✖️🖤انتقام عاشق 🖤✖️. باللهجة الجزائرية

🕯️part 5🕯️

وصلت نجاح لدار لقات امها فلمشينة تخيط و اختها صغيرة جالسة تلعب بالالعاب تاوعها
نجاح : ماما الله يعاونك
خديجة : يرحم والديك
طلعت نجاح لبيتها لبست بيجامة و لمت شعرها كوت دو شوفال و عيطت لسامي
نجاح : الو سامي
سامي : الو صافا عمري
نجاح : سامي بغيت نقولك على لخطبة ....
قاطعها سامي
سامي : خلاص ياك قتلك غدوا نجيب يما و نجي
نجاح : لا لا سامي متجيش
سامي : صايي قتلك غدوا نجي مالكي زعفتي
نجاح و هي شادة لبكية معرفتش كيفاه تقولها له
نجاح : قتلك متجيش انا نحب واحد اخر و راه جاي يخطبني غدوا
سامي : ماربك تهدري كيما هاك قتلك غدوا .....
و هنا قاطعاته بصوت عالي باش تكوبي
نجاح : سااامي قتلك منحبكش نحب واحد اخر علاه مبغيتش تفهم
سامي : رواحي لجاردان تاع *؛: نهدرو غايا تم و تفهميني شاكاين
نجاح : كلشي راه باين انااا منحبكش فهمها نحب واحد اخر
و كوبات عليه هو ضرب تيليفون على لرض
سامي : مالربها هاذي
عاود عيطلها مرفدتش
عند عبدو وصل لدار دخل طلع لبيته دوش لبس شورط و قعد يدور هاك حل قرعة تاع ليموناد صغيرة شرب منها شوية و حطها مبعد شعل ڨارو و قعد يتفكر فالاحداث لي صراو و يتفكر فنجاح من جهة واش ذنبها بصح هو يحبها و مراحش يضيع هاذ لفرصة و من جيهة ينتقم لخوه من سامي جبد نفس طويل من لڨارو و نفخه حتى تدخل نارمين لابسا شورط و تريكو نواغ قعدت قدامه و هو يتبع فيها بعينيه
نارمين : ايوا عبدو ڨاع مفرحتش بيا
و ذبلت عينيها تاع زعفت
تبسم تبسيما تاع لعيا و طفا لڨارو فسوندريي
نارمين : واش بيك راك عيان ؟
عبدو : واه شوية بغيت نرقد
نارمين : ايا داكور انا نخليك تريح بسياسا نڨسرو هههه
عبدو : هعهه
خرجت و هو رقد يخمم لغدوا خصه يهدر مع امه

كانت خديجة تعجن فلمطلوع بعد ماكملتهم و هوما حاميين يشهيو عيطت لنجاح
خديجة: نجاح نجاح رواحي
غسلت نجاح يديها من لبطاطا لي كانت تقشرها و راحت لعندها
نجاح : مالكي ؟
خديجة : عجنت لمطلوع هاكي دي شوية لطاطاك حجرية
تفكرت عبدو نفخت
نجاح : ماما زيفطيهالها مع ريتاج راني لاهية
خديجة : لا تعرفي ريتاج كي دارة تخاف تروح مع صحاباتها ياكلوها و تولي ههه تعرفي ختك
نجاح : اففف ماما خلاص متديلهاش راني لاهية
خديجة شافت فنجاح نظرة تقتل
خديجة : منعاودش لهدرة هاهوماك فوق طابلا ديهم
نجاح: اففففففف
نحات طابلية شغل و لبست جلابة خفيفة و رفدتهم و خرجت شافت لوطو تاع عبدو مڨاريا زادت كرهت خايفا يلا تقابلة
فعاداك لوقت عبدو كان ناض و فلكوزينة يتقهوا غسل يديه و جا خارج
عبدو : ايا ما راني خارج
حجرية : الله يسهل ولدي
نارمين : جيبلي شوكولا معاك ههه
عبدو: ههه خلاص
جا خارج حتى سمع صونات لباب حل لباب لقاها واقفة لابسة جلابة غوز معا هي قصيرة بغا ياكلها تبسم معاها و هي تلفتلها و حست سخانة طلعتلها ههه نزلت راسها و هدرت معاه
نجاح : ااا... شي طاطا راها هنا
عبدو شاف فيها ملفوق للتحت
عبدو : يما تكلمي
عيط لحجرية و خرج بلا مايهدر معاها ركب لوطوته و راح
جات حجرية عندها
حجرية : ااه نجاح كيراكي دخلي
نجاح : لا طاطا غير منا راكي لاباس صحاب دار غايا
حجرية : لحمد لله بنتي و نتوما كيراها خديجة
نجاح : لاباس لحمدلله
جات ياسمين
ياسمين: ياعمري شكون جات
سلمت عليها
ياسمين: كيراكي صافا
نجاح: لاباس و نتي
ياسمين: لحمد لله ماكيش تباني راكي تخدمي
نجاح : ايه مع لاكوافيز نسلكو راكي شايفا
ياسمين: ايه مليحا لخدما تعاوني روحك ربي يوفقك
نجاح : آمين .... جبتلكم مطلوع دارته ماما
حجرية : ااه مرسي بنتي سلمي عليها قوليلها قاتلك حجرية الله يحفظك
نجاح : بصحتكم
ولات نجاح لدارهم و حجرية غلقت لباب حطت لمطلوع فوق طابلا و جمعت معاهم
فريدة : شكون هاذي
حجرية: هذي نجاح بنت جارتي شحال تعجبني شابة و عاقلا
ياسمين: ايه مليحة بزاف مام انا نبغيها
نارمين : اممم صح شابة
بعد ماكملت نجاح شغلها حطت طابلة يتعشاو قعدت فلكرسي و امها مقابلتها و اختها قاعدة ثاني يسناو فخليل قعدو ثواني ساكتين
خديجة : افف راح نعيطله
عيطتله رفد عليها و قالها عندي شغل غير تعشاو
خديجة: كولو مش رح يجي
قعدو ياكلو فصمت حتى قررت نجاح تحكي لامها فموضوع لخطبة
نجاح: ماما
خديجة: ايه
نجاح : غدوا جايين يخطبوني
خديجة: كيفاه.... شكون ؟ و علاه مقلتيليش قبيل حابا تهبليني نتي... دروك ناس تقول هاذ لهدرة
نجاح : خلاص ماما ملقيتش لفرصة باش نقولك
خديجة : شكون هاذا
نجاح : ليوم عيطتلي اسراء بنت طاطا حجرية و قاتلي عبدو راه حابك اذا راكي قابلة يتقدم و انا شفته راجل ناس ملاح و نقدر نعيش معاه و انا قتلها ايه
خديجة : ايه امالا غدوة نوضو صباح و نظفو لحالة و نوجدو
تبسمت نجاح
ريتاج : نجاح غادي تتزوجي
نجاح تبسمت على برائتها خايفة من واش جايها مع عبدو هي ماحاباش تتزوجه مي الله غالب جا سامي فلوسط