اخترتك من الناس للقلب خله🤍

البارت٦

عبير بعد ماسوت القهوه وعطتها عزيز طلعت من المطبخ متجهه للمجلس سمعت ام مفلح تتكلم مع ام صالح
ام مفلح: الله يعينهم عندهم بنت معاقه اكيد ام سلطان مسويه شي وربي بلاها
ام صالح: ياحسرتي على البنت من يتزوجها وهي معاقه
ام مفلح: ان شاء الله تموت وتريحهم
عبير انصدمت من اللي سمعت وكيف انهم قاعدين يسولفون في بيتهم ومااحترمو اهل البيت سكرت الباب بقوه عشان يسكتون ويحسون انها جت
ام مفلح: بسم الله الباب بشويش سكريه
عبير: اوهه ماانتبهت انتتس موجوده
ام مفلح: يعع ماتصلحين لولدي مااحب البنت الفاهيه
عبير بصوت حاد: من قال لتس اني ابيه
ام مفلح: ولدي الف بنت تتمناه
عبير: اللي تتمناه ماعز وانا مو ماعز عشان اتمنى خروف
ام مفلح: ياويلي طويلة لسان بعد
عبير: لاتطولي لسانتس عشان مااطول لساني
ام مفلح: الكلام معتس ماينفعني
عبير: ايه لانتس ماتفهمين
راحت عبير للمجلس وضايق خلقها نادت نوف بالمطبخ
عبير بعصبيه وعيونها مليانه دموع: تخيلي تقول يارب تموت وتريحنا وتقول من يبي يتزوج معاقه وتقول ان امي اكيد مسويه شي وربي بلاها
نوف حزنت: عبير هدي هدي موكذا تسوين بحالك لاعليك منها بكره ربي ياخذ حقتس وحق اختس

عند العيال بمجلس الرجال
سلطان: عزيز رح عط الابريق عبير تسوي لنا شاي
عزيز: ليه بس انا ليه ماتروح انت
سلطان: رح يلا
عزيز: ابشر
راح للمطبخ ومعه ابريق الشاي قبل لايتهور ويدخل سمع صوت عبير ونوف وشاف طرف فستان نوف من زاويه الباب عزيز :
حتى طرف ثوبك يجيب أقصاي..ياحلو صوتك وتفاصيلك
سمع نوف وهي تقول لعبير: صدقيني ربي راح يجبر بخاطرك وربي مايخلي حق احد
تنحنح عزيز : اءحح ياعبير الشاي بالله
ضحكت عبير بخبث وغمزت لنوف: ابشر ياخوي ماطلبت شي
نوف انقهرت من حركه عبير
وطلعت من المطبخ وهي معصبه ومقهوره
عبير حست انها جابت العيد بس مايهم اهم شي عند عبير انها تظبط علاقة عزيز ونوف عشان هي ونوف يسكنون في بيت واحد
عبير راحت لنوف وهمست: نوف تعالي ابيتس
نوف: خير وشتبين
عبير : امشي معي
راحت للمطبخ مع عبير
عبير: نوف مو معقوله زعلتي
نوف: ابد والله جالسه اللعب
عبير: يااخي ترا وري ماكنت اقصد والله كانت عفويه
نوف: اايه تقولينه يالعفويه
عبير: نووففف ياربي خلاص اسفه وربي مااقصد
نوف: تمام تمام سامحتتس
عبيرحضنت نوف حضن اللي راجع لامه بعد غيبه حضن الشخص المليان بالكلام حضن الشخص المشتت حضن الشخص التايه بين افكاره
نوف: ياربي خلاص كسرتي ضلوعي شفيتس
عبير : يوهه ماحسيت
نوف: امشي نروح للحريم
عبير : الحريم راحو بس باقي السوسه ام مفلح
نوف: يعع حومت كبدي
عبير: وكل سوالفها عن ولدها اللي كل بنت تتمناه وهو لا وحده تتمنا تكون زوجته
نوف: عبير لاتضحكين عليهم بعدين ربي يبلاك تكفين لا
عبير: ابشري
راحت ام مفلح واجتمع العيال وابو سلطان ابو سعود بالصاله وكان البنات وامهاتهم موجودين
نوف اللي كانت مستحيه من عزيز بعد الموقف اللي صار
عزيز لاحظ الخجل والحيا بنوف وكيف انها جالسه وراء امها وعبير عشان مايشوفها قال:
نور القمر واضح لو تغطيه الغيوم

عبير: عمه ام سعود اليوم نبي نوف تنام عندنا انا وريم
ريم: ايه ياعمه من زمان مانمنا مع بعض
ام سعود: خلاص تم

راحو البنات للغرفة مبسوطين اشتاقو للجلسه والنوم مع بعض
______________________

كلنا نسأل كيف ريم كيف كان وضعها بالعزيمه هل انبسطت او تضايقت وكثير اسأله تدور برأسنا
ريم حاسه انها غريبه الجميع كان ينظر لها نظره يعصب تفسيرها كان صعب على ريم انها تواجه المجتمع وكان يصعب ايضاً انها تقبل بنفسها وهي هكذا تواجهه صعاب كثيره بتخطي كلام المجتمع عنها ونظرات المجتمع والكلام الجارح الذي يقوله البعض وكأنه هيناً وسهلاً لايعلمون ان كسر القلوب عند الله عظيم لاتقل كلام يجرح شخصاً كي لايأتي شخص ويجرحك جرح عظيم

في غرفة البنات بعد العزيمه بدأ الحش
عبير: ريم ان شاء الله انبسطتي اليوم
ريم: ايه بس ام مفلح ازعجتني شوي
نوف: الله ياخذها ماخلت احد بحاله
ريم: ايه على طاري شفتو شهد كيف متغيرهه
عبير: ايهه خربانه بعد العرس
نوف: الاشقر ابد مو مناسبها مخربها بزياده
ريم: شفتو سميره يويلي ياانها نحفانهه
عبير: ايه يقولون حالتهم الماديه ماشش
نوف: ايه يويسي الله يفرج همهم
عبير : امين ويرزقهم ان شاء الله

تعالو نتعرف على بيت سميره
سميره هي الام الله يرحم حالها مره تعبت بالحياه
زوج سميره اسمه ناصر الحياه لاعبه فيه لعب
وولدهم الوحيد علي دامه الوحيد مكروف كرف من الابو من الام من الشغل
وهند البنت اللي تنازلت عن حقوقها لان احوالهم الماليه ماتسمح
هذي العائله الفقيره المعروفه عند الناس
علي يشتغل ثلاث اشغال باليوم عشان يطلع قوت يومهم يشتغل عامل في محل ويشتغل مقهوجي في شركه ويشتغل في دكان ابوه يعني الضغط عليه بشكل كبير وبكذا اتعرفنا على عائلة ابو علي

في بيت ابو مصلح
ابو مصلح: اسمعي بكره ابي اعزم ابو سلطان
ام مصلح استغربت : ابشر بس ليه
ابو مصلح عصب شوي: بدون ليه واسأله مالها داعي
ام مصلح انخرشت شفيه عصب: ان شاء الله
ابو مصلح: ايه عفيه على الحرمه اللي تسمع الكلام