ألفا بيستول +18
بقلم : نرجس أحمد
الفصل السابع
راشد: تمام كدة خلاص إتفقنا على أي شي وبنتمنى نشوف شغل يبهرنا.
مختار"مدير هيا": أكيد أستاذ راشد حيعجبك الشغل عندنا مهندسين على كفاءة.
طول ما الإجتماع الاستمر لمدة ساعتين أنا كنت سرحانة راشد إتغير وكتير كمان، عني راشد أصلاً طويل، بس زاد طول وكمان بقى ضخم كأنو مصارع، بالإضافة لقوة الشخصية والثقة، هو كان بيتناقش مع المدير بي كل ثبات، دقيقة راشد هو مدير الشركة، راشد الصايع بقى مدير شركة بس كيف... سبحان الله مغير الأحوال...... طول الإجتماع ملاحظة لي نظرات راشد لي أنا بعرف إنو هو عرفني لأنو مافي غير هيا سليمان محمد عبد السلام واحدة وهي أنا بس ما إتكلم والغريبة بعد الإجتماع طوالي طلع..... معقول ما بيكون عرفني. بعد الإجتماع ما إنتهى المدير سلمني كل ملفات الشركة والموقع ، الحاجة العرفتها إنو الشركة عايزة تبني فرع سوداني للشركة الاسترالية في الخرطوم، ولازم البناء يكون بي مواصفات معينة بالإضافة إنو موقعها حلو شديد ، هي شركة تجارية ضخمة.... وعندها فروع في بلدان كتيرة ما مستغربة من إنو يكون عدها فرع هنا....
كنت طالعة، الليلة لينا عندها فحص دوري في المستشفى وأبو بكر مسافر خارج الخرطوم، أكيد زي الزمن دا ماحيكون في زول في البيت لينا ضربت لي قالت لي لازم أمشي بدري البيت يامن براهو، أثناء ما أنا ماشة سمعت صوت بوري عربية وراي إلتفت لقيت عربية من نوع وقفت قدامي، وباب السواق فتح وراشد نزل منها ووقف قدامي....
راشد: هيا كيفك......
هيا: أهلين راشد.......
ماشة وين....
البيت
يلا أوصلك.
وهنا انا إتوترت ماعايزة أركب معاهو، لا يا راشد ما بيحتاج أنا طلبت ترحال.
ألغيهو.
بس.....
من غير بس يا هيا، أنا راشد وعمتك، حتى بعد ما مرت سبعة سنة ما زلت راشد وعمتك، ما أظن تخافي أعمل ليك اجة.
وأنا بيني وبين نفسي والدمر لي حياتي برضو كان ود عمتي يا راشد، أنا بعرف راشد مستعد لو أصريت يشيلني غصب والفكرة نهائي ماعجبتني، ولي سبب أنا مابعرفو ما كنت خايفة شديد من إني أركب معاهو...بعد ما راشد إتحرك حالوت أفتش جواي عن إحساس بي الخوف والهلع من راشد، بس وللمفاجأة ما لقيتو، استغربت شديد يعني حتى أنا حتى أخواني لو ركبت بكون خايفة لحدي ما أنزل، بس لي راشد ما كنت خايفة منو الشعور قريب لي الأمان والاسترخاء.... غريب يا هيا غريب.
كيفك إنتي يا هيا.
كويسة.... حمد الله على السلامة.
الله يسلمك...
إتغيرتي كتير يا هيا........ماعرفتك حتى بعد ما نطق المدير اسمك أخدت زمن حتى استوعبت إنو هيا هي نفسها البت المنقبة دي....
إنت زاتك إتغيرت ما لي درجة ما أعرفك بس إتغيرت فيك حاجات كتيرة، وبقيت مدير شركة.... أوه .
كان لازم أكون نفسي بدل أكون صايع ومباري الحفلات وعايش بي قروش أبوي، كان لازم أبني مستقبلي وشخصيتي......
راشد أنا.......
خلينا مانعيد الماضي....وكلميني عنك.... كيفك إنتي وكيف لينا ولنا......
أنا كويسة والحمد لله، لينا دكتورة مع ماما وبابا في المستشفى وطبعا هي وأبو بكر إتزوجو.. وعندهم ولد يامن وحاليا توأم في السكة، ولنا مهندسة مدنية في وزارة التخطيط العمراني......
حصلت حاجات كتيرة إذت، وآي عارف لينا وبكري إتزوجو.
آي عارفة بتكون عارف نسيت إنت وبكري أصحاب...
وصلنا أدخلي... انا حأجيكم بعدين...... عاينت ليهو وعيوني وكان نفسي أسألو لي ما اخل مع إني عارفة إنو مافي زول في البيت" إنتي بتخاطري يا هيا"
وهو كأنو فهم نظراتي مافي زول في البيت.
رفعت حاجبي بي استغراب عايزة أسالو وكيف عرف.
قال لي ما بكري براهو صحبي في البيت دا، أنا عندي علاقة قوية شديد مع ناس البيت دا بس حالياً لينا هي القالت لي......
تمام يلا لي بعدين، ومشيت وقبل ما أفتح الباب وأدخل قبل عاينت لي راشد لقيتو بعاين لي إبتسم لي وأشر لي عشان أدخل دخلت وقفلت الباب وراي.....
