{بلا ميعاد}

بارت 6

رجعت عنود وكمل سطام للاسطبل بس وقفه صوت شريفه اللي تقول : سطااام ما ودك تاخذنا للاسطبل حقك
سطام : الا حياكم
مشوا الكل له واتجهوا للاسطبل
................••............ وعند فارس اللي طلع مع مؤمن متجهه لبيت فهد دق الباب وفتحت له ام فهد وهي تقول : هلا فارس يمه
فارس : كيفك يا خاله حمدلله على سلامة فهد
ام فهد : اللله يسلمك ياولدي تفضل ادخل
فارس : ان شاء الله
دخل وهو يشوف فهد منسدح بتعب : سلام
فهد اعتدل : اهلييين
فارس : سلامات سلامات ما تشوف شر
فهد : ما يجيك يارب
فارس : وش صار
فهد : ابد تهاوشت مع واحد كان بيسرقني اغراضي
فارس ابتسم بهدوء : متوقع يعني اني فعلا بصدق هالحكي
فهد بلع ريقه بهدوء : وليش ما تصدق ؟؟
فارس : لإنا عارفين كلنا انه ما كاان بيسرقك
فهد : فارس من جد صار كلامك سيء ومستفز
فارس : ليش احساسي يقول له علاقه بدانه
فهد : لو تسكت احساسك ابرك بكثيير
فارس : مابي اضغط عليك بس صدقني مهما تخبى بيبان
فهد صد بضيق وهو ياخذ نفس فارس وقف بهدوء وهو يقول : عالعموم انتبه لنفسك
انسحب وطلع ووقف فهد وهو يهوي نفسه بألم ( من وين طلع لي ذا الفارس من ويييييييييييييين ) .................••............ عند دانه اللي كانت واقفه تساعد ساره دخلت عنود وهي تفكر بهدوء قربت وهي تاخذ الكوب وتشرب مويه
وبعد صمت تكلمت دانه بصوت يرجف وهي تسكر الباب :بنات ادري انكم فاهمين غلط ويمكن تنظرون لي نظره سيئه بس ولله مو مثل ما فكرتوا والله
عنود : وش فكرنا
دانه : ادري بكم من زمان مو مصدقين بس والله العظيم ما بينا شي والله
عنود اخذت نفس : لا تخافين سطام بعد شرح
دانه: والله ما توقعت احصله بالغرفه ابد
.
.
ساره : دانه خلااص اهدي احنا فهمنا الموضوع بس لازم تنتبهون اكثر
عنود : اهدي خلاص هي مره وانتهت
دانه مسحت دموعها بضيق : لو اقدر اتذكر اي شي يرجعني لاهلي ما انتظرت
ساره قربت وهي تحضنها : خلاص اهدي
دخلت جوري : وش فيكم
عنود : ولا شي بس دانه شوي تعبانه
جوري : انادي سطام قبل يروح
دانه: لا انا بخيييير
جوري : طيب اجهزوا لان سطام راح يجيب عايشه
عنود : اووووف ناقصييييييينها
ساره : خلاص عاد ندري انها بتجي اذا جات امها
دانه؛ مين هاذي
ساره :هاذي بنت ولد العمه شريفه
عنود : ولدها مات من زمان وبنته جلست معاها طبعا متزوجه
دانه : ليش ما تبونها تجي
جات جوري وجلست بهدوء : هو احنا مو ما نبيها تجي لاا بالعكس نحبها ونبيها تجي بس احيان لقافتها وتطفلها يخرب عليها
ساره : يعني خليك حريصه وبس
دانه : زين
سمعوا صوت مازن اللي يدق الباب : سوووير
ساره لفت للبنات وشافتهم متغطين : تعال مازن
دخل مازن وهو يدور بعيونه على جوري شافها وابتسم بمشاكسه : لا لا لا وش ذا الحيييييل انتي ما يمسك شي نطيتي على طول
جوري ابتسمت وهي ترمي عليه الملعقه :لا تفكر اني ممكن استسلم لامثالك السيئه بقوم لو طحت ما بخليك تستانس
مازن رجع لها الملعقه : بنت ابوك والله
عنود بزهق :وش تبي
مازن : انتي وش فيك
عنود : ولا شي بس وش فيك جاي
مازن : ايوه صلحوا قهوه وشاهي
ساره : خلاص نص ساعه وارجع
مازن مشى ومر من جنب جوري وضربها بالعلبه  وركض وهو يضحك ولكن جوري رمته بالملعقه وصكت براسه ولف بيهاوشها وصفق بالباب وبعد هدوء ارتفع صوت ضحك البنات عليه وقف وهو ماسك راسه : حسيبك الله يا مسممه كيف صبتيني
ضحكت جوري : المظلوم ياخذ الله بيده
مازن وقف وهو مايدري يطبطب على اي ضربه
وافترقوا كل واحد يسوي اشغاله
.
