شدها من ايدها و ضغط عليها و قربها منه : كيف صار مش متفقين ما اطوليش و شويا و تروحي
عزيزة قامت راسها فوق و عيونها ع ملامحه كيف بس يقدر يحافظ ع هدوءه مع ان ايديه و سخونتهم و الرجفة اللي فيهم تقول عكس اللي ع وجهه : انسجمت مع البنات و بعدين انت معش روحت قلت احسن ما نقعد في الحوش بروحي
وصلوا للحوش فتحه
و هي خشت
طاهر : يعني بتقولي كل ما انا نطلع انت بتجي لحوش العيلة
عزيزة : علاش قصدك ممنوع !!
طاهر ابتسم وجبدها من ايدها حول الوشاح متاعها و حول التوكة اللي قايمة بيها شعهرها و فرده ع اكتافها و حول العباية رماها ع الصالون و اخر شي حول الوشاح اللي كانت مدرقة بيه رقبتها : مش ممنوع لكن خلي نشبع منك انا قبل نفهمك انا قبل و بعدها ياخدوا فيك حصة عادي لان اليوم وقت روحت و القيتك منسجمة في الهدرزة مع بوي حسيت اني مازال ما هدرزت معاك و لا عرفت عنك شي
عزيزة ضغطت ع ايده : شن رايك نتعرفوا الليلة؟!
طاهر مشى ايده ع خصلات شعرها : يا ريت
عزيزة : معناها نمشي نغير ع السريع و نجي نحط فواكه و نهدرزوا
طاهر : تعالي للبلكونة
هي بفرحة واضحة : عادي ؟!
طاهر ضحك: ههههه للدرجة هذه فرحتي .. يا ستي عادي لان الحيط عالي
عزيزة قامت القونة الطويلة متاعها و مشت بسرعة للدار
هو خذت عقله بالحركة اللي دارتها تنهد و مشي وراها
كانت تدور شني تلبس
قدم منها و خذي توتة خريفية لونها بلون امواج البحر اللي كلاهما يعشقه و اعطاها : البسي هذه
خذتها منه و مشت بسرعة من قدامه
طاهر : يا رب ... خذي توتة بذات اللون و مشي للحمام الثاني .. حاشاكم
هو سبقها و قعمز ع الكرسي يستنى فيها شويا و خش لان احني حاليا في نهاية شهر 12 يعني الجو صقع خذي بطانية و جابها
شويا و هي كملت طلعت للمطبخ بعد نظمت امورها حطت فواكه برتقال و تفاح و موز و كمثرى و حطت معاهم موس و حطتهم في صفرة و حطت معاهم منشف و مشت للبلكونة .. حطت المترد متاع الفواكه قدامه : تفضل
هو فتح الباطنية و جبد الكرسي جنبه : تعالي صقع
و هي جت ع طول جنبه و لا اراديا لان الدنيا مسقعة قربت منه و شدت فيه : صقع ... تعرف اني نحبه
طاهر يشبح لكل تقاسيم وجهها : مني اللي تحبيه
هي وجهها تغير للاحمر : الصقع يعني انا من الناس اللي نحب الشتاء بكل تفاصيله المطر و الصقع ريحة التراب بعد المطر و يا سلام لو كان في ثلج
