"الحب في زمن الكورونا"!
- ماما خدي الولد عندك أنا خايفة عليه.
=يا بنتي إن شاء الله مفيش حاجة.
- إن شاء الله يا ماما بس عشان لو فيه.
من ساعة ما جت الكورونا وأنا عندي إحساس قوي إني هموت بيها، مش خايفة من الموت قد ما خايفة أقابل ربنا وأنا لسة مش جاهزة حتى لو عمري ما هجهز؛ مش خايفة من المرض قد ما خايفة على ابني اللي لسة جاي الدنيا مبقالهوش كام شهر، بس ربنا كريم🖤
********************
- يا بنتي أنتي مستنية تتصابي، ما تتنيلي تاخدي إجازة ولا تقعدي من الشغل خالص.
=يا حبيبتي مينفعش، طب لو أنا قعدت وباقي الدكاترة والممرضين قعدوا، مين هيداوي المرضى بأمر الله؟ عمرك شفتي الجيش بيتقاعد في حالة حرب؟ أهه الكورونا دلوقتي حرب واحنا الجيش الأبيض.
- ربنا يحفظكم.
=اللهم آمين.
يا لهوي، امال لو عرفت إني اتصابت أصلا وفي العزل كمان، أنا عارفة إنها خايفة عليا، أنا كمان خايفة على نفسي من اللي بشوفه، صعب عليا كل يوم والتاني حد يموت قدام عينيا، والأصعب إني أشوف اللي عايش فيهم مش عايش، ربنا يزيح عنا الغمة دي🤲🏻
*********************
- والله يا ابني ما تقلق، هبقى بخير بإذن الله.
=لأ يعني لأ، يا تتعالجي معايا هنا يا يدخلوني معاكي المستشفى.
- يا حبيبي متقلقش عليا.
=ماما أنا قلت اللي عندي، لو سمحتوا اتفضلوا أنتو، أنا هراعيها هنا.
طقم التمريض كله كان واقف يدمع، أنا أساسًا كنت حابس الدمعة في عيني لحد ما أمي عيطت ومقدرتش أمسك نفسي أكتر من كده واترميت في حضنها وأنا مفحوم من العياط، مش مستعد أفقدها وطالما حالتها متأخرة وشفائها نسبته قليلة فأنا كمان لازم أبقى كده، ويا نعيش سوا يا نموت سوا، ما أنا مش هقدر أعيش من غير أمي💔!
*********************
كلها حالات تندرج تحت "إيجابي كورونا"، كلها حالات تمثل أبهى صور "الحب في زمن الكورونا".
الحب في زمن الكورونا هي أم ضحت بحضن رضيعها وتقبيله ولو لمرة رغم علمها أنها قد تكون المرة الأخيرة.
الحب في زمن الكورونا هو طبيب أو ممرض جعل نفسه عُرضةً للموت من أجل أناس لا يعرفها ولا يعرفونه.
الحب في زمن الكورونا هو ابن يعلم جيدًا أفضال أمه عليه فيأبى إلقائها بأحد المستشفيات ويقرر مراعاتها بنفسه ولو على موته.
هذا فقط ما يطلق عليه "الحب في زمن الكورونا" وما سوى ذلك ليس إلا عبث💙
**********************
ادعوا من قلبكم لأي مريض كورونا أو سرطان أو أي مرض تاني ربنا يهون عليه ويشفيه، وادعوا للأموات ضحايا الأمراض دي بالرحمة، وادعوا لأهالي المرضى والميتين بالصبر🧡
#ادعوا_بيقين🤲🏻
#الاسكريبت_الخامس.
#زينب_إسماعيل.