وعند سطام اللي وقف بمحطه وهو يأشر للعامل انه يعبي له بنزين استند براسه على الشباك وهو يتذكر الليله اللي كانت سيئه تنهد وهو يمسح جبينه : توك بالبدايه يا سطام
تحرك وهو متجهه لبيت عايشه وقف وهو يدق عليها وطلعت بسرعه وركبت وراء وهي تحشر عيالها مع سطام وهي شايله واحد وحامل وحالتها حاله نزل سطام وهو يجمع اغراضها وراء وركب ( وكانت عايشه متعوده على سطام بشكل كبير وتعتبره مثل اخوها وسطام كذلك )
عايشه : كيفك يا سطام
ابتسم لها سطام بالمرايه : حمدلله وانتي كيفك كيف عيالك
عايشه : والله خلها على ربك يا سطام
سطام قطب حواجبه : فيك شي محتاجه شي
عايشه : مستوره
سطام :وزوجك وينه !؟ عايشه : زوجي الله يكون بعونه ذبحته هالديون
سطام هز راسه بضيق : الله يعين
عايشه : قولي انت ما حصلت وظيفه
سطام : الله كريم
عايشه من باب السوالف : عاد انت ما جربت وش المسؤوليه والعيال حسبي على اللي قطع نصيبك
اعتدل سطام وهو يكلم عيالها وكانه ماسمعها : حموده شلونك
محمد : حمدلله
سطام : ماشاء الله صرت رجال
محمد : ايوه وبيصير عندي خيل زيك
سطام ابتسم وهو يسمع لشكاوي عايشه لللي تحاول تنبش جروحه بدون ما تحس ................••............ وعند فارس اللي كان جالس بهدوء كعادته ابتسم لما حس بيدينها على كتفها : شعندك جالس لوحدك
ضحك وهو يتحسس يدينها : لو داري تمنيت مليون **** : هههههههههههههههههه لييش
فارس : كنت اتمنى تجين وجيتي **** : جرب مره ثانيه
فارس : وش ذا الجيه الحلوه **** : وش اسوي وحشتني لازم اجي
فارس : بيني وبينك وحشتني عيوني
مدت يدها وهي تشد على يده بحب وكملوا سوالف اللطيفه اللي ما ينمل منها وسط فرح فارس بجيتها ................••............ وفيه مكان ثااني مكان بعيييد كان اهل دانه لافين كل الدنيا يدورون عليها وقف ابوها وهو يمسح جبينه بغضب
وتكلم واحد من عيال عمها ( سالم : وين راحت ذي
ابو دانه : ان شاء الله تكون ماتت ولا فضحتنا
سالم : ان شاء الله
لفوا على صوت طبيب وقفوا وهم متجهين له سالم: سلام عليكم يا دكتور
الدكتور : وعليكم السلام
سالم : كنت مناوب يوم ..... بتاريخخ ... بسإلك شفت بنت مصابه باثر حادث مرت عليكم مجهولة الهويه
الدكتور قطب حواجبه بضيق : قبل ثلاث ايام مرت علي وحده مجهوله بس كان معها واحد واخذها
سالم : وش اسمه
الدكتور: للاسف عطانا كل شي عنه غلط
سالم : البنت كيف شكلها
حاول الدكتور يتذكر بس هز راسه ب انزعاج : مو متذكرها
