سلسلة اسكريبتات

سكريبت

المذيعة: ممكن أعرف ليه عايزين تتطلقوا، التلقيح اللي شغال عالفيس كل خمس ثواني وزهقتوا الناس منكم؟

هو: هى اللي عايزه مش أنا

هى بعصبية: ماتتكلمش أنت وتعملي فيها البريئ
ما أنا مش عايزه أطلق من فراغ حضرتك، هقولك بكل صراحة ليه عايزه أطلق

المذيعة: اتفضلي يا حبيبتي

هى بزعل: بصي حضرتك، أنا كنت تعبانة شوية فعايز يشرب شاي فقولتله معلش اعمل لنفسك عشان تعبانة شوية

لقيته بلاعة اتفتحت في وشي وقالي: يعني أنا جاي تعبان من الشغل وعايز كوباية شاي بعد الأكل وتقولي قول اعمل أنت عشان تعبانة شوية، بتعملي إيه يعني طول اليوم

هو بضيق: أيوا بتعملي إيه طول اليوم؟

هى بعصبية: بعمل يوغا ياروح طنط

المذيعة: احنا على الهوا لو مش ملاحظين خليكوا عارفين دا عشان أي تهور منكم هيبقى ضدكم وبس كدا

هو: حضرتك أنا بشتغل عشان أوفرلها حياة مرتاحة، عشان طلبت كوباية شاي تقوم تطلب الطلاق هى يعني هتقوم تطبخه؟
هو أنا كدا غلطت؟

المذيعة: لا

هى باندفاع: هو إيه اللي لأ؟ طالما شايفه حاجة سهلة كدا ماقومتش تعمله أنت ليه يا شاطر؟

وإيه يعني بتشتغل يعني عشان أربع ساعات وتيجي طول اليوم قاعد مرتاح

هو بمقاطعة: لو سمحتي خمس ساعات مش أربعة
بقلم إسراء إبراهيم

هى بعصبية: مش هتفرق ساعة يعني ومش تقاطعني تاني أحسنلك

هو بقلق: حاضر، بس خلي بالك احنا عالهوا اوعي تتهوري

هى: ماشي، وبصت للمذيعة وقالت: بصي حضرتك هو بيشتغل خمس ساعات وبيجي يرتاح وباقي اليوم فري عنده، لكن أنا بطبخ وأغسل، وأمسح، وأنشر، وألم الغسيل وأكويه وأطبقه، وأحمل وأولد وأرضع وأسهر بالعيال وأوديهم للدكتور، وأحمي العيال، وآكل العيال، وأغير للعيال، وأذاكر للعيال، وأنوم العيال، وأصحى الصبح بدري غصب عني عشان أجهز الفطار وأصحيه هو والعيال وأطلعله لبسه، وأمسحله الجزمة، وأروح ألبس العيال، وأخليهم يفطروا ويغلبوني، وأروح أجهزلهم اللانش بوكس، وبعدين أنزلهم للباص، وأطلع أروق الشقة، وأجهز الغدا

ودا اللي بعمله طول اليوم بدون راحة دا لو إنسان ألي كان زمانه فصل من أول ساعتين، وبعد دا كله يقولي بتعملي إيه
يكونش بروح دريم بارك بعد لما بتنزل؟

يعني ليا حق أطلب الطلاق طالما مفيش تقدير ما هو لا يقول كلمة حلوة ليسكت، لكن يقول كلام يحرق الدم يبقى لأ

ما في ستات بتشتغل عشان تصرف عالبيت طول اليوم لوقت متأخرّ عشان يجيبوا حق أكل يتعشوا بيه، وبيرجعوا مش شايفين قدامهم وبيروحوا يعملوا الأكل وينضفوا، أنت بقى عشان الشغل بتاعك أبو ساعتين قاعد عالمكتب تحت التكيف بتيجي تتعوجلي ومش عايز تحوش كوباية ماية من عالأرض

وغيرك من الرجالة بيشتغلوا ليل نهار وبيتقطم ضهرهم بالنهار في عز الحر يشيلوا ويحطوا، وفي الشتاء ناس بتشتغل بالليل في عز البرد وبيقولوا الحمد، وبيبقوا بيساعدوا زوجاتهم برضا وابتسامة عشان عارفين قد إيه بيتعبوا عشان هما تعبوا برا وحاسين بيهم، لكن أنت قاعد مرتاح في شغلك فمفكرني قاعدة بتسلى طول اليوم قدام التليفزيون

وبصت للمذيعة وقالت: يبقى كدا مين اللي غلطان

المذيعة بدموع وكأنها شايفة شريط حياتها قدام عنيها قالت: هو وزوجي اللي غلطانين، واللي زيهم كمان، أنا كمان هطلب الطلاق، وطلبت يتصلوا على زوجها، وأول ما رد عليها قالت: طلقني بسرعة أحسنلك

هى بصت لزوجها وشاورتله بعينها إنهم يقوموا بسرعة

خلوها بتمسح دموعها بمنديل، وطلعوا بسرعة من عندها

في الخارج: إيه اللي حصل دا؟

هى: كدا هتتطلق بسببي

هو: لا يا حبيبتي مش بسببك، هو أنتِ اللي قولتيلها اطلقي؟

هى ببرائة: لأ

هو: يبقى خلاص هى عملت كدا بإرادتها، حد كان قالها تستضيفنا وتتدخل في حياتنا

هى: لأ، يالا مالهمش يكملوا مع بعض، المهم يلا نطلع على المطعم عشان هموت من الجوع

هو: سلامتك من الجوع والموت يأم عيالي

ومشيوا، بعد لما خربوا الدنيا جوا، وكأنهم ماكانوش متخانقين ولا كانت طالبة الطلاق

تحبوا أعمل جزء للمذيعة وزوجها لما طلبت منه الطلاق هيعمل إيه؟

#إسراء _إبراهيم