Secret of Beauty

၉၄ ဘဝစရင်

ဘဝစတဲ့အရွယ်ရောက်ရင်
=====

         ကျွန်မတို့ပတ်ဝန်းကျင်မှာ အသက်လေးဆယ်မှ ဘဝစတယ်လို့ ပြောလေ့ရှိကြပါတယ်။ ဒီတော့ ဘဝစတဲ့ အသက်လေးဆယ်အရွယ်ကနေစလို့ ရှေ့လျောက်ဘဝမှာ ကျန်းမာနေဖို့ ပိုလိုအပ်လာပါတယ်။ ယေဘုယျအားဖြင့် ကျန်းမာနေတယ်ဆိုရင်တောင်မှ မိမိရဲ့ကျန်းမာရေးအခြေအနေကို စစ်ဆေးမှု(check up )ပုံမှန်လုပ်ဖို့အရေးကြီးပါတယ်။အသက် ၄၀ ရောက်လာတဲ့အခါ ပြုလုပ်ဖို့လိုအပ်တဲ့ ကျန်းမာရေး စစ်ဆေးမှုတွေကို ပြောပြချင်ပါတယ်။

(၁)သွေးတိုးရောဂါ
သွေးပေါင်ချိန်ကိုစစ်ဆေးသင့်ပါတယ်။ တကယ်လို့ Systolic blood pressure (အရပ်အခေါ် အပေါ်သွေး)ဟာ ၁၂၀ ကနေ ၁၃၉ ကြားရှိရင် Diastolic blood pressure (အရပ်အခေါ် အောက်သွေး)ဟာ ၈၀ကနေ ၈၉ကြားရှိရင် စိုးရိမ်စရာမရှိပါဘူး။ တစ်နှစ်ကို တစ်ကြိမ် သို့မဟုတ် ခြောက်လတစ်ကြိမ်လောက်ပုံမှန်ပြန်လည်စစ်ဆေးရင်ရပါပြီ။တကယ်လို့ အပေါ်သွေးဟာ ၁၄၀ ကျော်ပြီး အောက်သွေးက ၉၀ ကျော်နေရင်တော့ ဆရာဝန်နဲ့ပြသင့်ပါတယ်။ဆီးချိုရောဂါ၊ နှလုံးရောဂါနဲ့ ကျောက်ကပ်ရောဂါအခံရှိရင် သွေးပေါင်ချိန်ကို မကြာခဏစစ်ဆေးသင့်ပါတယ်။

(၂)Cholesterol (သွေးတွင်းကိုလက်စရော)စစ်ဆေးခြင်းနှင့် နှလုံးရောဂါကာကွယ်ခြင်း
သွေးတွင်းမှာရှိတဲ့ Cholesterol ကို ငါးနှစ်တစ်ကြိမ် ပုံမှန်စစ်ဆေးသင့်ပါတယ်။ အခြားကျန်းမာရေးပြဿနာများ၊ နှလုံးရောဂါ၊ကျောက်ကပ်ရောဂါများရှိရင်တော့ သွေးတွင်း Cholesterol ကို ဆရာဝန်ညွှန်ကြားမှုအတိုင်း ပုံမှန်စစ်ဆေးသင့်ပါတယ်။
(၃)ဆီးချိုရောဂါ
အသက်လေးဆယ့်ငါးနှစ်နဲ့အထက်မှာ ဆီးချိုရောဂါစစ်ဆေးမှုကို သုံးနှစ်တစ်ကြိမ်လုပ်ရပါတယ်။ တကယ်လို့သင်ဟာ ဆီးချိုရောဂါဖြစ်နိုင်ချေရှိတဲ့လူတစ်ယောက်လို့ သင့်ရဲ့ဆရာဝန်ကသတ်မှတ်တဲ့အခါ၊ သွေးပေါင်ချိန်ဟာ ၁၃၅/၈၀ ကျော်တဲ့အခါမျိုးတွေမှာ ဆီးချိုရှိမရှိကို စစ်ဆေးပါလိမ့်မယ်။

