بعد مغادرة عيلة الشريف ...
وصلوا الاولاد كلهم و اجتمعوا مع مفتاح في الصالة يتناقشوا
محمود : الخسارة كبيرة يا بوي و انا من رايي ما فيش حل غير نبيعوا المزرعة لان الباقي لو بعناه فيه خسارة و اصلا مش ح يخلونا نتصرفوا فيه حاليا
ماجد : كم قيمة الديون عندك في المحل
محمود حاس روحه مضغوط فوق الوصف : تقريبا ####
مفتاح : اللهم اجرني في مصيبتي و اخلف لي خيرا منها
ماجد : مبلغ كبير و المشكلة ان لو صار و قدرنا نشدوا الغفير و نبوا انطلعوا طاهر لازم من كفالة و اكيد ح تكون مبلغ كبير ...هذا كلام عبدالحكيم
منوبة : خوذوا ذهبنا بيعوه شني بنديروا بيه و طاهر ماهناش
عويشة : اي اي زي ما قالت عمتي نبيعوا الذهب كله
مفتاح: قداش بس بيجيب الذهب تحسابوه ... نعرضوا المزرعة للبيع المشكلة في الوقت بس و الناس ما ترحمش وقت اطيح بيك
لطيفة تواسي في خوها : وكل امرك لله يا خوي و باذن الله محلولة ان شاء الله كل واحد يعطي شوي مش ولدنا هو ماهو ياما وقف معانا من قبل
مديحة تمسح في دموعها : عمره ما تخلى عن حد طاهر ديما ايده للخير وخيي .. حتى انا منبيع الحوش يا بوي اصلا هوا اللي خلص قيمة القرض كاملة ع شان يخلصني من الربا
مفتاح : لا يا مديحة الحوش لصغارك مستحيل نبيعه خلوني نشبح المزرعة قداش تجيب قبل
محمود : و انا هذا رايي ان شاء الله نسكروا بيها الديون و تسد العجز متاع البضاعة اللي حجزوا عليها نقدروا شوي شوي نوقفوا من جديد و لو طلبوا كفالة لطاهر وقتها نقدروا ندبروا فيها
و عزيزة وقت سمعتهم معش تحملت و مشت و خشت للدار طلعت الشيك اللي جابه عمها و خشت عليهم
كلهم سكتوا قعمزت جنب مفتاح
الكل كان مستغرب فيها : عمي الشريف اليوم يبيني نروح معاه خاف نكون مصدقة الكلام في طاهر ... و طاهر من مدة طلب مني وعد اني نقعد في الحوش و ما نطلع منه وانا وعدته بالشيء هذا و مش ح نمشي الا لو انتم مش حاسبيني من العيلة
مفتاح : شني تقولي يا بنتي والله العظيم حاسبك زي بناتي و ما عمري عاملتك غير هكي و حتى امي و عويشة قدامك ما انظني في حد من الموجودين دارلك شي ع شان تحسي انك مش من العيلة او ان احني ما نبوكش بينا
