سلسلة اسكريبتات

سكريبت

اطلقت بسبب أمها، راحتلها عالبيت وهى دموعها مغرقة وشها بعد لما زوجها طلقها وهى حامل في الشهر التاني

فتحتلها الباب وقالت باستغراب: ندى!!  إيه جابك في الوقت دا؟
وبتعيطي ليه؟

دا كله لسه عالباب حتى ماقالتش لها ادخلي وتطبطب عليها سابتها زي الغريبة عالباب

ندى ببكاء:  أنا اطلقت يا ماما جوزي طلقني ورماني في الشارع بسببك،  ومش بس كدا دا طلع متجوز عليا وخلف منها كمان،  ودا كله من سنتين

أمها باستغراب وصدمة:  ليه؟  وبسببي إزاي؟

ندى ببكاء: عشان عرف إنك عملتيله سحر عشان يتجوزني،  واكتشف دا من سنتين،  وعشان ينتقم منك فاتجوز عليا،  والنهارده لسه عارفة إنه متجوز عليا ومعه ولد منها عنده سنة

أمها بصدمة:  عرف إزاي إني عملتله سحر؟

ندى بزعيق:  هو دا كل اللي هامك بس،  يعني مش هامك إني اطلقت بسببك ليه تعملي كدا؟

أمها ببرود:  ما هو ماكانش عايزك،  وأنا ماكنتش هيضيع واحد غني زيه

ندى ببكاء: إيه البرود دا؟  ليه تدمري حياتي كدا أهو اطلقت أهو كان إيه لازمة اللي عملتيه الجواز عمره ما كان بالغصب،  حتى لو بالسحر هيجي يوم ويتكشف،  يعني الارتباط من الأول اتبنى على حرام ربنا هيبارك فيه إزاي

أمها:  مش وقت محاضراتك دي،  خليه يرجعك تاني هتعملي إيه باللي في بطنك دا

ندى:  مستحيل أرجعله عمره ما احترمني،  وبيعاملني كأني خدامة،  ومش طايقني أصلا،  وكرامتي مش هدوس عليها عشانكم

أمها:  خلاص مش هتقعدي في بيتي يعني أسيب الناس تاكل في وشي بسببك

ندى بعصبية:  لا ازاي ارمي بنتك في الشارع بالليل عشان خاطر الناس حرام عليكي بجد
وسابتها ومشيت

كانت ماشية دموعها على خدها هتعمل إيه؟  ولا تروح فين  في وقت زي دا

هتروح لأختها اللي فيها اللي مكفيها وتحملها وجعها،  هى أختها من الأب بس بتحبها

هى ماكانتش عايزة تتجوز محمد من الأول لولا أمها غصبتها عليه،  وهى ماتقدرش تقولها لأ،  لأنها ست قوية وصعبة

رجليها خدتها تاني على بيت طليقها،  ودا غصب عنها ترجعله وتتطلب منه يرجعها أصل هتروح فين وهى ملهاش حد ولا هتقعد فين وعشان خاطر اللي في بطنها هيتشرد

راحت تخبط عالباب واستنت حد يفتحلها،  فضلت قاعدة قدام الباب والجو برد،  لأنهم كانوا ناموا ومش هيسمعوها

بعد ساعتين جه محمد ولقاها قاعدة قدام الباب ضامة نفسها

محمد بعصبية:  جاية تاني ليه؟  هو أنا مش طلقتك روحي بقى لأمك وخليها تشوف نتيجة أعمالها السيئة