سبينا من كلام الناس (مكتملة)

الفصل الاول

صلوا على رسول الله صلى الله عليه وسلم 🌎💛

متنسوش التصويت ورايكم وشير كتير عشان رجعنا تاني  مع ليان وكريم هنضحك ضحك ونعيط بردو مش حرماكو من حاجة🤭🤭🤭😂😂😂❤

:صدفة غريبة مش كدة

بصيت لمكان الصوت وبعدين تأففت ولفيت وشي وانا ماشية وبقول: حركات عيال علفكرا

مشي ورايا وهو بيقول: انا مش بمشي وراكي هى صدفة فعلا والله وكأن القدر كتبلنا نتقابل كل شوية

وقفت وانا بلفله وبقول بنفذ صبر: خير يا كريم جو النحنحة دا مبيدخلش معايا لخص وجيب من الاخر

كريم بابتسامة: منا قولتلك بحبك وعاوز اتجوزك

بصتله من فوق لتحت وقولتله بسخرية: كريم روح اتجوز واحدة من سنك يا بابا ..جو المراهقة دا مش معايا سبني فى حالى الله يباركلك ..عيل مراهق

ومشيت ...مجاش ورايا ..صراحة ليه حق ميجيش ...انا شاغلة نفسي لي ...انا تعبت

نسيت اعرفكم نفسي انا ليان ٢٨ سنة دكتورة نفسية  عايشة لوحدي والدتي ووالدي متوفين معنديش غير اخت اكبر مني اسمها يارا واتجوزت ومسافرة برة مصر مع جوزها وعندي اصحابي صحبة جميلة اوي تحب تقعد معاهم واللى انتو شفتو دا كريم ٢٣ سنة  كنت فى المول بيجيب حاجات نقصاني ولقيتوا طاببلى زي كل مرة ..تعارفنا كان غريب شوية ابن صاحبه كان عنده توحد وكان عندي بيتعالج وهو اللى كان بيتابع معايا حالته ..والدته ووالده منفصلين  وكريم كان صاحب والد محمد الصدوق وهو اللى اقترح ان محمد يروح لدكتور نفسي وصراحة مشغلتش بالى بكل دا ..  انما حالة محمد(ابن صاحبه) كانت صعبه كان عنيد اوي انه يتكلم ..بيثق فى الناس بصعوبة وانطوائي بطريقة رهيبة بس على مين قعدت معاه شهرين ١٦ جلسة اكتر حد اخد فى ايدي وقت والحمد لله خلص من اسبوعين اتعافى وبقى كويس واستاذ كربم دا بقى استلمنى كل شوية الاقيه ناططلى بحجة شكل وفى الاخر يقولى بحبك وعاوز اتجوزك ..الحوار مش ناقص عبط يا جدعان ..دا اتجوزا اربيه يعني ولا اي ..

وصلت الكافتيرا ولقيت البنات اصدقائي الصدوقين من ايام اعدادي والله الواحد ما مصدق تعالوا اعرفكم على اسامهيم وشخصيتهم هتكتشفوها انتو بقى
هما ٤ سارة ويمنى و ايلين و أمل وانا بس كدة😂😂😂😂 سخيفة انا

: انا جييييت ...قولتها وانا بسحب كرسي وبقعد
إيلين: متأخرة كالعادة
: انا كنت جاية بس كالعادة
سارة بصدمة : لا متقوليش اللى فى بالي
: اللي فى بالك ياختى
يمنى :هو فى اي ما تتكلموا من غير الغاز
:مفيش يا جماعة كريم تاني
أمل وهى وتقطم السندوتش: والله كريم دا صعبان عليا دا انت قلبك قاسي قوي
:امل بقولك اي خليكي فى سندوتشك ومتتكلميش وانت بتاكلى شكلك مش لطيف
سارة بفضول:ليلو بقولك اي فكك منهم واحكيلى
:البت دى بتموت فى الحكاووي اووي
إيلين:انت هتقوليلى
سارة:يا ليان بقى
:مفيش يا سارة والله جي ورايا ويقولى بكل سماجة العالم قولت وانا بقلده ( صدفة غريبة مش كدة) انا عارفة اصلا انه ماشي ورايا شوفته من اول ما نزلت من البيت
يمنى: طب دا شكلوا بيحبك بجد
: يا بنتي حب اي دا انا اكبر منه ب خمس سنين ..عارفة يعني اي يعنى لما انا كنت فى كي جي تو كان هو لسا مولود
إيلين برزانة: السن ملوش علاقة يا ليان ..دا فكر مجتمع عقيم ..زمان كانو بيتجوزوا اصغر منهم وبيعيشوا