يوم جديد
ناضت سوزان على الستة تاع الصباح لڨات ياسمين راڨدة في لرض تبسمت على حالتها سلمت على راسها بشوية باش متخلعهاش وهزت فاليزتها وخرجت تجر في رجليها تنهدت وراحت ديراكت للبحر ....... حطت الفاليزة وڨعدت توالها تشوف في البحر وتخمم في حياتها كيفاش راح تكملها وكيفاش رايحة تكون ردة فعل الأم تاعها كي تعرف بلي راجلها تزوج عليها ورايحة تتطلق منو أفكار بزاف جاو في راسها عيات من كلش ومن الدنيا هاذي بلا ماتحس لڨات دموعها يهبطوا دمعة ورا ختها حتى ولاو شهقات ...... بكات على السذاجة تاعها بكات على نيتها اللي خلاتها تحبو ..... مسحت دموعها كي حست بعبد واڨف ڨدامها طلعت راسها لڨاتو معاذ أخ سارة ......
معاذ : صباح الخير
سوزا : صباح النور خويا معاذ وشراك ووشراهي سارة ؟؟
معاذ : أنا لباس الحمد لله بصح سارة عندي مدة مهدرتش معاها ونتي واش حوالك وشبيك تبكي كشما دارلك هذاك ال&&&& ڨوليلي برك نروح ليه نكسرلو عضامو .....
ضحكت سوزا على هدرتو : ربي يحفظك خويا بصح مكان لاه رانا رايحين نطلڨوا وإسمو مانيش حابة نسمعو من اليوم .....
معاذ : أيا مليح باينة مڨولتيش لداركم مادام جيتي هنا للبحر على الصباح ....
سوزا : إيه وما علاباليش كيفاش نڨول لماما غاضتني مسكينة ملي كبرت وهي تعاني معايا
معاذ إستغرب من هدرتها بصح محبش يسقسيها : هيا تروحي معايا ضرك لدارنا تريحي شوية وكي تحسي روحك مستعدة باش تواجهي يماك تقدري تروحي لداركم
سوزا ناضت وحطت يدها على ذراعو : مرسي خويا معاذ والله ماننسالك خيرك
معاذ تبسم : لولة مانيش خوك 😁 والثانية بلا مزية راكي كثرمن سارة
تبسمت سوزا وراحو لدار داها لشمبرة سارة تريح وهو راح يدوش خاطر كان يجري .........
************************************
عند صوفيا بدلت قشها وخرجت بعد ماخلات إلهام مع مايكل راحت خدمت كواغطها وباعت كامل الأملاك تاع باباها وتبرعت بالصوارد تاعهم للأيتام كانت حابة تبدا بداية جديدة بخدمتها هي ماشي بالورث تاع باباها اللي دارو بدراهم الحرام فاتت لأمها شافتها ودات عليها شوي دراهم باش تبدا مشروع صغير وحدها ..... فاتت ديراكت لصديق قديم كانت تعرفو شرات عليه ڨاراج باش تحل بيه محل" السيف " للملابس الرجالية (سماتو على إسم خوها )
************************************
لبست قشها وخرجت رايحة للطبيبة تاعها تروح ليها غير كي يخرج حسام بالتخبية عليه ..... بعد مدة كانت وصلت ڨعدت برا ريحت شوية خاطر فشلت من الطريڨ ومنبعد طلعت بشوية دخلت وڨعدت تستنى في قاعة الإنتظار تشوف غير في ليكوبل مع بعضاهم والرجال فرحانين بحمل نساهم ويسايسوا فيهم دمعوا عينيها وتفكرت حسام كيفاش كان يعاملها وفرحان بوليدهم وصل الدور تاعها ودخلت للطبيبة جوزت عليها ودارتلها الإيكو
الطبيبة : مادام سارة وصيتك الخطرة اللي فاتت وڨتلك تنتبهي بزاف على صحتك وماكلتك بصح تبانلي منفذتيش وش قتلك
سارة هبطت راسها وسكتت
الطبيبة : منخبيش عليك راكي نتي ثاني طبيبة وتكوني عارفة الوضع تاعك البيبي راهو في خطر ومام نتيا ثاني الحمل تاعك ماهوش ثابت وزيد ماكيش متهلية في روحك راني قتلك ونعاودلك أهتمي بروحك وبماكلتك وصحتك وبعدي على القلقة والتوتر وكولي دواك في الوقت علابالي ماكيش تاكلي فيه
سارة : أوكي دكتورة إن شاء الله
روحت سارة وطريڨ كاملة وهي تبكي مع وصلت للدار وحلت الباب لڨات حسام ڨاعد فوڨ الكرسي ويستنى فيها ....
❤بقلم : عائشة ❤
🔥كرونيك صراع مع القدر الجزء الثاني 🔥
أنت تقرأ
كرونيك صراع مع القدر ( باللهجة الجزائرية ) الجزء الثاني 🔥🔥
Romanceسلاااااام الزيينات رجعتلكم الجزء الثاني تاع كرونيك صراع مع القدر اللي راح يكونوا فيه أحداث نااااااارية 🔥🔥🔥 وغير متوقعة نهاائيا 😈هيا أتفاعلوا وشعلوووها بلي جام والتعليقات 🔥🔥 توحشتكم 😍❤😎💞💞
