فتاة بالهاوية

الفصل السادس

بسم الله الرحمن الرحيم والصلاة والسلام على أشرف المرسلين وسيد الخلق أجمعين رسولنا ونبينا الكريم صلاة تنفك بها العقد وتفرج بها الكرب يا رب العالمين 🤲❤️❤️
أما بعد :

🌹🌹🌹
في صباح يوم جديد يحمل الكثير من المفاجأت أستيقظت أمانى باكراً كعادتها أدت فرضها ودخلت لغرفة فريدة حتى توقظها وجدتها تصلي وتبكي إلى الله  فخرجت وتركتها بخلوتها مع الله ذهبت وحضرت  فطور لهما وبعد القليل من الوقت خرجت فريدة وجلست للفطور مع أمانى وتحدثو سويا قالت أمانى: قوليلي يا فري جاهزة نروح النهاردة للدكتور ونبداء ولا لا؟
أجابت فريدة على الفور : طبعاً جاهزة أنا أصلا تعبانة من إمبارح وحاسة إني مش موزونه بس مش عارفة إيه السبب بس انا عاوزة اتفق معاكي على حاجة ضروري ومن فضلك متزعليش مني ولازم تكوني فهماني وتقدري موقفي ممكن؟
نظرت لها أمانى تستشف ما بداخلها :قولي يا حبيبتي دخلتك دي بتدل على إنك حتضايقيني قولي الله يهديكي خير؟
اذدردت فريدة لعابها بتوتر واجابت: دلوقتي والله انا بعتبرك أختي فعلاً بس انتي شغلتيني يعني بقالي دخل مش كده؟
أمانى ساخرة : لا مشغلاكي بلطجة
فريدة : لا بجد والله اكيد ليا دخل فأنا بعد إذنك لازم أشارك معاكي في المصروف وكمان مصاريف الدكتور دي بعد إذنك حضرتك تخصميها من مرتبي لو سمحتي مترفضيش مش عاوزة أحس إني عبئ عليكي ممكن؟
صمتت أمانى قليلاً تفكر هي لا تريد إحراجها ولا حتى أن تشعرها بأنها عبئ كما تقول فتكلمت : بصي الكلام ده سابق لأوانه كتير بس أنا مش هتزعلك حنتفق سوا احنا حنعيش مع بعض هنا لحد ما هيثم اخويا يرجع هو كان بيقول انه هيرجع الفترة اللي جاية فمن دلوقتي لحد ما يرجع بالسلامة لما تلاقي نفسك حابة تجيبي حاجة في البيت ابقى هاتيها يعني محدش ملزم بمبلغ معين وبالنسبة للعلاج والدكتور إحنا لسة أصلا مش عارفين هنعمل ايه سيبيها على الله
فريدة : بهدوء بعض الشئ يتخلله الصدمه : ونعم بالله
أمانى: مالك شكلك اتغير في حاجة ضايقتك
فريدة : لا ابدا م مفيش
أمانى : يا بنتي مالك ما تتكلمي احنا قولنا محدش يخبي حاجة.
فريدة يحيرة بض الشئ : بفكر هعمل ايه في الفترة اللي جاية اقصد يعني لما أستاذ هيثم يرجع بالسلامة
أمانى : هتعملي ايه يعني هو اصلا أغلب الوقت يا في شقته يا أما عند أمجد صاحبه متفكريش كتير اكيد مش هرميكي أنتي ليكي مكان في البيت ده زي بالظبط
قامت فريدة وعانقت أمانى بحب كبير بجد مش عارفة اشكرك ازاي انتي في فترة قليلة رجعتيلي ثقتي في نفسي واحساس إني مش لوحدي ربنا ما يحرمني منك.
أمانى بدموع: ولا يحرمني منك بس صدقيني انتي كمان مهمة انتي مليتي حياتي انا مكنش عندي حاجة غير الشغل والحاجة حُرية وده في أوقات متباعدة كمان كنت بعاني من الفراغ والوحدة علشان كده زي ما تقولي يعني مصدقت لاقيتك علشان يبقى في حد يملى عليا حياتي.