مرت خمسة يوم من آخر مرة شفت فيها راشد وكانت في بيتنا بعد جا جى بليل هو وعمتي وقعدو معانا لحدي بليل حتى فاتو، بعد اللية دي راشد ما إتواصل معانا فيها نهائي الإجمتاعات بيحضرها المدير التنفيذي لشركة حتى لمن شفت موقع الشركة وعاينت الموقع كان ماف، وبعدها أنا إنشغلت بي رسم التصميم، كان لازم التصميم يطلع حلو، ولي سبب ما انا إجتهدت شديد أكتر ن أي تصميم تاني عشان الشركة مثل كأنو أكتر تصميم جاي من قلبي، الشركة بتضمن 500موظف كد أدنى بالإضافة لي المدير التنفيذي والمدير لازم تكون كل قسم بالإضافة للمدير والمساعد كل خمسة موظفين في مكتب بالإضافة للحمامات الخاصة بالقسم يعني إحتمال يكون الطابق فيهو قسمين ولازم لكل قسم يكون فيهو حمامات خاصة فيهو زائد مكتب مديد قسم خاص ومكتب سكرتارية براهو بالإضافة لقاعة إجتماعات زائد مكاتب الموظفين مكتب الرئيس في طابق كامل بالإضافة لمكاتب الموظفين الخاصين بالمكتب التنفيذي زائد مطبخ للمدير مكاتب الموظفين.... الشركة ضخمة بتتكون من تلاتة ملاحق في كل ملحق تلاتة طوابق بيربط بيناتهم جسر مغطى بالزجاج بالإضافة لكراج خاص بالسيارات أسفل كل ملحق تتسع لموظفي الشركة جميعهم بما فيهم الريس والمدير والحرس بالإضافة لي نظام تبريد هوائي ثابت ونظام إطفاء حرائق مشدد، ونظام أمني مشدد وفي كل من الملاحق يكون مصعدين وسلمين بالإضافة لي سلمين خاصين بالحرائق التصميم فيهو كل شي حتى الحدائق وشكلها وحتى الأبواب والمنظر الخارجي للشركة كلها ظاهرة مع التصميم الأولي للشركة.....
وكدا إنتهينا دا التصميم الكامل للشركة من شكلها الخارجي لحتى شكل المكاتب الداخلية حتى موضع أزرار الكهرباء موجودة فيها شنو رايكم ياجماعة..........
هيا كانت بتتكلم في إجتماع العرض التقديمي للمشروع مع راشد ومدراء الشركة التانية....
راشد: وقف وصفق ليها .... شغل ممتاز ياباشمهندسة بتمنى يكون التصميم النهائي للشركة بنفس جودة التصميم في العرض .....
إن شاء الله حيكون نفس التصميم ولو ما أحسن.
مختار: بما إنو نحن إتفقنا خلص نتلاقى في الموقع، وودع الشرك مع الإتفاق على موعد البناء والتسليم.....
مختار: دايماً بترفعي راسنا بتصميماتك وبتبهرينا ياهيا.
شركاً كتير أستاذ مختار.
يلا ياداب بدى الشغل بتمنى منك مزيد من الإجتهاد عشان ينجح المشروع.
إن شاء الله حأكون عند حسن ظنك.
وتوالت الأيام والمشوع بدا وهيا كل مرة بتمشي للموقع.....
مابعرفها صدفة ولا لا بس أنا كل ما أمشي الموقع راشد بيكون موجود..... والغريبة إنو أنا ما مضايقة كل بس بقى نفسي لمن يتأخر بسأل العمل من إنو أستاذ راشد لسع ماجا وبكون مبسوطة شديد لمن يجي .... أكيد دي العشرة ، أنا اتونست معاهو كتير والصراحة علاقتنا إتعمقت للصداقة، ووصلت لمواقع التواصل الإجتماعي، مع إنو نفسي كل مرة بتقول لي إنو دا غلط وأنا مستحيل أصل لي حاجة مع راشد إلا أنو بلقى نفسي متواصلة معاهو من غير ما أقدر أمنع نفسي هو الراجل الوحيد المابضايق من وجودو حولي، الوحيد البحس بالأمان والإرتياح وهو جمبي....
عرفت حاجات كتيرة في راشد أثناء معرفتي بيهو، وهو إنو مثقف وواسع الإطلاع وإنو أذواقنا متشابهة الإتنين بنحب الأغاني الهادئة... الإتنين بنحب مسلسلات وأفلام الأكشن والخيال العلمي... في يوم وأثناء مانحن في الموقع وأنا بعاين في تخطيط البناء هو سألني سؤال فجأة.
إنتي بتحبي ياتو فصل يا هيا.....
رفعت راسي وعاينت ليهو بي استغراب يعني من وين جا السؤال في الموضوع داومع ذلك جاوبتو بحب فصل الشتاء.
لي....
لأني بحب إحساس الدفاء.
عاين لي بي استغراب، بس في الصيف في دفاء....
لا ماقصدي كدة، أنا بحب الجو يكون بارد، بس لمن تبرد وتجي تتغطى بي حاجة تدفيك دي أجمل شعور في الدنيا والإحساس دا مستحيل يجيك في أي فصل من الفصول التانية....
غريبة أول مرة أسمع زول بيقول كدة الناس بتقول الخريف ولا الشتاء عشان بارد، بس أول مرة أسمع زول بيقول عشان الدفا الفي البرد.....
أي والله إحساس جميل جدا إحساس الدفا البيجي بعد البرد إحساس بيغمرك بي راحة شديدة... راشد أخد مسافة كأنو بيفكر في كلامي وأنا خليتو ورجعت لي أوراقي أراجع فيها ..... بعد زمن وبعد من إندماجي في أوراقي سمعت صوت راشد.
هيا تعرسيني؟
نهاية الفصل السابع