ابو دانه مسك راسه بعصبيه: من ذا اللي ااخذها
سالم : اصبر يا عم ما ندري هي هي ولا لا
ابو دانه طلع وهو يدعي انها ميته ولا فضحته
اما عند سند اللي كان جالس وهو هادي شاف ابوه جاي له جلس الجد بهدوء وهو ضايق وبعد حيره قال: سننند اسمعني مهما كان الللي صار سطام ماله شغل اترك كل الحقد على طرف ترا انت سببت له عقده
سند بغضب : انت بس تدافع عنهم كل عيالك واقف معهم ومتهمني بالسيئه ماجد ( ابو سطام ) حطيت الحق معه وتركتوا قلبي محروق وبعدها كملتها مع صقر وما زلت تحملني مسؤولية بلاوي عيالك
نزل الجد راسه بضيق : سند كلكم عيالي وصقر ما نسيته ولا نسييييت ماجد
سند : بس نسيت سند خليته على الهامش
مثل ما تركت الخُبر ومشيت
راح وترك الجد في مكانه بحزن غمض عيونه بنكد وضيق من كل ذكرى سيئه ومن عياله اللي ما يعرفون وش يعني اخوّه .................••............ عند سطام وصل ببتسامه ونزل وهو يشوف الكل ينتظر عايشه بأمر شريفه اخذ منها ولده الصغير النايم ووقف ينتظرها تسلم وابتدوء يسلمون عليها اتجهه سطام بجهة ساره وهو يسلمها الولد ورجع ينزل الاغراض وهو يحاول يتجاهل عيون سند اللي تقدح بالشر والحقد عليه
وقف بحيره بجنب سيارته وهو مخنوق يبي يعرف وش ذا السووور الكبييير اللي بينهم مد يده بهدوء لدقنه وهو يمسح عليه بحزن واخذ الاغراض وجلس شاف مازن جالس وهو جبينه منفوخ قطب ببتسامه وهو يأشر له ( وش ذا )
مازن حول عيونه على الجوري بغضب وضحك سطام ويهز راسه بيأس من وضعهم
وكانت عايشه مو محتاجه احد يسايرها بالسوالف كانت تسال وتجاوب بنفسها وتضحك وتسولف واكله الجو
والكل كان يكافح النوووم بسبب سوالفها وما صدقوا تعشوا ووالكل طار لفراشه ينام بدون ما احد ينتظر احد
لكن دانه جفاها النوم وهي تدور اييي طريقه تتذكر اهلها فيهم طلعت وجلست عند الورد بس شافت ممر كله ورد ونست نفسها وهي تمشي وتحاول تتذكر ................••............ ................••............ وسطام اللي كان يتقلب بفراشه وهو ميت نوم بس من قادر يرتاح وهو ما عرف وش بين ابوه وسند
.
.
وسطام اللي كان يتقلب بفراشه وهو ميت نوم بس من قادر يرتاح وهو ما عرف وش بين ابوه وسند جلس وهو ياخذ نفس وقف وهو يطلع برا فتح يدينه للهواء تقدم يمشي بدون جزمه ارتعش لما حس البرد اجتاح جسمه شد على نفسه وهو يكمل طريقه ووصلت به رجوله للورد وشاف وحده واقفه تقدم وهو يقول : سوير شعندك صاحيه ؟!