فريدة : بضحك لا ومش أي حد دي أحداث الدنيا عندنا؛ عندنا كل ماهو جديد اللي مش هتلاقيه عند حد
وظلا يضحكان سوياً إلى أن سألتها فريدة السؤال الذي قلب الضحك لحزن؛
فريدة : بس معلش في سؤال بيلح عليا جدا من وقت ما قابلتك انتي ست جميلة فعلاً وكمان مش باين ابداً انك سنك كبير ومهتمه بنفسك ليه حضرتك مش متجوزة؟
سألت وياليتها لم تفعل؛ هبت أمانى من مجلسها وكأنها لدغت من عقربة وتغيرت طريقتها تمام : قومي البسي يلا علشان انا اخدت ميعاد عند الدكتور الساعة أربعة يعني يدوبك نخلص شغلنا حدخل البس وأنتي يلا بسرعة؛ وذهبت وتركتها تفكر فيما قالت هي لم تقصد مضايقتها ولكن ما الخطأ فيما قالت ولكن لتصمت هي تحبها واخر ما تريده هو مضايقتها فهمت لترتدي ملابسها  حتى لا تثير غضب أمانى.
💢💢💢💢💢💢💢💢💢💢💢
في منزل حسين
بعدما اخذوه الجيران لمنزله واحضرو له الطبيب وقال إنها صدمة استفاق عم حسين على صوت جاره يتحدث مع زوجته في منزله ويبدو انهم لم يشعرو بأنه أستيقظ
الجار : والله يا ام محمود الواحد ما عارف يقول ايه بس بقى الراجل الطيب ده يخصله كل ده وبنته هي اللي تعمل فيه كل ده أدى خلفة البنات واللي بيجلنا من وراها.
زوجته :والله يا ابو محمود ما اخبيش عليك البت فريدة دي هبلة بس مش قليلة الادب جرا ايه يا حاج انت نسيت ولا ايه ما هي طول عمرها متربية معانا وتحت عنينا انا صراحة مش مصدقة الواد اللي اسمه فؤاد ده طول عمره مش راجل كده يعتمد عليه وانا صراحة كنت بتمنى لها وقعة أحسن من كدا بس يلا نصيبها كده بس اقولك حاجة وربنا يسامحني بقى بس أنا شاكة في الحربية مرات ابوها دي الست دي خسارة فيها الراجل المحترم ده
ابو محمود : بس بقى ملناش دعوة لا الراجل يسمعنا ويزعل المهم متصلتيش بمراته تيجي ولا ايه؟
ام محمود : أتصلت يا اخويا اتصلت بس بلا نيلة دي مبتحسش ولا اتخضت ولا حاجة قالتلي طيب جاية وخلاص.
ابو محمود : يمكن زعلانين ولا حاجة
ام محمود : زعلانين وايه يعني حتى لو زعلانين يا خويا متتخضش على راجلها لا الموضوع ده في إن.
قاطع حديثهم دخول سميرة..
سميرة : إيه ده بسم الله الرحمن الرحيم بتعملو ايه هنا وايه اللي مقعدكم كده هو البيت مالهوش صاحب ولا ايه؟
ام محمود : وصاحبة البيت سايبة صاحب البيت بيموت ولا على بالها ايه نسيبه احنا كمان ولا ايه؟
سميرة : وانتي مالك يا ولية يا حشريه أنتي
ام محمود : انا حش.....
قاطعها زوجها :بس ولا كلمة يلا بينا ثم وجه كلامة لسميرة : لامؤاخذه يا ست سميرة بس الحاج ابو هند عشرة عمر واحنا مايهونش علينا نفوته لوحده بس انتي موجودة وتفهمي في الأصول يا.... يا بت الأصول 😏😏
سميرة بقلة ذوق : متشكرين يا اخويا خد الباب في إيدك وانت خارج.
ثم اتجهت للداخل حتى ترى زوجها وإذا به تدثر في سريره واصطنع النوم حتى يرى ما يحدث من خلف ظهره
💢💢💢💢💢💢💢💢💢
في المصنع.

