"مِن #حطام_الثانوية إلى #مش_بالكُلية"
_آه أنا تعبت يا مُنِّي ، امتى ربنا يتوب علينا من السنة دي؟
=بكرة ترجعي تشتاقيلها.
_لو عليا بعد البهدلة دي عمري ما هتمنى أرجعلها.
=ولا هتتمني ترجعيلي؟
_وأرجعلك ليه ما احنا هنبقى مع بعض بإذن الله.
=مين عالم.
_ربنا يعديها على خير.
**********************
عدت الأيام بسرعة لحد ما جت الامتحانات واللي كانت صعبة على معظم الطلبة وفي شهر رمضان كمان.
_بقى أول يوم يجيبوه كده يا أمي! هما بيعملوا فينا كدا ليه ، مش أنا مسمعة عليكي أحكام الفقه الصبح؟ ده أستاذ طارق قايلي امبارح إني ممتازة، والله حليت معاه كتير، طب والديناميكا اللي أنا صميت قوانينها وحفظت المسائل من كتر حلها ، اللي بيحصل ده حرام ، حسبي الله ونعم الوكيل ، هما طيه عايزين يعقدونا ، أنا عن نفسي اتعقدت خلاص ، أنا ولأول مرة بتمنى أنجح ، أنجح وبس ومحدش يطلب مني مجموع ، أظن أنا عمري ما قليت عن ٩٢ ٪ والسنة اللي فاتت جايبة ٩٧٪ يعني العيب مش فيا لو متوفقتش.
=استهدي بالله يا حبيبتي ، ما اللي عليكي على زمايلك يا زينب ، ربنا يسددك إن شاء الله ، ادخلي اتوضي وصلي وبعدين نامي شوية يا حبيبتي ومتفكريش في اللي فات وأنا هصحيكي المغرب تفطري وبعدين تذاكري شوية في الفيزيا.
_حاضر يا أمي.
=يلا يا بنتي ربنا يوفقك.
**********************
_أمنية أنا مرعوبة ، في حد عاقل يحط قبل الفيزيا يوم واحد وفي رمضان ، أنا مأكدتش عالمهم وأقسم بالله فيه ٣ فصول ما فتحتهمش أصلا.
=زينب بطلي وَش ، اللي ربنا كاتبه هيكون.
_ربنا يستر.
الامتحان جِه مقبول بس لأني مكنتش لحقت أراجع ٨ فصول في يوم ونص وأنا صايمة! فحليت أي كلام.
**********************
_أمنية بتعيطي ليه؟.... يا بنتي والله الامتحان صعب على الكل.... أنا كمان حليت وحش... طب استهدي بالله وتعالي نروح.
وصلتها البيت بتعيط وبعدين طلعت أتحسر على نفسي...
آدي الفرع الوحيد اللي كنت مطمناله في الرياضة ، آدي الجبر والهندسة بح ، يا حلاوة ده أستاذ رضا هيفرح بيا أوي ، يلا زي ما تيجي بقى.
**********************
_أمنية أول امتحان ييجي سهل.
=أنتي كمان مكنتيش عاوزة تحلي في الإنجليزي! ده احنا اتفحتنا فيه طول السنة.
_قال يعني احنا متفحتناش في باقي المواد.
=على رأيك.
_طب هنطمن مستر وائل إزاي؟
=أنا هبعتله الامتحان مع أحمد أخويا.
_طب يلا بينا.
**********************
_أمي النهاردة ١٥_٧ زي النهاردة بدأت دروس ٣ ثانوي.
=ربنا يكتبلك الخير يا حبيبتي.
_والله يا أمي ما عايزة أدخل حاجة من الكليات القمة لأني مبقتنعش بيها ، أنا عايزة أبقى مدرسة وواثقة إن في مجالي هبقى أحسن من أحسن دكتور وأشطر من أجدعها مهندس.
=بإذن الله خير يا حبيبتي.
_يارب يا أمي يارب.
~زينب زينب....
_ايه يا أحمد فيه إيه؟
~علي أخوكي متصل وبيقولك قولي رقم جلوسك.
_هي النتيجة ظهرت؟
~أيوة خدي كلميه.
_آلو أيوة يا علي.... آه اكتب عندك.....
+ هو أنتو مجموعكوا من كام؟
_من ٦٥٠ يا علي.
