سكتت وجد وطلع عقاب وهو يفكر اذا وعد كاشخه عشانه!؟ ولا لا وليش مقهوره وجد انها كشخت!؟ قرر يروح يتطمن على خليفه ومنها يشوف هالكشخه اللي يقولونها
وهو بعمره ماشاف وعد ولا يدري كيف شكلها لكن كان كارهها خلقه ولا يهمه شوفتها وطول عمره ما لمحها حتى لمحه على كثر الاحداث اللي بينهم ماعمره شافها
فتح باب الغرفه ودخل ما دق الباب ولا كلف نفسه يستاذن شافها صاده وهي معطيتها ظهرها وجالسه على السرير ولا يشوف الا سواد شعرها اللي غطى معالم ظهرها لكن سمع صوتها تقول : ابد والله ما غلطت يوم قلت انك همجي ورجعي !؟ انسان طول بعرض ماتعرف تدق الباب
احتدت ملامح عقاب وقال: ايه وانا ما غلطت بعد يوم قلت ان لسانك طويل ويبي له قص ويبي لك تربيه من جديد
وقفت وعد ولفت عليه بكل شموخ وهي تناظره بإستهزاء وضحكت وهي تأشر عليه : انت ؟ بتربيني انا !! ياكبر احلامك يا عقاب .. صدقني بتنكسر يدك وينقطع لسانك قبل تفكر تربيني
كانت مثبته عيونها بعينه اللي جمدت لا ترمش ولا تحرك ومو بس عيونه لا حتى انفاسه انقطعت وهو يطالع فيها من فوق لتحت !؟ وعمره ماتوقع وعد بهالشكل ابد وعمره ما هقى انا فاتنه وجميله لهدرجه ! ولا اكتفت لا كانت ثقتها ولبسها ومكياجها البسيط طاغيه مع جمالها
كان فيها شموخ مرعب
وتوه عقاب عرف ليه وجد مقهوره ومن حقها تنقهر دام وعد داخله بكل قوتها
لكن على طاري وجد صحصح عقاب واحتدت ملامحه من جديد وقال: كلامك هذا كله ماينفعك وصبرك علي ايام بس وصدقيني انتي بنفسك بتستسلمين
صدت وعد وهي تضحك: قواك الله ويلا لو سمحت تفضل برا بنوم ولدي ولا ابيه يشوفك قبل ينام وتفجعه
تقدم عقاب وسحبها من يدها بغضب وهو يقول بهمس غاضب : اقصري لسانك احسن لك
سحبت وعد يدها منه بكل قوه :اقسم بالله يا عقاب لو مديت يدك مره ثانيه لاقلب الدنيا على راسك
ماكان الكلام يستفز عقاب كثير لكن كان يبي يقرب وبيشوفها من قريب لكن مو بس شافها لا اختنق من عطرها اللي قوي بقوتها وريحة العود والبخور اللي انتشرت حوله بمجرد ما تحركت وعد بقوه بغضب
اخذ فتره يناظرها بغضب وقال يهون على نفسه: يكفي اليوم ! بكره نشوف وش نسوي معك
طلع وصفق الباب وصدت وعد بغضب وهي تمسح يدها من مسكته بغضب وراحت تبدل وهي تدعي عليه بنفسها وبعد جهاد قدرت تنام مع خليفه
لكن عقاب رجع لوجد لكن كان في ذهول وهو يتذكر ملامح وعد للحين مستحيل يصدق ان هاذي هي وعد العوبا لا شعورياً قال( وانا اقول وش فيه مبارك خضع وانهبل..! ما الومه المسكين دامه مقابلها كل يوم بكل هالقوه والزين ..! لكن ماهي على عقاب ) .
وجد: عقاب وش فيك !؟ عقاب : مافيني شي بنام تعبان
وجد : بس مب على اساس نسهر
عقاب : خليها بكره
بدل وانسدح وهو يفكر كيف بيتعامل معها وواضح انه صعب من الحين
_______________________.
وفي بيت ضاري
رجعوا من الزواج وكان ضاري جالس وهو يشوف مضاوي جايه بعد مابدلت وجلست قدامه وهي تقوله عن اللي صار مع وجد
ضاري: ليه تشمتين فيها
مضاوي: استغفرلله ما تشمت بس انا صادقه زواج الغوالي عقاب غالي ووعد بعد
واصلا المفرروض انهم متزوجين من زمان بس مبارك الله يرحمه دخل بينهم ولا عقاب كان يحب وعد من قبل
ضاري : على كيفك !؟ مضاوي : لا وللله صادقه بس محد يعرف الا انا
ضاريي:قايلك عقاب شي!؟
مضاوي : لا بس اكتشفت انا
ضحك ضاري : حمدلله والشكر ما تقولين انهم مايطيقون بعض
مضاوي: وعد اللي ماتطيقه بس عقاب اخر الفتره شفته مهتم فيها قبل كان مايطيقها بس فجأه صار يبيها
ضاري : انا اقول انك تتوهمين ماهقيت عقاب يبيها ! عقاب يبي ولدها وبس وعشان بعد مبارك كان صاحبه زاد همه وصار يبي يتزوجها
مضاوي : المهم تزوجها وبيحبها اكيد وهي بعد بتحبه
ضاري: وش دراك
ضحكت مضاوي : ادري !؟ كنا مثلهم
دفها ضاري بضحك: لا تذكرين هاذيك الايام وبعدين احنا غير ولا عاد تشمتين ما تخافين الله يبليك واتزوج عليك
تخصرت مضاوي : تزوج علي!؟ معصي والله لو تزوج علي لا اشق ثوب العزا ( نوع من التهديد)
ضحك ضاري: تهدديني بعد! لا ماعليش كل ذا لو صار بيصير بسبة لسانك
مضاوي : اصلا ما تقدر تزوج علي
ضاري : ليش ان شاء الله وش ناقصني يد ولا رجل
ضحكت مضاوي بعبط: ناقصك قلب ياحبيبي ان كنت ناسي افكرك قلبك معي ياحبيبي
ضحك ضاري بعجب : اي والله انه معك ولاعندي اعتراض
ابتسمت مضاوي بحب وهي تقول: يعني متعادلين ترا كلٍ سارق الثاني
ابداً مافكر يرد ضاري بكلام لانه يدري انه بيتعب ما يجري لسانها ابد ماكان يقدر يعبر اكثر الا انه يغرق ويغرقها بحبه
_______________________.
ومن بكره
في بيت ابو نادر صحى نادر على دق الباب ولف وشاف شوق في نومها اللي تعود عليه من فتره اعتدل وهو يبعد الكتب اللي نام وهو يقراها ووقف يفتح الباب وشاف امه واقفه ببتسامه : نايمين يمه !؟
نادر: اي خذتنا النومه
ام نادر: زين يمه يلا اصحوا ترا الفطور جاهز وننتظركم
نادر: ابشري
راحت وسكر الباب وهو للحين ماهو مصدق ان امه تغيرت