أثناء اليوم لم تتحدث أمانى مع فريدة إلا قليلاً وفي منتصف اليوم اتاها اتصالاً من هيثم.
أجابت أماني على مضض: الو...
هيثم : حبيبتي عاملة ايه أخيراً رديتي؟
أمانى : الحمد لله يا هيثم كويسة
هيثم : معلش بقى انتي طول عمرك قلبك أبيض وأجدع مني متزعليش بقى انتي عارفة إني ماليش غيرك بعد ماما وبابا الله يرحمهم وعارفة برضو إن أخوكي مدب وحمار أنا أسف بقى
أمانى : لا انت مش حمار انت أخويا وابني كمان وعارف معزتك وقيمتك عندي بس مش لازم تفكرني بفشلي كل شوية حرام عليك يا هيثم الموضوع ده بيموتني انت عارف انا اخدت وقت قد ايه علشان أتجاوز الموضوع ده وأخرج منه
هيثم؛ انا اسف يا حبيبتي مش هتتكرر تاني حقك عليا بقى.
أمانى : خلاص يا حبيبي عفونا عنك
هيثم : طب قشطة بقى اقولك الاخبار اللي عندي انا بقى
أمانى : خير يا رب.
هيثم : احنا راجعين الاسبوع ده يعني خلال أيام
أمانى : بجد طب ده خير بس أوعى يكون برضو بسبب حمدي الباشا.
هيثم للأسف ايوه هو برضو هو اه مش هنا وعندكم في مصر بس قدر يوقعنا في مشاكل وبلاوي سودة ولو طولنا هنا مش هنعرف نمسك عليه حاجة وبرضو هنروح احنا في داهية يبقى ننزل عنده ونشوف البلاوي من قريب اكيد في حل بس الحل ده مش هنا
أمانى : هيثم انت قلقتني احنا حنعمل ايه بس قصاد حوت زي ده ربنا يستر تعالي بس وبعدين يفرجها ربنا
هيثم : يا رب يا حبيبتي المهم انا هقفل دلوقتي وانتي شوفي بقى او ناقصك حاجة حجيبهالك وانا جاي تمام
أمانى : تمام ياحبيبي ربنا يحفظك وتيجي بالسلامة سلام
هيثم : سلام
اغلقت معه المكالمة ونظرت للساعة وقال : يا خبر الوقت اتأخر ده احنا يا دوبك نلحق الدكتور
أمسكت الهاتف الداخلي واتصلت بالمشغل وطلبت منهم ان يستعجلون فريدة للخروج وقامت وجمعت اشياءها واتجهت للباب في نفس وقت لدخول فريدة حدثتها قائلة: كويس إنك جيتي يلا علشان أتأخرنا  وأخذتها بدون كلام اخر وخرجو للسيارة وذهبن للطبيب وكل هذا تحت أنظار المدعو كرم رفع هاتفة واتصل بأخته بعد قليل اتاه صوتها؛
سميرة: ها يا سي كرم في جديد ولا لا يا رب متقوليش كلت وشربت وتقولي حاجة مفيده
كرم : اه يا اختي المفيد كله البت دي شكلها مش سهلة شكلها هتفتح عين بت جوزك علينا
سميرة : يخربيتك ليه بتقول كده
كرم : أخدتها دلوقتي ونزلت بيها من المصنع ده وشافها طلعت عمارة كدة كلها دكاترة ولما طلعت وراها شوفتها دخلت عيادة حريمي لامؤخذة
سميرة: طب وايه يعني مش هقولها جديد عينك عليها وحاول تتقصي عن البت التانية دي عاوزة اعرف حكايتها ايه
كرم : ماشي يا اختي اما نشوف اخرتها
سميرة : خير يا اخويا خييييير؛ يلا سلام علشان اشوف اللي نايم جوه ده.
💢💢💢💢💢💢💢💢💢
اانتهى البارت كده
اشوفكم بكرة إن شاء الله
ياريت تقولولي رأيكم في الفصل ولو حد عنده تعليق على حاجة يا ريت يقول
أحداث بكرة ناااااار💥💥 بإذن الله
فتاة بالهاوية بقلمي :رنا سلامة