+مبروك جبتي ٥١٨.
_٦١٨؟
+ ٥١٨ يا زينب.
_......!
+ زينب أنتي رحتي فين؟
رديت باختناق:
_طب معلش يا علي شوفلي الرقم ده كده.
+ أمنية محمد شرف دي جابت ٥٩٠.
_طيب يا علي شكرا مع السلامة.
+ الله يسلمك.
**********************
_أيوة يا أمنية.
=ايه يا بنتي عملنا ايه؟
_انتي جبتي ٩١.٢ ٪ مبروك.
=وأنتي؟
_أنا ٧٩٪
_طيب يا زينب سلام.
=سلام.
**********************
أمنية كان نفسها تدخل هندسة ومجموعها كده ميجيبش ، بالنسبالي مكنتش محددة كلية بس كان نفسي أجيب مجموع عشان خاطر أمي تفرح بيا بعد تعبها معايا طول السنة وكام سنة كمان قبلها وكمان عشان مخيبش أمل أستاذ رضا وأستاذ طارق ومستر وائل فيا.
ولو ليه دول بس فحقيقي كل حد فيهم يبقالي حاجة كبيرة جدًا وفي مقام أب أو أخ كبير ليا.
ولأن أستاذ رضا أغلب الأحيان بيناديني "د/ زينب" وأستاذ طارق متأكد إني ممتازة ودايما يقولي "هتنجحي يا بنتي" ومستر وائل قالي مرة "أنتي اللي يسمَّعلك يقول هتطلعي الأولى على ثانوية أزهرية"!
أول يوم درس لأحمد أخويا عند مستر وائل السنة اللي بعدها خده على جنب آخر الحصة وقاله:
- قول لزينب متزعلش، ربنا مبيضيعش تعب حد، وقولها إن عمرها ما هتنزل من نظري.
بصراحة أنا كنت محتاجة الكلام ده يديني دَفعَة قوية للي جاي قدام.
أنا جالي في الرغبات إني أدخل لغات وترجمة أسوان وأنا من المنوفية وطبعا مش هينفع ، للحظة فكرت أدخلها عشان أمي كانت بتتمنالي أدخل الكلية دي خصوصا إن أمنية داخلة لغات العاشر من رمضان وهنفترق.
خدت قرار وكتبت أصول دين السادات رغبة أولى وجاتلي.
عايزة أقول إني كنت بشتاق لأمنية كتير أوي بس أكيد اللي حصل خير ، جايز لو كنا دخلنا نفس الكلية كنا زهقنا من بعض ومكناش هنشتاق لبعض كده.
المهم أنا الكلية غيرت فيا كتير أوي واتحسنت كتير عن الأول والتزمت أكتر وحسيت إني لو مكنتش دخلتها كنت هندم ، لقيت نفسي بحمد ربنا إني مدخلتش لغات ، أمنية كانت بتحكيلي عن كورسات وحاجات كتيرة تبهدل أنا مكانش هينفع أروحها.
الخلاصة.... أنا كزينب عمري ما دعيت بكلية معينة أنا دايما كنت بدور على إني أرضي أمي ونفسي في الخير أيا كان هو فين وبدعي بيقين إن ده يحصل.
متعرفوش الخير فين فمتدعوش بحاجة غيره أيا كان هو فين.
رضا أمي اتحقق لما لقيتني بقرب من ربنا وراضية بقضاؤه.
والخير كان في الكلية اللي عمري ما تخيلت في يوم إني أدخلها.
ومين عالم مش يمكن أحقق هدفي وأبقى مدرسة مواد شرعية وأبقى كسبت دنيا ودين عشان بس دعيت بيقين💙!
**********************
وفي الخلفية بعد نهاية المشهد زينب إسماعيل بتقول/
" الرِضا بقضاؤه وسيلة ، غايتها حِلم الوصول
أنا كان معايا أم أصيلة ، ويّا صف آباء بالطول
ولأني بقضاه مآمنة ولأن عَوَضُه بيبقى جنة
ولأن القصة يقين وهِمة ، هييجي يوم وهقول
{قد جعلها ربي حقا} بدخولي كلية أصول "
#ادعوا_بيقين🤲🏻
#الاسكريبت_التاسع.
#زينب_إسماعيل.
