مِشوار صغير

الصَفحَة الخَامسَة

-
"مَا رِدت أحبَك ، حَاولت"
-

اتُفَقنا ندرُس بَمكان واحِد والكُل اختَار بيّتَك كَونَه الأنسَب..

چَان الكُل مرَكز بِاللي بأيدَه ، جَماعة تحِل وجَماعة تشرَح
وآني ، مِثل ما تعَودت عيّوني.. چِنت مرَكِز بيّك

چَانَت الجِگَارة بايّدَك ، والنَار بگلبي..

-

بَعد ما بِدت تظَلُم الدنيا إجه الوَقت حَتى نروح
وَقتها ، چِنت مختنگ وچِنت آريّد آطلَع مِن هَالمَكان بأسرَع وَقت بس.. صِدَمني طَلبك!

گتلي أَبقى ، وآصريت.. بحُكم إنك تريد تشَوفني شي..

آول مَا طِلعَوا ، فِتَحت باب ثاني چَان بنِهَاية غُرفتَك وصحتني..

جَيت يَّمَك وطلَعت مِن هَالباب ، چَان مُطل عَلى مَساحة صَغيرة حَولها سياج مِن الجَوانب

المَنظر چَان خَلاب ، لَون السِما.. للأَن ببَالي..

گِعدنا ، ترَبعت آني وإنت إقترَبِت مِن الحَافة وخَليت رجلك تلامِس الهَوا

تَقدمت وبَاوعت جَوه وسألتَك
"ما تخَاف؟ اي حَركة وتوگَع"

جَاوبتني وإنت تباوعلي بنَظرة عِجزت أفهمها
"لا ، آني الي كِسَرت هَالجُزُء مِن السياج"
"آكرَه الحدود ، آكرَه كُل شي يوگَف بيني وبيّن رَغبتي"

همهَمت كَ إجابة وضَليت آفَكر ، ليش بعُمري ما قَررت أجازف؟

حَتى الأشياء إلي أَحبها.. فَضلت إنها تروح عَلى إني آجازف وآسعى إلها..

ضَليت تِدَخن ، ولأَوَل مَرة.. أگدَر أستسيغ ريحَة الجگاير.. وأحبهَا!

فَجأه إلتفَتت إلي وهَالمرة عَكس كُل مَرة ، سِمَحت لعيّوني تِغرَگ بعيّونَك..

تقَرَبت ، مَررَت آصَابعَك عَلى رموشي بكُل رِقة..
أرتخت عيّونَك وضَلمت الدنيّا..
وگلتلي شي مِن مِليّون شي مَا گِدَرت آتخَطاه
"عيّونَك هوسَة مَال رموش"

غَمضت عيّوني وبِلَعت الغَصة إلي إجتاحَتني فَجأه..
لِزَمت كَف إيّدَك المستريّح عَلى خدي ، بَاوعت بعيّونَك واستَجمَعت كُل شَجاعتي وگِلتها..
"مَا رِدت أحبَك ، حَاولت"

سحَبت إيدك مِن بيّن كَفي ، چَانت صَدمتك واضحة..
اندَاريت عَني وعيّونَك توَجهت للسَما..

دَقايق مَرت ومَحد بينا نُطَق
آخر شي گِلتَه إلَك قَبل ما آروح ، بآخِر نَظرة لعيّونَك..
"إنت تخَليني آبهَت"
حروف المَوادِع چَانت آزمة..

-

رِجَعت ، واول شي قَررت الجَأ إلَه.. سَريري
بيّومها ، نِمت وآني حَاضن قَميصي..
ومُمكن تخَيلتَه إنت'

چَان بي ريحتي.. وريحة جگايّرَك..
آني إلي يعوف الهَوا عَلمود دُخَانَك'

بيّومها سِرَحت وفَكرت.. حَبيّتَك بگَد مَا چِنت خَايّف آظَل وَحدي..

چَانت أَول مَرة أَنام
وصَدري خَالي
أَول مَرة مَا تمُر عَلى بَالي
أَول مَرة أگول إلي آريّدَه

أَول مَرة أَچذب بقصيَدة..