- جريت على غرفتي وقفلت الباب علي وأنا مامصدقة إني طلعت كدة قدام راشد أسه حيقول علي شنو.... حيقول إني قليل أدب، قعدت فترة اندب في نفسي وفي حظي لحدي مابعد شوية سمعت ضرب على الباب وصوت راشد بيقول لي أطلعي عشان تاكلي... مشيت غيرت ملابسي لي جلباب طويل وجريت توب ولبستو ونزلت أول مانزلت تحت لقيت راشد بيخت في الأكل عاين لي وقل لي...
- بالمناسبة يا هيا يعني انا راجلك ودا عادي اللبس دا يعني.....
- حسيت إنو وشي بقى زي التفاحة والأكل حسيت بيهو في حلقي ودنقرت راسي وتميت أكلي.
- ماشي ياهيا نشوف لحدي متين حتكوني كدة.
- قلت ليه أنا شبعت وعايزة أقوم مسكني من يدي وقال لي أنتي ما أكلتي.
- أنا شبعت.....
- بس إنتي ما أكلتي شي وما أظن إنك أكلتي اليوم كلو.....
- ماجعانة شديد...
- أقعدي يا هيا... أنتي ماحتقومي من هنا ل ما أكلتي، وياستي عشان بخجلك أنا ما حأقول ليك حاجة... بس أقعدي أكلي.
- قعدت وانا الصراحة كنت جعانة شديد وراشد تاني ماقال لي حاجة...وأكلنا على سكات.... بعد ما أكلنا لمة معاي الصحون قلت ليهو انا حأسوي الشاي وبالفعل دا الحصل بعد ماغسلت العدة وسويت الشاي وأديتو ليهو قال لي أقعدي ياهيا أنا عايزك في موضوع.
- قلت ليهو شنو.
- قال لي نحن حنسافر لي فترة..
- حنسافر وين وفرة قدر شنو يعني.
- إستراليا لسه عندي حاجات ما إنتهت عايزة أخلصها بعدين حنرجع السودان نهائي" هيا في الفترة الفاتت إنتهت من تصميم الشركة".
- بتين.
- بعد تلاتة يوم.
- عاينت ليهو بي خلعة تلاتة يوم تلاتة يوم يا راشد وأنت كلمتني الليلة.
- صراحة أنا إتخذت القرار دا الليلة لأنو حصل لي مشكلة في الشركة.
- طيب حنفعد قدر شنو.
- سنة.
- سنة يا راشد حرام عليك وحنسافر بعد تلاتة يوم، أنا نفسياً ماقدرت اهيء نفسي لي دا.
- أعمل شنو يا هيا قلت ليك أنا عرفت بالمشكلة دي الليلة وقررت أسافر وأنا مابقدر أسافر وأخليك وراي.
- ما مشكلة حأنتظرك يعني ما اول واحدة راجلها يسافر.
- بس انا ما حأقدر، أنا عايزك تكوني معاي في أي محل، أنا مابمشي وبخلي مرتي وراي.
- لمن قال كدة حسيت بي فرشات حايمة في بطني إحساس حلو شديد جاني، إني زوجة راشد الما بحب في يوم إني أبعد منو...