(၄)အူမကြီးကင်ဆာရောဂါ
အသက်လေးဆယ်ကျော်နဲ့ အသက်ငါးဆယ်အောက်ဆိုရင်တော့ အူမကြီးကင်ဆာရောဂါအတွက် မိသားစုထဲမှာ ရောဂါရာဇဝင်ရှိမရှိကနေစပြီး စစ်ဆေးရပါတယ်။ ဝမ်းစစ်ခြင်း၊ စအိုမှတစ်ဆင့် အူမကြီးကိုမှန်ပြောင်းကြည့်ခြင်း (Colonoscopy) ၊ Flexible sigmoidoscopy စသည်တို့နဲ့ စစ်ဆေးလို့ရပါတယ်။
(၅) သွားကျန်းမာရေး
တစ်နှစ်ကို တစ်ကြိမ်(သို့မဟုတ်)နှစ်ကြိမ် သွားကျန်းမာရေးအတွက် သွားဆရာဝန်နဲ့ပြသသင့်ပါတယ်။
(၆)မျက်စိရောဂါ
တစ်နှစ်တစ်ကြိမ် (သို့မဟုတ်) နှစ်နှစ်တစ်ကြိမ် မျက်စိဆရာဝန်နဲ့ စမ်းသပ်စစ်ဆေးမှုများ ပြုလုပ်သင့်ပါတယ်။ တကယ်လို့ သင်ဟာ ရေတိမ်ရောဂါဖြစ်နိုင်တယ်လို့ ဆရာဝန်က စိုးရိမ်စရာအချက်များရှိခဲ့ရင် သို့မဟုတ် ဆီးချိုရောဂါဝေဒနာရှင်ဖြစ်ခဲ့ရင် မျက်စိဆရာဝန်ရဲ့ညွန်ကြားမှုတွေအတိုင်း သွားရောက်စစ်ဆေးကုသမှု ပုံမှန်ခံယူရမှာပါ။
(၇)အရိုးပွရောဂါ (osteoporosis)
steroid ဆေးတွေသောက်ခဲ့ရင်၊ အရက်နဲ့ဆေးလိပ်သောက်တတ်တဲ့လူဖြစ်ရင်၊ ကိုယ်အလေးချိန်နည်းတဲ့သူဖြစ်ရင်၊ အသက်ငါးဆယ်ကျော်မှအရိုးကျိုးဖူးရင်၊ မိသားစုထဲမှာ အရိုးပွရောဂါ ရာဇဝင်ရှိခဲ့ရင် အရိုးပွရောဂါဖြစ်နိုင်ချေများပြီး စစ်ဆေးမှုခံယူဖို့လိုပါတယ်။
(၈)အဆုတ်ကင်ဆာနှင့် ဆီးကျိတ်ရောဂါ
လက်ရှိမှာ ဆေးလိပ်ဖြတ်လိုက်သော်လည်း ယခင်က ဆေးလိပ်စွဲသောက်ခဲ့တဲ့အမျိုးသားတွေကို အဆုတ်ရောဂါတွေရှိမရှိသိဖို့ Low dose computed tomography (LDCT)နဲ့စစ်ဆေးဖို့လိုပါတယ်။
အသက်ငါးဆယ်နဲ့အထက်အမျိုးသားတွေမှာလည်း ဆီးကျိတ်ကင်ဆာစစ်ဆေးဖို့ PSA blood test လုပ်ဖို့လိုအပ်ပါတယ်။ လူတိုင်းဟာ မိမိရဲ့ ကျန်းမာရေးအခြေအနေကို စစ်ဆေးမှု(check up )ပုံမှန်လုပ်ဖို့က အရေးကြီးပါတယ်။ ဒီဆောင်းပါးမှာတော့အသက် ၄၀ ရောက်လာတဲ့အခါ ပြုလုပ်ဖို့လိုအပ်တဲ့ ကျန်းမာရေး စစ်ဆေးမှုတွေကို အဓိကရေးသားလိုက်ရပါတယ်။
အားလုံးကျန်းမာပျော်ရွှင်ကြပါစေ။

#myDoctor
မောင်(ဆေး- 1)