سلسلة اسكريبتات

سكريبت 6

عايزاكي تتجوزي طليقي

بصتلها بصدمة: بتقولي إيه؟ أنتِ اتجننتي ولا إيه؟

نيفين: إيه يا عزة قولت حاجة غلط بقولك وافقي على مراد طليقي

عزة بصدمة: دا مستحيل يحصل، وكمان أنتِ اللي جاية تقولي كدا؟

نيفين بدموع: يا عزة عشان خاطري وافقي عليه عشان يديني بنتي، هو طلب مني كدا عشان يديهالي

عزة بحيرة وبطبطب عليها قالت: طب اشمعنا أني

نيفين بحيرة: مش عارفة، مع إن لما كنا متجوزين عمري ما شوفته بصلك ولا اتكلم معك

عزة: ما أنا خايفة من قراره دا، بعدين أهلي مش هيوافقوا، ولا أنا أقدر أوافق بس إزاي هو عايز يبعدك عن بنتك

نفين بدموع: مش عارفة يا عزة مع إنه لما قررنا نطلق ماعاندش معنا وكدا، ولا غلط فيا وقال كل شيء قسمة ونصيب

عزة: طب مفيش حل تاني وتاخدي بنتك؟

نيفين بدموع: لأ

وكملت: أرجوكي لما يتقدملك وافقي عليه، أنا مش هقدر أبعد عن بنتي ولا تتربى بعيد عني

وسابتها ومشيت

قعدت عزة محتارة وبتفكر في كلام نفين

في اليوم التالي

كانت عزة في المطبخ، وطلعت على زعيق والدها وهو بيقول: بقى طليق عايز يتجوزها وكمان بيقولي دا لمصلحة بنتك وصاحبتها، هو بيهددني ولا إيه؟

والدتها بتحاول تهديه لكن مفيش فايدة

فجأة نطقت عزة بدون تفكير وقالت: بس أنا موافقة عليه

بصولها الإتنين بصدمة وقالوا: إيه؟

عزة بنفس الحالة: أنا موافقة عليه يا بابا، أنا ماعرفش ليه أنا بالذات بس بردوا عشان بنت صاحبتي ترجعلها، وكمان لمصلحتي إني في عريس أخيرا هيتقدملي بعد لما دخلت أخيرا على سن 26 سنة، ومحدش بيجي ولو جه واحد قليل مرة وأهله بيرفضوا بعد لما يعرفوا سني

ودخلت أوضتها بسرعة والدموع في عيونها

أهلها بصوا لبعض بحزن، ودخلت والدتها وقعدت جنبها وقالت: من امتى وأنتِ بيهمك كلام الناس؟

عزة بدموع: يا ماما أنا مش حجر، مهما بينت إني قوية ولا فارقلي حاجة بس من جوايا بيبقى في نار

طبطبت عليها والدتها وقالت: طب صلي استخارة ومن بعدها هنقوله يجي

هزت عزة رأسها وقالت: ماشي
بقلم إسراء إبراهيم

في المساء كان مراد قاعد مستني عزة تطلع

طلعت عزة وقالت: السلام عليكم ورحمة وبركاته

ردوا السلام وقعدت جنب والدها

مراد: احم أنا طالب إيد الآنسة عزة ليا، أهلي متوفين من سنة وعايش لوحدي، وعندي 31 سنة بشتغل مدرس جغرافيا

والد عزة: تمام يابني نسيبكم مع بعض عشان لو عايزين تسألوا عن حياتكم

وخد والدة عزة وقعدوا في الصالة قصادهم

عزة بصتله وقالت: اشمعنا أنا؟

مراد باستغراب قال: المفروض تعرفيني عليكي الأول، بس مفيش مشكلة هجاوب على سؤالك

بصي ياستي أنا لما طلقت نفين صاحبتك ماكنتيش في بالي ومش هقولك بقى أعجبت بيكي وبحبك والكلام دا

بس بقالي أسبوعين من بعد لما طلقت نفين بحلم بيكي مع إني ماشوفتكيش غير مرة واحدة بس في فرحنا ولما كنتي بتجيلها ماكنتش ببصلك ولا بركز معك

احنا فعلا ماكناش متفقين وحاولنا بس مفيش نصيب، وماكناش بنحب بعض أصلا بس كان بينا احترام، وانفصلنا بهدوء

عزة: طب ليه مش راضي تديها بنتكم

مراد ابتسم: عشان توافقي، أنا مستحيل أصلا أمنعها منها، وعلى فكرة كانت معها من يومين ولما جابتها ليا تقعد معايا شوية قولتلها مش هتاخديها لما تخلي صاحبتك توافق عليا، بقيت مشدودلك

أصل أنا كدا كدا هتجوز يعني بعد طلاقي، وكمان نفين هتتجوز بعد عدتها ولما تلاقي حد كويس تستقر معاه ويفهموا بعض، وهى معندهاش مشكلة خالص إني طلبتك للجواز كانت مرحبة بالفكرة وقالت إنك طيبة وتستاهلي كل خير

عزة: تمام، أنا عندي 26 سنة، مش بشتغل عشان بقيت بتأثر بكلام الناس اللي حواليا بسبب الجواز

ونفين كانت بتحكي عنك كل خير، رغم إني عارفة إنها ماكنتش عايزة تكمل وإنكم مش فاهمين بعض كنت بحاول أبعد فكرة الطلاق من دماغها بس أهو النصيب.

مراد: تمام، موافقة يعني؟

عزة: اها، وصليت استخارة قبل ماتيجي ومرتاحة، ولو خير لبعض ربنا هييسر الأمور

بس عايزة الخطوبة تكون كام شهر كدا عشان نفهم بعض، ونحاول نغير حاجة لو مش مستحبة عند التاني يعني لو حاجة هتأثر على علاقتنا بعدين في تصرفاتنا يعني أو تفكيرنا أو أسلوبنا مش الشكل عشان نشوف هنكمل ولا إيه واحنا لسه عالبر

مراد بابتسامة: تمام كلام كويس

ومشي من عندهم بعد لما سلم على أهلها وهما كانوا موافقين عليه قبل ما يجي بعد لما صلت الاستخارة

فات 5 شهور فترة الخطوبة، وكانت الأمور كويسة لحد ما، وكانوا بيتصرفوا بطبيعتهم بدون تصنع، وكل واحد شاف التاني إنه مناسب، واتفقوا على عقد القران

وتم كتب الكتاب مع حفلة صغيرة كان فيها قرايبها، ولكن نفين جت باركت ومشيت ببنتها

وبكدا كل واحد بيفهم التاني وعرفوا تفكير بعض ودا اللي ماشين عليه في حياتهم

ونفين اتخطبت لشخص جارهم وقررت تكون فترة الخطوبة طويلة شوية عشان يعرفوا بعض أكتر، وهل في توافق ولا لأ!!!!

"اختاروا من البداية صح، عشان العلاقة تنجح وتكمل، ومحدش يطلع خسران منها"

#التوافق

#إسراء_إبراهيم

رأيكم وماتنسوش تعملوا فوت