا بغا الله ...وكون الكبير فيهم سير على مابدينا فعائلتنا وربيهم نتا الكبير مندخل فيك مانهضر الي عليا نديرو تايكبرو وكمل عليا كيف مادرت مع عمامك ...الى كنت خايب كون حسن مني ...الى مزيان كون فضل مني اولدي ياسين "بدا يعنعن ماشي باش يبكي غير تنوغيشة صوت هههه " انننءء...اننءء... فؤاد "باس ليه كف ايدو " : ششش هاني بابا هاني المرضي باذن الله .... بقا معاه كيهضر ليه ويعاود ويطبطب عليه تا لقاه نعس ليه فوق كرشو ...خلاه تا طاب نعاسو وحطو فبلاصتو ورجع يكمل خدمته ويشوف الجديد ديال داني فين وصل واخر اخبار ديك خيتي الي محتاجزينها تايجي لروسيا باش يفضي معاها ويخلي داني هو الي ياخذ بتارو معاها باعتبار قتلات ليه اخته من دمه ولحمه ... من بعد شي ساعتين تقريبا كانو خرجو من الحمام لقاو فاستقبالهم الياس الي معرفو علاش مصر يوصلهم ...خرجات نجود راوية ويامنة وسارة من بعد تحميمة دازيها الكلام طلات لحمها بالصقلة الي بالحنة كاملة ( تبريمة ) وحكات ليها الكسالة فركتها هي والبنات تا خرجو يشقشقو حناكهم حمرين كل وحدة تقولي نادبين ليها تا ركبو ... نجود "باس ليها الياس ايدها وقاليها بصحة " : الله يرضي عليك اولدي ... راوية : تا شتك داير لينا الخاطر كي جرا ؟ الياس : وسوقك اختي ؟ راوية : ييييخ مزينك ... الياس "هز ايدو بغا يعطيها " : غا جيتيني درتي دارك مال والديك لصقك تا طير خنونتك ... راوية : تا ميكون عندي راجل ... يامنة : ههههه ... انطالق بيهم دغيا باش يامنة تلحق ولدها الي وصلات وقيتة رضاعته ...يلاه خرجو من سيارة وجات تخرج يامنة حتى قبطها الياس ووقفها ... الياس : مرات خويا يحفضاااك بقاي نهضر معاك غا جوج كلمات ... يامنة : ايه هاني مالك ؟ الياس "حنحن تا شاف لوخرينات مشاو وراوية كطل على يامنة تا خرج راسو من شرجم " : اتمشي ولا نلحگك على راجلك ياكما توضرتي اخالتي ... راوية : الله يستر ..."دخلات مزينگة لابسة سورفيت زرقة ودايرة فوطة كتعقد على راسها ودخلات لبيتها عند راجلها " ... الياس "شاف فيامنة " : احم مرت خويا وخااا نطلبك طليبة انا مزاااوگ ... يامنة : ايه طلب ...قول مالك ؟ الياس "حك راسو وباغي يبدا ومنين يبدا واش يبدا ؟ ههه " : اننن داك ولد ...احم شوفي انا بغيت نعرض على نجوى ... يامنة : هههه شكون نجوى ..."جمعت ضحكة " بنت المصفرط 😯؟؟ الياس : مكاين الي مصفرط الزهر قدي عتقيني شوووفي قبل متقولي شي حاجة والله العضيم تا باغي نخطبها غير يكمل هادشي ونتقاد فالبوسط ديالي ونخطبها راني جيتها نيشان ...باش العام جاي من تشد لصونص تمشي معايا لالمانيا نكمل قرايتي تما ندفعو فيزا دراسة الى بغا الله ...راه قلت ليها تقرا اللغة تشد ديبلوم فيها تما ...بغينا نبداو من زيرو بقرايتنا ... يامنة : ههههه بصح ؟ "اوما براسو " ولكن علاش نعرض عليها قوليها تجي ... الياس : تي دابا هي باها ميبغيش وبغيت تعرضي عليها وتقولها ليه ويخليها ...وهي غاتجي من مراكش هنا انا نجيبها راسي ولا باش منجبدش ليها المشاكيل غاتقطع وتجي راسها مهم نتي هضري مع مها وعرضي عليها ليحفضك راه بغيتها تحضر بغيت نشوفها يحفضاااك يخلي ليك سيدي ياسين الفاقصنا تانا حبيبنا ولد خونا حبيب عمو ...ليعطيك منويتي ليخفضك ليزازيك ... يامنة "ضحكها " : ههههههههه واخا واخا كون هاني انا غانعيط لخالتي ونعرض عليها ... الياس : تشا راه هاكا يكونو بنات العم وعيالات الخوت ولا حيد بالاك ...منا وفينا يعطيك الخير ابنت عمي ...ليزازيك ... يامنة : هههه امييين ... الياس : دابا طلعي راه دوا ليا فؤاد قاليا سربيو راه ياسين عقلو خرج بالبكا 🌚... يامنة "جمعات ضحكتها " : اويلي اويييييلي تالدابا عاد قلتيها ..."