دانه ارتبكت ولفت وهي تغطي وجهها وبخوف : انا دانه
رجع سطام لوراء بإحراج : اسف
دانه هزت راسه بهدوء وابتعدت عن الورد واسرعت بتروح بس وقفها سطام : دانه
دانه غمضت عيونها من صوته اللي صح تعودت عليه بس باقي نبرته تخوفها
سطام : انا اسف على الموقف اللي مرينا فيه ادري عنود ممكن تكون ضايقتك شوي بس الموضوع صعب من بدايته لا تخافين انا فهمتها وشرحت لها كل شي
دانه بالقوه نطقت : والله اني ما كنت ادري انك هناك
سطام قاطعها : مو مشكله محد فينا كان يدري وكانت غلط انتهت خلاص
دانه سكتت بخجل وقال سطام : كيف جرحك كويس ما يألمك
دانه : يعني
سطام : تحسين بشي
دانه : لا بس كذا يألمني بطني كل فتره
سطام : مو مشكله عشان جرحك جديد
عم السكوت وسطام واقف دانه انسحبت بس لفت انتباهها سطام اللي واقف بدون جزمه والجو بارد كانت بتتكلم بس خافت وقفت بعيد وهي تراقبه
تقدم سطام للورد وهو مبتسم تركها وهو يشد على نفسه وبسرعه رجع للمجلس دخل بفراشه واخذه النووم وهو يحس انه مرتاح ................•• ورجعت دانه للغرفه دخلت وهي مو قادره تنام سكرت الباب وهي تلف تناظر الغرفه كانت هاديه مثل صاحبها لكن فيها كركبه تقدمت للمكتبه الصغيره وهي تشوف على اشياء غريبه لواحد مثل سطام فتحت الدرج وشافت اوراق كثييره مشخبطه شي رسم وشي شعر وشياء كثير ناقصه ومن بينهم كم صوره مدت يدها لصوره مو واضحه كثيير بس كانت لعايله صغيره ابتسمت وهي تتذكر كلام ساره ان ابوه وامه متوفين رجعتها بهدوء وسحبت دفتر كان مكتوب فيه اكثر من بيت شعر وفيه قصيده هزت دانه بكل حرف ومعنى (هنا كم سنه من عمري اعيش وداخلي جروح
هنا قلبي رحل عني وكثر الحزن قاسيته
هنا جرحي ترك دفتر مسجل به الم مفتوح
هنا قلبي رفض بعدك وغصب البعد خاويته
دخيلك ليه يايمه خنقتي صوتي المبحوح
دخيلك كيف هالدنيا تذل الشخص في بيته
كبيره صدمه الدنيا تجازيني كثير النوح
يكون آخرها حرماني من اغلى حب حسيته
فمان الله يايمه فمان اللي عطى هالروح
وداعك يصرخ بروحي وانا بالقلب خبيته
...
ياقبر ابوي اذا تسمح بجيلك لابغيت ابوح
بجيلك لانفذ صبري واحس العمر مليته
بجيلك واجلس اقبالك واحط ايدي على هاللوح
واحس ايدي بيدين ابوي ياليته صدق ياليته) .
.
.
هنا رمت ضي الدفتر بالدرج وهي منهاره كان الكلام كبيييييييير كبيير كبييير علييها هي تدري ان فراق الوالدين صعب بس كانت القصيده ما تعني بس فراقهم اشياء كثيره مخباه فيها ابتعدت وهي ترجع لفراشها وانهارت تبكي وهي ما تدري لو هي زادت على مصايب سطام مصااايب ................••
ومن بكره فتح سطام عيونه على صراخ عايشه اللي تضرب ولدها وتهاوشه والثاني يبكي بجنبها فز وهو مفجوع : عايشه وش فيك عليه
عايشه بعدت سطام وهي ترمي الجزمه : وللله لاوريك يا كلب
سطام : عايشه وش بك
محمد اللي مسك في سطام وهو يبكي وصرخت عايشه : تبكي تبكي بعد
سطام : لا حول ولا قوة الا بالله يا بنت الناس اصبري وش بلاك
عايشه : مطيح اخوه على الارض لو مات وش اسوي به
سطام ارتخى بهدوء: عايشه خلاص اخذي الصغير بدل ماهو جالس يبكي واتركي هالمسكين
عايشه : هيين نتفاهم يا حيوان
بعدت وهي تاخذ الولد الصغير وجلس سطام وهو ياخذ محمد بجنبه : وش مسوي انت خليتها تقلب علينا
محمد وهو يمسح دموعه: بس اخذت الولد عشان يبكي وطاح
