"أنتِ لي وإن فرقتنا العادات"
- إيه الحديت الماسخ اللي هتجوليه دِه يا عِطر؟
=واه! أنِي حديتي ماسخ يا زين؟
- يعني هو اللي أنتي طالباه دِه حديت صُح!
=صُح الصُح يا زين.
- تُبجِي اتهبلتي على كَبَر يا بت الناس.
=بِجِي اكدِه يا زين، تهون عليك تكسر فرحة عطر؟
- لاه يا عِطر ميهونش عليا واصل، بس بردك الحديت دِه يدخل عَجل مين يعني، هاتيلي واحدة بس في النجع كلاته عِملِت اكدِه في حِنتها.
"عِطر من يومها وهي مطيورة، بتحب تجرِب كل الحاجات الجَديدة وبتُبجَى طايرة بيها، ودلوجت طالع في راسها تجيب الساري الهندي اللي هيجولوا عليه ده للحنة، مخابرش مين بس اللي دلها عليه"
=بس أنِي رايداه يا زين.
نفخت بتنهيدة - يا بنت الناس ما كل البِنِتِّه حالهم يلبسوا عادي كيف الناس، أنتي اللي خِلجَة يعني يا عطر؟
اتدللت عليا وأني مجدرش على دلالها =وهو أنِي عِندِيك كِيف باقي البِنِتّه يا زين؟
- لاه يا جلب زين بس بردك العَجل نِعمِة، مرِّجيها عاد.
=لاه يا زين، أنِي جُولت هجيب الساري الهندي يعني هجيب الساري الهندي وإما كانش يُبجَى مفيش حنة ومفيش عُرس وإن كان عاجب.
- أنتي بتكسِّري كلمتي يا عطر، أنتي نسيتي مين زين الرجال؟
=لاه يا زين الرجال، أنت اللي شكلك نسيت مين عطر زينة البنات وساويتها بالكل وعايزها تلبس كيف البِنِتِّه، وأنِي مهغيرش رأيي.
- أنتي بتتحديني يا عطر؟
=مهتحداكش يا زين بس أنِي مهتجوزش كل يوم ورايدة فرحي يكون حاجة جديدة مش كيف بنات النجع، مانيش شوية يا زين.
- وأنِي كلمتي مش هتنكسر يا عطر.
=وأنِي مهرجعش في حديتي يا زين.
"عطر متعرِفش إني غيران عليها، متعرِفش إن الموضوع أكبر من اختلافها عن بنات النجع، متعرفش إنه ممكن يجرالي حاجة لو حد شافها بيه، دي ورتني صوره طلع مبيسترش !"
- أنتي رايدة تفضحينا وتفرِّجي الناس عليكي بالبتاع اللي لا بيستر ولا بيداري دِه؟
=متتحججش يا زين، احنا في الحنة بنُبجَى حريم وبس.
- وأنِي بخاف عليكي من الحريم كيف الرجال يا عطر، معايزش حد يشوفك غيري، لو بيدِّي كت حبستك عن العالم كلاته يا عطر.
=بتغير عليا يا زين؟
-أيوة بغير يا عطر وأنتي خابرة دِه زين.
=خابرة بس دِه ملوش صالح يا زين، أنِي عاوزة أفرح.
- خُلُص الحديت يا عطر، أنتي هتلبسي زي البِنِتِّه ما بيلبسوا في حنتهم، ولو رايدة البتاع دِه هجيبهولك لما تُبجِي في بيتي.
=لاه يا زين مهعملش فرح من غيره، هاتهولي وأنِي والله في نيتي ألبس تحتيه اللي يُستُر ، هو أنت فاكرني جليلة حيا ولا إيه؟
- بردك يا عطر، عشان محدش يجول بتتكبر على بنات النجع، أنِي معايزش حد يتحدت عليكي واصل.
=بس اكدِه ظُلم.
اتصدمت من كلمتها - أنِي ظالم يا عِطر؟
=أيوة ظالم يا زين.
خدتني الحمية ولجيت نفسي بجول - بجِي اكدِه، طيب يا عطر اللي أني جولته هيتنَفَّذ ومفيش زفت من اللي طلبتيه دِه، وحِسِّك عينك الحنة متعديش زينة ساعتها هتشوفي وش مهتجدريش عليه، خُلُص الحديت يا بت الناس.
=يا زين..... يا زين استنى بس الحديت أخد وعطا.... يوووووه.