محتال يهضر تالقاها خرجات من سيارة مانقولوش طارت لكن غير غادا شادة كرشها وكتزرب ...الي والدة طبيعي دغيا مشيتها تتقاد المشكيل فالي والدة بالغراز او قيصري ..." الياس : اييييوى بنت المصفرط حبها صطاني فرفر ااااااااه وراجلي وتاع قلبي ههههه امي يا مي ... الحياة كتاخذ مننا وكتعطينا وكتخلينا نهزو هموم وجبال المشاكل الي ربي مكتبها علينا ...ومن بعد كل غمة وهم كيجي الفرح ...من بعد ماتممات عقيقة ياسين بالتحناك والحسانة اليوم .يوم العرس ...وختامها ختانة ياسين فنفس الوقت ...الي بنهار كاينة الختانة وبالليل العرس ...واقف يوسف كيصاوب فقاميجتو الي غايلبس بيضة بالگرافاط كحلة وسروال فصالة كحل ...كلبسة اولى قبل ميلبس اللبسة ديال عرسو اللولة الي هي كومبلي باش غايجيب يسرى من عند لكوافورة ....كيقاد فالگرافاط ويعقدها ....حتى دق عليه الباب ودخل قبل ميقوليه دخل وشكون من غيرو الحيماري تاع الفردة ثانية صهيب ... يوسف : لااا ابدا واش نعيش معاك الادب ومكارم الاخلاق بتاتا ... صهيب "هاد الايام مبقاش ضار بساحة فؤاد الي مشغول بتجهيزات عقيقة ولدو وعرس خوه معاه " : هاهما غايجيو قبل ميبدا العرس ... يوسف "ضار لعندو " : تا شكوووون ؟ مازلتي مبغيتيش تقولينا شنو درتي ؟؟؟ صهيب "ضار لقا الياس جاي وجهو بيض " : مالك ؟؟ الياس : فؤاد كاين لتحت ...اجي واش ولد الحوات داك الي جاي هو واحد البيكوب وراه ... يوسف "حل فمو " : تا عيطتي ليه ؟؟ ياك قلتو غير اوركيسترا عادي ...تا شدرتي اولد العبد دابا يتم جاي هو وشيخاته ... صهيب : لا قلت ليه يجي وحدو بلا بيهم غير دراري الي معاه مبغيناش شيخات غايتجبد لينا صذاع وداكشي يبداو يشطحو نحشمو ... الياس : واااا موحاااال اخويا موحااال ... صهيب : علاش شنو كاين ... الياس : والبيكوب ماهي حالة غير دراري الي معاه ... يوسف : ولحد علمي الشيخي ان ولد الحوات ماااا يقدر يستغنى على دوك الشيخات الي معاه... الياس : وخاصة ازينة على ختها اخاي زين ... صهيب : ياااربي السلامة ... يوسف : يلاه نمشيو نشوفوه لكان جايبهم قبل ميبانو لفؤاد ليوم يفدي فيك القديم وجديد ابا صهيب ليوم يجمع لوالديك حب وتبن والله يا موك لا جينا من جيهتك ...اليوم عرسي يسد عليك فبيت تايكمل لعرس وخرج ... صهيب مبقاش داها فيهم ههههه ولا خرج وتبعوه بزوج هابطين .... فهاد اللحضة كان فؤاد دخل بسيارته بانت ليه بيكوب مغطية من لور وطموبيل كبييييرة كتهز سبعة البلايص ...وكاتكات بيضة ... عقد حجبانو كيشوف شكون هادو كيحساب ليه الجوق حيث خلاهم على راحتهم بحكم العرس غايكون فجردة الفيلا قدام لابيسين ...هبط من سيارة وتكا عليها شعل الگارو حاضي شكون غايخرج حتى بان ليه خرج من الكاتكات راجل ماقصير ما طويل لابس كومبلي بيض عينيه صغار واقف هو واحد كيكمي ويهضر ويجاوب فتيليفون ...حتى نزلو واحد ربعة البنات وحدة شعرها صابغاه بصفر ولاخرا بالمارون وجوجات صابغين بالكحللل ...غا زينة على ختها بيضااات وبشرة صافية ...نزلات شافة كطرطق فالمسكة مطراسية حجبانها بالكحل ....مشاو جيهة جردة من لور .... عقد حجبانو فيهم مدوا ماتكلم عيط لعساس وقال ليه شنو كاين ...عض شفايفو بعصبية كيتحلف عليهم بثلاثة ...ومعارفش شكون راس الحربة ....حتى تمو جايين كيتجراو لقاو فؤاد عينيه حمرييييين .... يوسف : ايمااا عرسي ضاااع ... صهيب "بالخلعة " : واواواو وعيطة داودية ... فؤاد "بصوت مجهد تا قفزو " : صهييييييييييييب 😡....
أنت تقرأ
يامنة
Acciónقصة ل الكاتبة sana mina قصة مغربية قريتها و بغيت نتشاركها معاكم نتمنى تنال اعجابكم و أخيرا و ليس آخرا رمضان مبارك كريم على كل الأمة الإسلامية
