أين قلبي ؟!
أظنه تحطم
إذا أين مالكه ؟!
لقد رحل
لماذا لم يحافظ علي الأمانة ؟!
لأنه خائن
لا يمكن ذلك هو أروع شخص تعرفت عليه
ليس كذلك .... أنت فقط كنت ترينه هكذا بعينيك الجميلتين 💔
************************************
رررررررروحت من عند الطبيبة مع دخلت للدار لڨات حسام ڨاعد يستنى فيها .... يبست في بلاصتها وبلعت ريڨها كي شافت النضرات تاعو ليها ..
ناض من بلاصتو وبدا يڨرب ليها وهي تبعد حتان خبطت في الحيط .... غمضت عينيها كي شافتو هز يدو عرفاتو بلي رايح يضربها ..... ماحست غير بيدو على رڨبتها يخنڨ فيها ويعيط
حسام : وين كنتي يا ××××× تخليني حتان نخرج وتروحي من ورايا ××××××
سارة تحاول تتنفس : أط .... لڨ ..... ني.... ما .... نيش..... قادرة ..... نتنفس
طلڨها حسام : وين كنتييييي أهدرييييي
سارة تنهج وتبكي : كنت عند الطبيبة والله رحت تفقدت البيبي
حسام : صار وليتي تخرجي بلا علمي آ كلبة ضرك تشوفي كيفاه نعاودلك التربية وطاح عليها بالضرب وهي تبكي وتعيط 💔
***********************************
ناضت سوزان هزت تليفونها شافت الساعة لحڨت العشرة تاع الصباح شافت من ومن لڨات روحها في شمبرة سارة تبسمت ڨداش توحشتها وشاتية تشوفها عدلت بلاصتها و راحت للكوزينة حشمانة منهم لڨات زينب وحدها فرحت و راحت تجري ليها عنقتها عندها بزااف متلاقاتش بيها
زينب تمسحلها على وجهها بيديها : سوزا بنتي وشراكي توحشتك 😍
سوزا : أنا ثاني توحشتك طاطا أسمحيلي ماجيتش توالك طول بصح الله غالب راكي تعرفي ملي تزوجت مام دارنا ومنجيش ليهم بزاف
زينب : علابالي يا بنتي علابالي وراهو حكالي معاذ كلش أڨعدي تفطري وروحي تريحي الدار دارك
سوزا : يعيشك طاطا ربي يحفظك وشراهي الهاملة تاع سارة توحشتها هههه
زينب : والله ما علابالي يا بنتي عندي ثلث شهر ماسمعتش صوتها ملي نعيط مصكر حسام ڨالي تكسرلها بصح راني حاسة بلي ماهيش مليحة ومخبية علينا حاجة مام هو محبش يعڨبهالي نهدر معاها
سوزا : بالاك راهي مشغولة مع الخدمة تاعها متقلقيش روحك طاطا مايكون غير الخير إن شاء الله
زينب : إن شاء الله يا بنتي إن شاء الله
************************************
ڨاعدة في المحل تاعها والخدامين اللي وضفتهم يبيعوا في الملابس الرجالية تبسمت كي شافت مايكل داخل هو وأمو ناضت وراحت سلمت عليهم ورحبت بيهم وطلبتلهم قهوة
إلهام تشوف في المحل : الله يبارك راكي قايمة بخدمتك يا بنتي يعطيك الصحة
صوفيا : يسلمك طاطا إلهام الحمد لله الخدمة راهي ماشية
مايكل : أيا مليح كي كملنا القهوة هيا معانا تخيرلي كوستيم باهي
تبسمت صوفيا : أوكي باينة عندك حفلة
مايكل هز يد أمو وسلم عليها : إيه حفلة الخطوبة تاعي يما العزيزة شافتلي طفلة ورايحة تخطبهالي الجمعة هاذي
تمحات البسمة اللي على فمها وغرغروا عينيها بالدموع حمحمت ونطقت : كلشي مبروك هاهو وائل يعاونكم تخيروا سمحولي عندي خدمة وراحت تجري ...... ركبت في طومبيلها وديمارات تسوق ودموعها ويدان هذا وين عرفت قيمتو في حياتها كي خسراتو و رايح يبني حياتو مع وحدة أخرى....
************************************
رجعت ليه رحيق بعد ما خلاتلو الوقت يخمم لڨاتو ڨاعد وتايه مع شافها ناض يجري جبدها لحضنو وزير عليها
يوسف : حياتي كامل وأنا نحبك وعايش بيك أكيد مانيش رايح نتخلى عليك ضركا تبقاي ديما الوحيدة اللي دات قلبي و روحي وخلاتني نعشقها حتان هبلت على جالها هههههه
طرطڨت بالبكي في حضنو : نحبك يوسف نموت عليك وسامحني بزاااااف تعذبت على جالي .....
يوسف : السماح يا حبي عذابك راحة وجنة والبعد عليك عذاب وجهنم .........
شبكوا يديهم في بعضاهم وخرجوا بعد ما الطبيب جوز على يوسف وسمحلوا باش يخرج ......
🔥كرونيك صراع مع القدر الجزء الثاني 🔥
❤بقلم : عائشة ❤
أنت تقرأ
كرونيك صراع مع القدر ( باللهجة الجزائرية ) الجزء الثاني 🔥🔥
Romanceسلاااااام الزيينات رجعتلكم الجزء الثاني تاع كرونيك صراع مع القدر اللي راح يكونوا فيه أحداث نااااااارية 🔥🔥🔥 وغير متوقعة نهاائيا 😈هيا أتفاعلوا وشعلوووها بلي جام والتعليقات 🔥🔥 توحشتكم 😍❤😎💞💞
