(لللعلم اليوم مش ح نقدر انزل تابع اعذروني ❤️❤️❤️)
ثاني يوم كان حافل بكل ما تعنيه الكلمة......
في اللي من صلاة الفجر توجه لمكان معين مش قادر يصبر
وصل و وقف ع ذات الصخرة تذكر اخر مرة جو لجدايم مع العيلة وقت خذاها ع جنب و وقت عطاها فطورها الخاص كلامهم كيف شد ايدها كل تفصيل كان يخطف في انفاسه مش قادر يمنع نفسه عنها و لا قادر يصبر اكثر
سمع صوت سيارة ابتسم و بدون ما يلتفت عرفهم خوته ....
و لحقوه رفقاءه لذات المكان في مكانهم اللي اعتادوا انهم يجوه و ليهم فترة طويلة عليه: وراك وين ما تمشي
طاهر ضحك: ههههه اصلا نستنى فيكم من بكري
محمود : صباح الحرية
طاهر استنشق هواء من اعماقه : فعلا صباح الحرية الحمدلله
تلى كلامه هذا لحظات صمت ....كانوا الثلاثة واقفين
محمود بدي الحديث : كيف بس مش مصدق انا هذا اللي بيهبلني !! معاك ممكن خذوها من الحوش غصبا عنها لكن كيف بيسفروها برا غصبا عنها مستحيل
طاهر ملتزم الصمت و يسمع ...
ماجد حاول يمسك العصا من الوسط : انا ممكن لو مكانك ممكن ننفعل في لحظة و صارت معاي من قبل و شكيت لكن بعد نقعد بروحي و نفكر و نحسبها نقول معاك حق
اهني طاهر قرر يفضي ما في جعبته: اشبحولي كويس و افهموا معنى الكلام هذا ... اللي تحكوا عليها لا هي اللي مراتي و لا هي اللي حبيبتي هذه "اشر ع عروقه" شبحت العروق هاذين .. لو هن يقدرن يخونن هي تخون ... و لو هن عليا هانن هي تهون لو عشت انا من غيرهن هي مع غيري تكون ... هذا الكلام اللي عندي راهي بنتي راهي رباية ايدي عارف المفروض الكلام هذا ما نقوله عارفين شني يقول محمد حسن وقت طلق سراح طيره وين ما تريد تعدي عدي ليش لان قال ربيتك ع يدي و عارف مرجوعه ليه زي اللي يربي الحمام يطير يطير و يرد لمكانه و هي مكانها عندي في حوشي بين ايديا و انا عارف شني نقول كويس
محمود راسه ملخبط : ما فهمتش كيف قادر تفكر بالطريقة هذه و مازال تحبها و هما قالوها في وجهك تزوجت و سافرت لخوها
مش هكي الرسالة اللي وصلاتك منهم
(و هذا كان بداية انتقام خوتها منها يعني دايرين روحهم بيوصلوا فيه و يقتلوه بس وقت ضاقت عليهم ما كان منهم الا يديروا هكي و محمود و عيلته عرفوا عن طريق المحامي لان هو وصل الرسالة بايده بعد وصلاته عن طريق شخص حاطه حمزة وراء اهل طاهر )
طاهر بدي يضحك و شاد بطنه لعند طبس : ههههههههههههههه اي اي .. لو نشبحها بعيوني ما نصدق الكلام هذا عارفين انا شني درت فيها قلبها هذا بايديا هادينا فصلته تفصيل وفي وسطه بالضبط زرعت حبي و كبر يوم ع يوم جذوري فيها اصلي فيها دمي فيها الهواء متاعي فيها كلي فيها ... وانا عارف شني نقول "خذي نفس عميق " و متأكد زي ما نشبح فيكم انها من العظمى لا طلعت و لا سافرت قاعدة و ما نكون صقر حر لو ما القيتها و بايدي رجعتها و حقها في رقبتي انا اللي نرده... و بعدين في شي غايب عنكم انا طلاق ما طلقتها كيف تتزوج غيري و هي مازال ع ذمتي و لو فرضا ان الطلاق الرسمي اللي في المحكمة نافذ و مشي كيف تتزوج و هي مازال في العدة كلام مش منطقي هذا غير جواز سفرها اللي مازال في حوشي مسكر عليه
