واڨفة وتمشي فيه وهو متكي عليها يمشي خطوة بخطوة فرحان بزاف بقربها ليه حتى ولو كانت ماتحبوش ....... من اللي تصاوب بالرصاصة وأنقذ حياتها وهي معاه مخطاتوش دقيقة وحدة ........ مهبطة راسها ومركزة مع رجليه اللي بدا يحرك فيهم مؤخرا وهو يتأمل فيها طلعت راسها وجات العين مع العين .......
تاهوا في بعضاهم حمحمت صوفيا وهدرت :
ياسر عليك اليوم هيا تريح وغدوا نكملوا
مايكل ڨرب ليها وهمس في وذنها : هكذا راني مليح
سمعوا الطبطيب تاع الباب وصلاتو لبلاصتو عاوناتو تكسل وغطاتو وراحت تحل الباب لڨات سفيان و أمو تبسمت معاهم ودخلتهم .......
ڨاعدين ويشوفوا في بعضاهم في ربعة سفيان مستغرب من أمو اللي جابتو هنا بحجة أنهم يطلوا على مايكل بصح هو فاقلها بلي كاينة حاجة أخرى ...صوفيا مستغربة ثاني من جيتهم ..... مايكل مزير على يدو ڨريب يطرطڨ من سفيان كي تجمع مع صوفيا في بلاصة وحدة وإلهام (أم سفيان) تشوف فيهم في ثلاثة ماهيش عارفة كيفاش تبدى الهدرة
ناضت صوفيا تعدل لمايكل المخدة باش يكون مرتاح في الڨعدة غير وصلت ليه عينيه ولاو حومر دم كي شافها وش لابسة كانت لابسة فيزو وبيستي مفصلين جسمها حكمها من يدها مزير عليها وجبدها ليه
مايكل : تروحي ضك تلبسي حاجة تصلح وكي يروحوا نتفاهم مع جدك على اللبسة هذي .....
طلڨها وهي تبسمت على الغيرة تاعو طلعت لشمبرتها لبست روبة واسعة وطوييلة وجات تبسم معاها وغمزها هاذو كامل تحت أنظار سفيان اللي بغى يطرطڨ حتى هو (ياااه يا صوفيا وش درتي فيهم مساكن 😂😂)
هدرت إلهام وهوما سكتوا متشوقين باش يعرفوا وش رايحة تڨول
إلهام : أول حاجة الحمد لله على سلامتك مايكل
شاورلها براسو بمعنى يسلمك تبسمت وكملت هدرتها
ثاني حاجة اليوم جمعتكم هنا باش تعرفوا حكايتي اللي هاذي سنين وهي مخبية "كي كنت في العشرين كان يقرا معايا شاب ما شاء الله عليه تعرفنا في الجامعة ومع الوقت حبيتو وهو ثاني حبني غير كملنا القراية جا خطبني كانت عندو دار صغيرة وطوموبيل وخدام وأنا قبلت حالتنا المادية كانت مليحة ماعندناش وما يخصناش الحمد لله ڨعدنا خمس سنين مع بعض لاباس علينا من بعد حملت وجبت زوج ولاد توأم غير حقيقي اللي هوما سفيان و ريان كانت فرحتنا كبيرة بزاااف بيهم عشنا أفضل يامات حياتنا معاهم مع الوقت بداو يزيدوا المصاريف وباباهم مقدرش عليهم قترحت عليه نخرج نخدم بصح هو ما قبلش بدا يتبدل بشوية وولى يجيب الدراهم بزاف ويشري حوايج غاليين ليا ولولادي وكي نسقسيه منين جابهم يتقلق ويڨولي ما تحوسيش عليا حتان عرفت بلي راهو يتاجر بالمخدرات مع جلال كانت صدمة عمري وتهاوشت أنا وياه وصلت بينا للطلاڨ حاولت نجيب ولادي في زوج معايا مي هو ما قبلش خلالي سفيان ودا معاه ريان (هبطوا دموعها مسحتهم وكملت تحكي ) تشويت على وليدي وكيما درت معاه ما حبش يرجعولي بعد 6 سنين عرفت بلي مات وريان حوست عليه وملڨيتلوش حتى أثر بصح وليدي نعرفو حتى بعد ثلاثين سنة سفيان وريان كانت عندهم وحمة في كتفهم في نفس البلاصة أنا أول مرة شفت مايكل وڨعدت معاه لاحضت بلي عندو نفس الوحمة ديت شعرة من راسو كي كان راڨد ودرت تحليل الحمض النووي لبارح وين خرج وإكتشفت بلي نتوما خاوة ومايكل هو نفسو ريان ...........
************************************
كمل الخدمة و راح للدار يتغدى لڨاها تحط في الغدا شنف عليها وراح يغسل يديه وجا ڨعد على الطابلة غير ذاڨ اللقمة اللولة طيش المغرفة وخبط عليها الطابلة ڨلبها
حسام : وشننهي هاذ الرهج اللي طيبتيه ما ينضاڨش
كل يوم هكذا شوية ماكلة ما تعرفيش تديريها كيما النسا كرهت حياتي معاك
خرج وخبط عليها الباب خلاها متحضنة روحها في الشوكة (الركن) تاع الكوزينة وتبكي وتأن من ذارعها اللي قتلها بالسطر بعد ما ڨاستها الطابلة اللي خبطها عليها ...... 💔💔
❤بقلم : عائشة ❤
🔥كرونيك صراع مع القدر الجزء الثاني 🔥
أنت تقرأ
كرونيك صراع مع القدر ( باللهجة الجزائرية ) الجزء الثاني 🔥🔥
Romanceسلاااااام الزيينات رجعتلكم الجزء الثاني تاع كرونيك صراع مع القدر اللي راح يكونوا فيه أحداث نااااااارية 🔥🔥🔥 وغير متوقعة نهاائيا 😈هيا أتفاعلوا وشعلوووها بلي جام والتعليقات 🔥🔥 توحشتكم 😍❤😎💞💞
