أعظم انتصار قد يحققه الإنسان في حياته هو تجاوز أشخاص كانوا كـ الإدمان بالنسبة له .
نورهان العشري ✍️
🍁🍁🍁🍁🍁🍁
كان علي يُلملم أغراضه إستعدادًا للعودة إلى المنزل عقب إنتهاء نبطشيته فاستوقفه رنين هاتفه فوجد المتصل مازن فأجابه بمرح كعادته
_ خير اللهم اجعله خير شوفتني في الحلم و لا ايه ؟
شاطره مازن المزاح قائلًا
-_ يا عم تف من بقك دي أشكال احلم بيها بردو !
_ أومال متصل بيا الساعه تمانيه الصبح ليه يا خفيف ؟
مازن بتهكم
_ والله لولا الحوجه ما كنت هتصل عليك ولا عبرتك بس يالا لأجل الورد يتسقي العليق .
اجاب علي بوعيد
_ ورد ! اممممم . قلتلي . طب ايه رايك بقى انك مش هطول الورد دا و لا هتشم ريحته ولا حتى في حلمك .
اندفع مازن بلهفة
_ حبيبي يا علوة دانا بهزر معاك والله . انت بقيت قفوش ليه كدا ؟ حبيبك انا .
قهقه علي قائلا بتشفي
_ ايوا كدا اتعدل بدل ما أعدلك يا بتاع الورد انت .
_ مقبوله منك يا أبو نسب . طب بخصوص الورد بقى وردتي حبيبتي أخبارها ايه ؟ برن عليها فونها مقفول فاضطريت ارن عليك عشان اطمن عليها .
أجابه علي بجهل
_ معرفش . انا كان عندي نبطشية و لسه هروح اهوة حتى غرام تليفونها مقفول بردو .
قاطع حديثهم ذلك الشاب في عمر المراهقة الذي كان يهرول قادمًا تجاه علي و هو يصيح
_ يا علي بيه يا علي بيه الحجني يا علي بيه .
_ في ايه يا سيد ؟
تحدث الشاب سيد لاهثًا و هو ابن البواب الخاص ببنايتهم
_ الست كارما و الست غرام كانوا خارجين من شويه و لقيت ناس راكبين عربيه سودا نزلوا خطفوهم و ركبوهم العربيه و مشيوا
ذُعِر علي من حديث ذلك الشاب فصاح بانفعال
_ أنت بتقول ايه ؟ ناس مين دول ؟ و عملوا ايه في اخواتي ؟
سيد لاهثًا
_ ناس مغطيين وشهم و شدوا الست كارما و الست غرام و ركبوهم العربيه بالعافيه بعد ما حطوا حاجه على مناخيرهم دوختهم و أنا أول ما شوفت كده طلعت اجري اخبط على باب الشقه بتاعتكوا محدش رد قومت نازل جري على هنا عشان ابلغك .
انخلع قلب ذلك الذي كان على الهاتف فصرخ قائلا بهلع
_ ايه اللي انا سمعته دا يا علي ؟ كارما جرالها ايه ؟
أجابه علي الذي بهتت ملامحه و لوهله شعر بالضياع
_ مش عارف يا مازن سيد بيقول شاف ناس ملثمين بيخطفوا كارما و غرام و بيركبوهم عربيه غصب عنهم .
شعر مازن بقبضه قويه تعتصر قلبه حتى أن أنفاسه أوشكت عن الانقطاع و سقط الهاتف من يده فلم يلمح ذلك الذي دخل غرفته و هو يقول صائحًا بحماس
_ مازن انا عرفت هصالح غرام ازاي ؟
