تنهدت " خلي بباك يقولك "
" انا عايزك انتِ الي تفتحيلي قلبك وعايز اسمع منك انتِ"
ثم ابتسم " مش انتِ نفسك يبقى ليكي اهل؟..انا هكون جوزك وحبيبك وصاحبك..وبابا هيكون بباكي..بابا طول عمره كان نفسه في بنت بكلمك بجد بيموت فيهم..وماما ماما حنينة اوي وهتحبك زيك زيي..وعلى فكرة هى عارفة اني بحبك "
نظرت اليه " هو انت ليه بتحبني؟ "
" معرفش..حبيتك كنت بشوفك في الجامعة..بنت غامضة كدة ومع نفسها ومبتكلمش حد محدش يعرف عنك معلومة واحدة..قمورة جدا بس بعيدة عن الناس وهادية كنت فضولي اوي ناحيتك وحبيتك..فيكي حاجة بتخلي قلبي يدق بتجذبني لما ببصلك..كان اجمل يوم في حياتي يوم ما جبتيلي الهدية وافتكرتيني..كان اجمل يوم يوم ما خليتيني اقرب منك وانتِ بتبعدي الكل عنك..كان اجمل يوم لما شوفت الابتسامة على وشك بسببي..واهم حاجة بالنسبالي لما اتخليتي عن خوفك وبصيتي في عيني لأول مرة "
" انا بحبك " تحدثت بخجل
" بتحبيني بتحبيني؟!..يعني مش اخوكي؟! "
ضحكت " لا " واستندت على كتفه برأسها
" وانا بحبك اوي يا سيلين "
" بتطمن وانا معاك "
" وانا هخلي بالي منك واطمنك طول ما انا عايش! "
" ممكن طلامة بتحبني..تفضل تحبني من غير ما تعرف الي حصلي؟ "
امسك بيدها " وانا مش هحاول اعرف إلا لو قررتي تقوليلي بنفسك "
ابتسمت " شكرا "
طرق باب المنزل ففتحت سالي
" ما لسة بدري يا استاذ شادي " نظرت امامها بصدمة وتسارعت دقات قلبها
" مش هتقوليلي اتفضل؟ " تحدث ياسين
" اتفضل " تحدثت باقتضاب وافسحت له الطريق
جلس وتنهد " ازيك يا بنت عمي..متغيرتيش لسة بنفس شكلك مكبرتيش "
ضمت يدها وتحدثت باقتضاب " ازيك"
" انا مش كويس خالص" امتلأت عيناه بالدموع
" بتعيط؟! " تحدثت بقلق
" مراتي خلعتني وفضحتني وقالت عليا مش راجل..وهتتجوز غيري..كانت تعرف عليا راجل اصلا "
تسارعت دقات قلبها وحدثت نفسها " ده ربنا يا ياسين..ربنا "
" ليه كدة؟ "
" انتِ عارفة انا اتجوزت من خمس سنين..كنا مأجلين حوار الخلفة..وبعدين جيت من سنتين كدة عملت عملية..و" اخذ نفسا عميق ليمنع بكاءه
" للأسف حصلي عقم بس معرفتش غير من تسع شهور تقريبا..لما هى عرفت اتغيرت معايا ابتدت تتخانق معايا كتير..تبعد عني..تخرج كتير وتتشيك مكنتش حاطط في دماغي ابدا انها بتخوني لأني كنت بثق فيها اوي..طلعت مرتبطة بواحد..بدأت تعايرني بالرجالة الي بتخلف..وقالتلي انت مبقتش راجل انت مبقاش ليك لازمة انا عايزة اخلف طلقني..ولما مرضتش كنت فاكر كدة اني بكسر جناحها زي ما كسرت جناحي قالتلي انا هخلعك عشان عايزة اتجوز واخلف وبحب واحد غيرك وهو بيحبني..كانت بتتكلم يا سالي بمنتهى البرود مفكرتش فيا خالص..وخلعتني من اربع شهور فضحتني في المحكمة واهانتني وجرحتني اوي يا سالي واتجوزت الي خانتني معاه ومبسوطة اوي في حياتها وانا بتعذب كل يوم بسببها وحاسس بالعجز والنقص..كنت زمان بعايرك بظافر وبعايره وان انا الي مخلف وهو مبيقدرش..بس دلوقتي فهمت احساسه..كان نفسي تطلع أصيلة زيك يا سالي " تحدث وهو يبكي فأعطته المناديل الورقية
