هيا شوي تفاعل وتعليق بين الفقرات باش نحس بلي راكم تقراو 😏
نرجعوا عند اللي بدينا منها الكرونيك تاعنا كانت ڨاعدة في شمبرتها وتسمع في الغنا والزغاريت وتبكي وصحبتها تسكت فيها وهاذي هي البطلة الثانية تاع قصتنا سوزان اللي قسات عليها الدنيا وكل مرة تعطيها ضربة أقوى من اللي قبلها ماكفاش انها عرفت حقيقة راجلها بلي هو اللي إغتصبها وزادت عرفت الخبر اللي دمرلها حياتها واللي هو أنو متقدرش تكون أم والضربة القاضية أنو اليوم عرس راجلها إيه إسلام تزوج على سوزان بعد ماصارحها بكل وقاحة بلي جامي حبها وكان حاس بالذنب برك وحاب يصلح الغلطة اللي دارها في صغرو وڨالها بلي رايح يتزوج بزميلتو في الخدمة وهي لها الإختيار تطلق ولا تڨعد معاه كيما حبت وضركا مام كون تتطلق تقدر تعاود حياتها نورمال وواحد مايقدر يهدر عليها ولا يتهمها في شرفها ........
كلمة صدمة قليلة بواش راهي تحس ضركا حتى صحبتها سارة وبعيدة عليها وامها ماقدرتش تحكيلها
مالڨات في كتافها غير ياسمين اللي وقفت في وجه خوها وأمها على جال سوزان وضرك مخلية عرس خوها وڨاعدة تبكي معاها خاطر صح حبتها ودارتها كيما ختها وهي الوحيدة اللي متخلاتش عليها مسحت دموعها وناضت حلت الخزانة تاعها ووجدت الفاليزات وبدات تلم في قشها ناضت ياسمين تعاون فيها بلا ماتهدر معاها حابة تخليها على راحتها
بعد مدة
سوزان : هاذي آخر ليلة نعڨبها في الدار هاذي غدوا نخرج الصباح بكري ياسمين كي يخلاص العرس قولي لخوك يبعثلي الورقة تاع الطلاق
راحت ياسمين تحضنتها : شوفي اللي تديريها راني معاك سواءا طلقتي ولا ڨعدتي أتفكري بلي ختك ديما في كتافك ورايحة نبقى ديما صحبتك متڨوليش بلي رايحة تتهناي مني كي تتطلقي لالا كل يوم تلڨايني عندك ههههه
سوزان تبسمت : ربي يحفظك مالڨيت حتى واحد غير نتي حتى سارة من نهار راحت مازادتش عيطتلي طول باينة حسام نساها فيا ههههه
ياسمين : معليش الغايب عذرو معاه بصح رايحة نتوحشك يا كلبة والله والفت بيك 😢
سوزان : ضربتها لكتفها بحتى أنا والفت بيك معليش نتلاڨاو في الصالون تاعي ولا ارواحي ليا وقت ماتحبي الدار دارك
تحل الباب ودخلت منو نبيلة (أم إسلام وياسمين لكان شفيتو عليها)
نبيلة : نوضي نتي وجدي روحك ديري شوية ماكياج وأهبطي عاونيني مڨابلتلي العاڨر هاذي وڨاعدة ودارت لسوزا : ونتي وشراكي تعمري فيها علينا متحشميش مافيك حتى فايدة حتى لولاد وماتقدريش تجيبيهم كي النساء بصح هاو جاب إسلام لالاك وتعمرلو الدار بالولاد
طرطڨت سوزان بالضحك حتى تشوكاو فيها خاطر هي بطبيعتها حساسة بزاف واللي يڨولها كلمة تبكي بصح الضروف تبدل الإنسان وتقويه
سوزان ڨدمت ليها وشافت في عينيها تتحدى فيها : وليدك هذاك الأنوش ما فهمناه لاراجل ولا مرا خاطر خليقتو تاع رجال بصح فعايلو النساء ومايديروهمش والحاجة اللي معلابالكش بيها وليدك هو اللي كان يضال يجري مورايا غير باش نقبل بيه وماشي حب فيا لالا باش يصحح الغلطة اللي دارها قبل سنوات وعلى الولاد ربي هو الرزاق وأنا أي حاجة يكتبهالي ربي راضية بيها مانيش رايحة نكفر كيفكم ولا نعاير الناس بحاجة ماشي بيديهم هاذي حاجة ربي يا نبيلة وأنا متأكدة بلي ما نعيا بولادي ووليدك يشوف ويتحسر خاطر عندي أمل في الله وضك تقدري تخرجي من شمبرتي تعرفي الطريڨ
نبيلة كانت رايحة تطرطڨ وزادت عليها ياسمين كي ڨعدت مع سوزا ومحبتش تروح معاها خرجت وهي مهبطة راسها مالڨات ما تڨول
🔥كرونيك صراع مع القدر الجزء الثاني 🔥
❤بقلم : عائشة ❤
أنت تقرأ
كرونيك صراع مع القدر ( باللهجة الجزائرية ) الجزء الثاني 🔥🔥
Romanceسلاااااام الزيينات رجعتلكم الجزء الثاني تاع كرونيك صراع مع القدر اللي راح يكونوا فيه أحداث نااااااارية 🔥🔥🔥 وغير متوقعة نهاائيا 😈هيا أتفاعلوا وشعلوووها بلي جام والتعليقات 🔥🔥 توحشتكم 😍❤😎💞💞
