سلسلة اسكريبتات

سكريبت 5

_ هو الجواز حلـــو؟

=ردت عليها صاحبتها باستغراب وقالت: ليه السؤال دا؟

_ عايزة أعرف رأيك، ومش أنتِ أول واحدة أسألك.

=طب اللي قبلي جابوا بإيه؟

_ قالوا لأ.

=ردت صاحبتها ببسمة: ضحكوا عليكي.

_ قالت باقتضاب: إزاي؟

= صاحبتها خدت نفسها ورجعت بضهرها وسندته وقالت: عشان الجواز حلو مش وحش.

_ قالت باستغراب: تعرفي أنتِ الوحيدة اللي إجابتك مختلفة عن باقي الإجابات اللي سمعتها.

=عشان دي الحقيقة واللي هما مش شايفينها، هما بيمشوا ورا كلام الناس اللي قالوا كدا بدون تفكير، يعني بنوا الجواز عن إنه مش حلو، لكن بالعكس مش شايفين الجانب الإيجابي والحلو فيه.

_ سألت بحيرة: لأ وضحيلي أكتر بعد إذنك؟

=قالت ببسمة: عيوني.

_ يسلمولي.
بقلم إسراء إبراهيم
(إيسو إبراهيم)

=بصي يا حبيبتي مش هقولك إن الحياة بتبقى وردي وكدا، لأ بيكون في ظروف صعبة ومشاكل، لكن بتعدي لو الطرفين إيدهم في إيد بعض، ووقت الخناق يكون بينهم مودة ورحمة.

_ اها تمام بس إزاي بردوا الجواز حلو، رغم لما أقابل واحدة ألاقيها بتقولي إنها زهقت من العيشة والعيال وطلباتهم ودا تعبان ودا شقي وجوزها عصبي وحاجات من دي كتير.

=استني عليا ما أنا جاية في الكلام أهو.

_ ماشي يا حبيبتي قولي.

=هما يا ستي بيبصوا للجانب السلبي بيبصوا للمشاكل اللي بتحصل، بيفضلوا يحكوا عن المشاكل والتعب والهم والقرف،والأيام الصعبة، ومش شايفين الجانب الحلو في حياتهم عشان يحكوا عليه، أو شايفينه بس مركزين عالجانب التاني السلبي.

_ طب إيه هو الجانب الحلو دا اللي المعظم مش شايفه؟

=هقولك حاضر، إن بيكون في هزار ما بينهم وضحك هو مش دايما بس فيه، ولا بيحكوا على خوف كل واحد على التاني وقت التعب أو لو في ظروف في الشغل ويهونوا على بعض.

ولو مثلا هى مضايقة يفضل يناغشها عشان تضحك وتفك ويشوفها مبسوطة والعكس كمان لو شايفة جوزها مضايق أو موضوع شاغل دماغه تفضل تناغشه أو تخليه يحكي وتحاول تهزر معه عشان تخرجه من القلق دا.

ولا وقت الخصام كل واحد من الطرفين بيتلكك عشان يفتح كلام مع التاني، وتلاقيهم بقى بيحكوا عن الوقت الصعب ومش بيذكروا كلمة السند دي.

_ بتسمع بتركيز وباهتمام وقالت: فعلا محدش عمره ذكر الحاجات الحلوة دي غير كلمة المشاكل اللي بيقولوها دي.

=فعلا مش بيذكروا مثلا غير وجع الولادة، ومش بيقولوا إيه الشعور اللي حسوه وقت ما حملوا أول بيبي ليهم في حضنهم وشموا ريحته، مش بيحكوا عن إحساس شعور الأمومة، ويفضلوا يقولوا دول متعبين أوي، رغم إن غيرهم نفسهم في ضفر عيل.

_ حقيقي.

=مش بيحكوا عن جمال إنك تكوني أم وزوجة ومسؤولة عن زوج وأبناء، لكن بيقولوا كل الوحش ويكرهكوا في الجواز

_ حصل.

=هما بيفضلوا يحكوا عن الوحش، ومش بيذكروا اللحظات الحلوة اللي بيعيشوها واللي بيفضلوا فاكرينها مهما مر عليها زمان

_ فعلا الجواز حلو، ما يقولوا الحلو أو يسكتوا أحسن ويسيبوا الناس تشوف حياتها.

=فعلا الجواز للي يختار صح، يختار شريك حياته، يختار الشخص الصح اللي من أجله هتضحي بحاجات كتيرة زي حضن أهلك، تختاري الشخص اللي هتحسي معاه بالأمان، بالشخص اللي هيعينك في دينك ودنيتك.

"الجواز مشروع ومحتاج هدف وتخطيط، عشان يستمر وينجح"

#بقلم_إسراء_إبراهيم
إيسو إبراهيم

لو عجبكم اعملوا فوت وكومنت لطيف