سطام : خلاص هان الموضوع وان شاء الله سهالات خلها تهداء واعتذر منها
مازن دخل وهو يضحك: محمد حمدلله على السلامه ماجور
سطام ابتسم وهو يمسح على راسه المصدع
نايف : والله اني انخرشت قلت الحين بتلف علي وتكمل
سطام: والله فجعتني
مازن: احب افجعك زود واقولك ان سند وشريفه راحوا للاسطبل وشكلها هاجه بهم
سطام: وش يبون هناك
نايف : تجمعوا اخيس اثنين بيقلبون الدنيا اكيد
انسدح سطام بتعب : والله عاد شكلي بستسلم
مازن: لا تقول بس بترجع تنام
سطام : ياخي ماسكني صداع يفجع
نايف : انا اقولك من النوم
مازن : لا لا من الازعاج والتفكير
سطام رجع لفراشه وهو يتغطى : مدري بس اتوقع لو نمت با ارتاح
نايف : شكلي حتى انا بنام
مازن سحب نايف قبل ينسدح:  لا لا تكفى تعال بنروح نسوي اي شي
نايف ابتسم بمكر: وش رايك نحوس البنات
مازن : لا لا جوري مريضه وبعدين شريفه بتحوسنا
نايف: انت ليش خواف
مازن: وللله تبت بعد اللي صار
سطام : روحوا تناقشوا بعيد الله يهديكم
نايف ناظر بمازن وابتسم بهدوء وسحب مازن برا رفع راسه سطام واستغرب انهم طلعوا بس ما ركز ورمى نفسه بتعب ................••
عند البنات كانت دانه جالسه بتعب وهي تهوي نفسها والبنات موزعين بالمطبخ
هديل وهي تشرب عصير : شريفه راحت الاسطبل
ساره : سألتك بالله
ناديه : شتبي فيه يعني
هيفاء : ماعندهم شغل بيدورون شي يغث سطام اكيد
جوري : صدق وينه سطام ما شفناه من الصباح
عنود : اتوقع انه مو موجود لو موجود ما نام كل هالوقت
ساره : مدري حتى ما مر ولا اخذ ملابس ولا حتى عطاني خبر
دانه وقفت بتعب وطلعت وهي تسمع نقاشات البنات عن سطام جلست برا وهي تحس انها تعبانه ومتنكده من دفتر سطام اللي قرأته ولكن فجعها اللي جلس جنبها بقوه
عايشه : انتي مين ! وش جابك هنا ؟ من وين تعرفين سطام
دانه خافت منها ولا عرفت ترد بس انقذها عنود اللي جت وهي تسحب عايشه : عايشه لا تضايقين البنت اكثر تعالي انا اقولك
عايشه : وليش هي ما تقول
عنود بحده: البنت تعبانه
سحبتها وهي تبتسم لدانه وراحت بعيد وهي تشرح لعايشه اللي عجزت تتقبل : مستحيل وش ذا القصه لا يكون سطام متزوجها
عنود بقلة صبر : لا متزوجها ولا شي حتى شريفه راضيه فيها ولا تنبشين اكثر وتضايقين سطام
راحت وتركتها ولكن عايشه ما اقتنعت ومصره تنبش اكثر
................••............ عند ابو مازن اللي كان جالس بزوايه وهو معاه جواله ويكلم : ايوه يا ابو خالد وش صار على موضوعنا
ابو خالد : يا ابو مازن هذاني مشغل بحثي لقيت عنه بعض الاخبار بس ما تطمن ابد خلني اكمل اسبوع وبعدها بشوف
ابو مازن بضيق : تكفى لا تقصر سو اللي تسوي اهم شي شف لي كل شي عنه
ابو خالد : ابشر ابشر
سكر ابو مازن بضيق ووقف وهو يهز راسه بأسى : ليتني اقدر ارجع السنين واصلح كل شي ................••............ اما عند مازن ونايف اللي كانوا واقفين برا المجلس وبدون سابق انذار ركض نايف ودخل وهو يصرخ: سطام اللحق اللحق ( السطام .. هذا اسم فرس سطام اللي يحبه حيل مسميه بأسمه ولا يرضى عليه اي شي )
فز سطام : وش فيه وش فيه
نايف : رماه سند بالرصاص
اتسعت عيون سطام برعب وفز يركض لباب ولكن فاجئه مازن بسطل مويييه باااارده وثلج شهق وهو يلف ولكن ما خلص اللي صار وواجهه نايف بالبخاخ الثلجي .
.
.